Кіраўнік ZROBIM у СІЗА, пагрозы студэнтам ЕГУ і пашырэнне «экстрэмісцкіх» спісаў. Хронікі рэпрэсій 5 чэрвеня
У Беларусі працягваецца ціск на людзей, якія выехалі за мяжу пасля 2020 года. Праваабаронцы паведамляюць пра пагрозы студэнтам і выпускнікам ЕГУ, новыя ператрусы ў беларусаў замежжа і затрыманне кіраўніка архітэктурнай студыі ZROBIM Андрэя Макоўскага. Тым часам МУС і Міністэрства інфармацыі працягваюць пашыраць «экстрэмісцкія» спісы.
Студэнтаў ЕГУ заклікаюць вярнуцца ў Беларусь пад пагрозай пераследу родных
Ад студэнтаў Еўрапейскага гуманітарнага ўніверсітэта патрабуюць адлічыцца з навучальнай установы і вярнуцца ў Беларусь.
Паводле праваабаронцаў, у адваротным выпадку крымінальным пераследам пагражаюць іх сваякам, якія застаюцца ў краіне.
Юрыстка Праваабарончага цэнтра «Вясна» Святлана Галаўнёва раіць не выконваць такія патрабаванні.
«Калі гэта сітуацыя, што студэнт за мяжой, а ад яго патрабуюць адлічыцца і вярнуцца ў Беларусь — я раю не ісці на такія патрабаванні. Даволі часта сілавікі шукаюць людзей, на якіх можна ціснуць, і працягваюць узмацняць ціск. Ніхто не гарантуе, што пасля вяртання людзей не будуць прымушаць, напрыклад, запісваць відэа з выбачэннямі», — адзначыла праваабаронца.
Праваабаронцы таксама не рэкамендуюць вяртацца ў Беларусь выкладчыкам, выпускнікам, студэнтам і іншым людзям, якія маюць сувязі з ЕГУ.
Кіраўнік студыі ZROBIM Андрэй Макоўскі зноў апынуўся ў СІЗА
Пра затрыманне кіраўніка архітэктурнай студыі ZROBIM Андрэя Макоўскага стала вядома пасля з'яўлення падазронага допісу ў ягоным акаўнце ў Threads.
«Прывітанне з СІЗА! Плаціце падаткі цалкам, рабяты!» — з'явілася на старонцы бізнэсоўца.
Знаёмыя Макоўскага звярнулі ўвагу, што такі стыль паведамлення не характэрны для яго.
Пазней жонка бізнэсоўца пацвердзіла, што Андрэй Макоўскі сапраўды знаходзіцца ў следчым ізалятары.
Прычыны затрымання пакуль невядомыя.
У Лідзе адбыўся ператрус у кватэры актывіста, які жыве ў эміграцыі
Напрыканцы траўня супрацоўнікі КДБ прыйшлі з ператрусам у лідскую кватэру актывіста Івана Каспяровіча.
Пра гэта паведамілі праваабаронцы.
Іван Каспяровіч з 2021 года жыве ў вымушанай эміграцыі.
Падчас ператрусу супрацоўнікі КДБ апісалі яго маёмасць.
Гэта чарговы вядомы выпадак ціску на беларусаў, якія пакінулі краіну, праз іх маёмасць і родных, што засталіся ў Беларусі.
У «спіс экстрэмістаў» дадалі яшчэ 13 чалавек
5 чэрвеня МУС абнавіла «Пералік грамадзян Беларусі, замежных грамадзян і асоб без грамадзянства, якія маюць дачыненне да экстрэмісцкай дзейнасці».
Цяпер у ім 6663 чалавекі.
Сярод новых прозвішчаў — Станіслаў Прыгодзіч.
У траўні Гомельскі абласны суд завочна прызнаў яго вінаватым паводле шэрагу артыкулаў Крымінальнага кодэкса, у тым ліку аб «распальванні варожасці», удзеле ў «экстрэмісцкім фармаванні», «абразе Лукашэнкі», «абразе прадстаўніка ўлады» і «дыскрэдытацыі Беларусі».
Паводле паведамленняў дзяржаўных органаў, яму прызначылі пяць гадоў калоніі агульнага рэжыму і штраф у памеры 4500 рублёў.
У Беларусі працягваюць папаўняць спіс «экстрэмісцкіх матэрыялаў»
У чарговае абнаўленне Рэспубліканскага спіса экстрэмісцкіх матэрыялаў уключылі:
— Instagram-старонкі «Belarus en France», «Belarusian Runners Community», «marina_girin», «kalinoucy_official», «zivebelarus_slavaukraine (Трибунал! ст. 128)»;
— Facebook-старонкі «Гражданственность.BY», «Legalize Belarus», «Free Belarus Museum», «Гісторыя Беларусі», «Stop represjom na Białorusi», «Rushennie», «RAZAM e.V. - Belarusische Gemeinschaft», «Маладая Грамада»;
— TikTok-старонкі «ГОМЕЛЬ И ОБЛАСТЬ – НОВОСТИ», «gorshish7», «kshi_7», «olgakempinsky».