Беларускую валанцёрку Карыну Пацёмкіну высылаюць з Украіны

Карына Пацёмкіна павінна пакінуць тэрыторыю Украіны да 15 ліпеня.

6 ліпеня стала вядома, што ў Карыны Пацёмкінай не прынялі дакументы на легалізацыю ва Украіне. Супрацоўніца міграцыйнай службы забрала ў Пацёмкінай пашпарт і паабяцала штраф. Сёння пашпарт вярнулі — са штампам аб дэпартацыі. Пра гэта беларуска паведаміла ў сваім фэйсбуку, апублікаваўшы фота пашпарта.

Карына Пацёмкіна — беларуска, якая жыла і валанцёрыла ў Бучы. 30 чэрвеня Кацярыне Пацёмкінай уручылі падзяку за валанцёрскую дзейнасць ва Украіне.
Нядаўна ў падобнай сітуацыі аказалася беларуская праваабаронца Анісія Казлюк: яна была затрыманая 24 чэрвеня ў Кіеве за нелегальнае знаходжанне ва Украіне, ёй пагражала дэпартацыя з краіны. Тады ў сітуацыю ўмяшаўся прадстаўнік офіса Святланы Ціханоўскай Валерый Кавалеўскі. Па выніках яго перамоў з кіраўніком Камітэта па правах чалавека Вярхоўнай Рады Украіны Дзмітрыем Лубінцом 24 чэрвеня стала вядома, што з праваабаронцы спагоняць мінімальны штраф, аднак выдвараць з краіны не будуць. 27 чэрвеня, Анісію аштрафавалі на мінімальна магчымую суму — 1700 грыўняў, пасля чаго пакет дакументаў для легалізацыі Анісіі Казлюк ва Украіне ўсё ж прынялі.