Вызваленне ксяндза Акалатовіча і айца Юхневіча: Касцёл бачыць «сігнал надзеі»

Канферэнцыя каталіцкіх біскупаў Беларусі абвясціла пра вызваленне ксяндза Генрыха Акалатовіча і айца Анджэя Юхневіча OMI, асуджаных па палітычных артыкулах. Касцёл вітае гэта як пазітыўную тэндэнцыю і вяртанне дыялогу з дзяржавай.

Прэс-служба Канферэнцыі Каталіцкіх Біскупаў Беларусі паведаміла пра вызваленне ксяндза Генрыха Акалатовіча і айца Анджэя Юхневіча OMI.

«Рыма-каталіцкі Касцёл у Беларусі вітае пазітыўныя тэндэнцыі дзяржавы ў міжнародным парадку, аднаўленне дыялогу паміж Рэспублікай Беларусь і ЗША, а таксама ўзмацненне кантактаў з Ватыканам», — адзначаецца ў паведамленні.

У працэсе вызвалення ўдзельнічалі Прэфект Дыкастэрыі па справах Усходніх Касцёлаў кардынал Клаўдыё Гуджэроцці, Апостальскі нунцый у Беларусі Іньяцыё Чэффаліа і старшыня ККББ арцыбіскуп Іосіф Станеўскі.

Справа Генрыха Акалатовіча

Ксёндз Генрых Акалатовіч быў асуджаны на 11 гадоў калоніі ўзмоцненага рэжыму. Суд праходзіў у закрытым рэжыме, і падрабязнасці справы сталі вядомыя толькі пазней. Паводле весткі, якую святар перадаў на волю, яго абвінавацілі ў «шпіянажы на карысць Польшчы і Ватыкана», што ён называў «грубай правакацыяй». Акалатовіч падкрэсліваў, што ніколі не быў нічыім агентам, а з'яўляецца слугой Бога, і «судзяць не яго, а ўсю Каталіцкую царкву ў Беларусі».

Святар пісаў, што абвінавачванні пабудаваныя на «хлусні, пагрозах і шантажы», а з дзесяткаў сведак — у тым ліку чыноўнікаў і вайскоўцаў — ніхто не даў супраць яго выкрывальных паказанняў. Ён таксама перадаваў словы кардынала Казіміра Свёнтка, які казаў, што «святароў пераследуюць, каб закрыць ім раты».

Сталінская галгофа каталіцкіх святароў

Справа Анджэя Юхневіча OMI

Ксёндз Анджэй Юхневіч, пробашч санктуарыя Маці Божай Фацімскай і святар ордэна місіянераў аблатаў Беззаганнай Марыі, быў асуджаны 30 красавіка 2025 года. Суд прысудзіў яму 13 гадоў пазбаўлення волі, хоць абвінавачванне патрабавала 15. Працэс праходзіў у закрытым рэжыме, святар цалкам адмаўляў віну і сцвярджаў пра сфабрыкаванасць справы.

Юхневіча абвінавацілі ў злачынствах супраць палавой недатыкальнасці непаўналетніх, нібыта здзейсненых дзесяць гадоў таму. Паводле вернікаў, справа трымалася на сумнеўных паказаннях, як мяркуецца, атрыманых пад ціскам. Скаргаў на святара ніколі не паступала. У СІЗА ён, паводле паведамленняў, падвяргаўся катаванням.

Першапачаткова Юхневічу інкрымінавалі «дыверсійную дзейнасць» — падставай для ўзбуджэння справы сталі фота з бел-чырвона-белым і ўкраінскім сцягамі. Тады яго прызналі палітвязнем.

Пазіцыя дзяржавы

У паведамленні БЕЛТА адзначаецца, што абодва святары нібыта «ўчынілі цяжкія злачынствы супраць дзяржавы».