У новы пакет санкцый ЕС могуць уключыць двух беларускіх чыноўнікаў

Яшчэ двух прадстаўнікоў рэжыму Лукашэнкі прапануюць уключыць у 11-ты пакет санкцый Еўрасаюза ў звязку з агрэсіяй Расіі супраць Украіны, паведамляюць вартыя даверу крыніцы «Св*боды» ў Бруселі.

У наступны сьпіс санкцыяў прапануюць уключыць двух беларускіх чыноўнікаў.

Адзін з іх — гэта Уладзімер Марозаў, начальнік Беларускай чыгункі. Ён, як сьцьвярджаецца, падтрымліваў разгортваньне і транспартаваньне расейскага вайсковага пэрсаналу і тэхнікі, якія ўдзельнічалі ў агрэсіўнай вайне Расеі супраць Украіны, таму нясе адказнасьць за падтрымку і рэалізацыю дзеяньняў і палітыкі, якія падрываюць і пагражаюць тэрытарыяльнай цэласнасьці, сувэрэнітэту і незалежнасьці Ўкраіны.

Другі — Дзьмітры Пантус, старшыня Дзяржаўнага ўпраўленьня ваеннай прамысловасьці Беларусі, якое распрацоўвае і абслугоўвае ўзбраеньне, садзейнічае вытворчасьці зброі падведамаснымі прадпрыемствамі, забясьпечвае вайскова-прамысловую каапэрацыю, ажыцьцяўляе нагляд за перамяшчэньнем зброі празь дзяржаўную мяжу і забясьпечвае навігацыю расейскага войска. На сваёй пасадзе Дзьмітры Пантус надае ваенную падтрымку Расеі ў яе агрэсіўнай вайне супраць Украіны.

У сераду 10 траўня амбасадары ЭЗ упершыню абмяркуюць новы пакет санкцыяў, пакуль ён яшчэ далёкі ад канчатковага ўзгадненьня.

Што будзе ў 11-м пакеце санкцыяў супраць Расеі

Прэзыдэнтка Эўракамісіі Ўрзуля фон дэр Ляен 9 траўня ў Кіеве заявіла, што ў 11-м пакеце санкцыяў супраць Расеі плянуецца ўвесьці забарону на імпарт новых тэхналёгій і запчастак для самалётаў, а таксама ўзмацніць адказнасьць за абыход санкцыяў.

«Мы працягваем рабіць усё залежнае ад нас, каб спыніць ваенную машыну Пуціна. Нашы санкцыі працуюць. Напрыклад, мы зьменшылі наш імпарт з Расеі прыблізна на дзьве траціны. Гэта вялізны ўдар па даходах Расеі. Мы ўжо прымусілі Крэмль заплаціць высокую цану дзякуючы 10 пакетам санкцыяў. Эўракамісія зацьвердзіла прапановы для 11-га пакета, які будзе сканцэнтраваны на недапушчэньні абыходу абмежаваньняў. Мы працуем па гэтым пытаньні з партнэрамі, у тым ліку краінамі G7», — паведаміла Ўрзуля фон дэр Ляен.

Як Турцыя дапамагае Беларусі абысці санкцыі? Што знайшлі ў сакрэтных дакументаў Пентагону?

У новым пакеце санкцыяў супраць Расеі прапануюць:

уключыць новых фізычных і юрыдычных асобаў;

распаўсюдзіць забарону на транзыт праз тэрыторыю Расеі падсанкцыйных перадавых тэхналёгій і камплектуючых, якія выкарыстоўваюцца ў аэракасьмічнай галіне (цяпер гэта забарона распаўсюджваецца на тавары падвойнага прызначэньня);

цалкам забараніць экспарт люксавых аўтамабіляў (цяпер забарона распаўсюджваецца толькі на аўтамабілі коштам большым за 50 000 эўра), распаўсюдзіць забарону на экспарт тэхналягічнай прадукцыі, знойдзенай на палях бітваў ва Ўкраіне;

стварыць сыстэмы процідзеяньня абыходу санкцыяў: першым крокам будзе папярэджаньне трэціх краін аб тым, што яны абыходзяць санкцыі; наступны крок — накладаньне санкцыяў на суб’екты з трэціх краінаў, якія працягваюць абыходзіць санкцыі;

увесьці дадатковыя санкцыі ў дачыненьні да іранскіх і 8 кітайскіх кампаній;

распаўсюдзіць забарону на перавозкі на грузавыя аўтамабілі, зарэгістраваныя ў Расеі;

узмацніць кантроль за імпартам мэталяпрадукцыі: неабходна будзе прадэманстраваць, што прадукцыя, якая ўвозіцца з трэціх краінаў, ня зробленая ў Расеі ці з расейскіх кампанэнтаў (аналягічныя абмежаваньні будуць адносна драўніны і вырабаў з дрэва);

накласьці абмежаваньні на інтэлектуальную ўласнасьць;

увесьці забарону на заход у парты ЭЗ суднаў, якія адключаюць сыстэму адсочваньня руху або перавозяць падсанкцыйныя тавары;

уключыць у прававы акт забароны на імпарт нафты па паўночнай частцы нафтаправоду «Дружба» (г.зн. той часткі, якая ідзе празь Беларусь, Польшчу і Нямеччыну);

пашырыць сьпіс забароненых да вяшчаньня СМІ (уключаючы RT Балканы).

Прыняцьце чарговага пакету санкцыяў адносна Беларусі па-ранейшаму замарожанае.