Што падпісалі Шайгу і Хрэнін у Мінску?

Міністр абароны Расіі Сяргей Шайгу прыбыў у Мінск для сустрэчы з міністрам абароны Беларусі Віктарам Хрэніным. Пра візіт паведаміў у «Твітары» начальнік Дэпартамента міжнароднага ваеннага супрацоўніцтва МА Беларусі Валерый Рэвенка.

photo_2022_12_03_17_39_15.jpg

Пазней прэс-служба беларускага Міністэрства абароны паведаміла, што самалёт кіраўніка ваеннага ведамства Расіі прызямліўся на аэрадроме ў Мачулішчах.

«Міністр абароны Рэспублікі Беларусь генерал-лейтэнант Віктар Хрэнін і міністр абароны Расійскай Федэрацыі генерал арміі Сяргей Шайгу абмеркавалі актуальныя пытанні двухбаковага ваеннага і ваенна-тэхнічнага супрацоўніцтва і падпісалі пратакол паміж Рэспублікай Беларусь і Расійскай Федэрацыяй аб унясенні змяненняў у пагадненне аб сумесным забеспячэнні рэгіянальнай бяспекі ў ваеннай сферы ад 19 снежня 1997 года», — гаворыцца ў паведамленні Мінабароны Беларусі.

Пра сэнс унесеных паправак нічога невядома. Аднак, відаць, ён варты таго, каб расійскі ваенны міністр у суботу ляцеў у Беларусь.