«Добраахвотны ўдзел у выкананні работ абароннага характару ў мірны час» каштуе 15 рублёў у дзень — BelPol

Паводле цяперашняга закона, удзел грамадзян у выкананні работ абароннага характару ў мірны час да ўвядзення ваеннага становішча з’яўляецца добраахвотным». Хоць зразумела, што ў рэаліях цяперашняй Беларусі гаворка пра «добраахвотнасць» удзелу ў такіх працах наўрад ці ідзе, піша «Позірк».

Дзяржорганы абмяркоўваюць праект пастановы ўрада, якая рэгламентуе «добраахвотны ўдзел грамадзян у выкананні работ абароннага характару ў мірны час», вынікае з паведамлення аб’яднання былых сілавікоў BelPol.

Арганізацыя былых сілавікоў спасылаецца на свае крыніцы — і сцвярджае, што сярод іншых работ пазначаны ўладкаванне траншэй, акопаў, бліндажоў, хованак для баявой тэхнікі і асабістага складу воінскіх фарміраванняў, абсталяванне абарончых рубяжоў і падрыхтоўка населеных пунктаў да абароны, даабсталяванне памяшканняў, выдзеленых ваенным, аднаўленне разбураных будынкаў, збудаванняў, інжынерных сетак, дарог; выкрыццё разбураных альбо пашкоджаных скляпоў, прамысловых і грамадзянскіх аб’ектаў для выратавання людзей, якія ў знаходзяцца.

Такім чынам, рэжым «хоча ўзаконіць» у Беларусі расійскі варыянт «спецыяльнай вайсковай аперацыі», калі «вайна афіцыйна не абвешчаная, час нібыта мірны, але баявыя дзеянні вядуцца», мяркуе BelPol.

«Зразумела, што ў рэаліях лукашэнкаўскага канцлагера гаворка пра «добраахвотнасць» удзелу ў такіх працах не ідзе, — гаворыцца ў рэлізе. — Да іх выканання прыцягнуць усіх, да каго дабяруцца. Усталяваны ў дакуменце ўзроставы цэнз — 16 гадоў і старэй. Памер аплаты працы — 15 рублёў у дзень».

19 кастрычніка 2023 года паведамлялася, што Саўмін унёс у Палату прадстаўнікоў папраўкі да закона «Аб абароне», які закладвае аснову для вызначэння пераліку работ, памеру платы за іх выкананне.

Згодна з папраўкамі, «на перыяд удзелу ў выкананні работ абароннага характару» грамадзянін вызваляецца ад асноўнай працы з захаваннем за імі працоўнага месца, пасады служачага (прафесіі рабочага) і сярэдняга заробку.

Падкрэслівалася, што «ўдзел грамадзян у выкананні работ абароннага характару ў мірны час да ўвядзення ваеннага становішча з’яўляецца добраахвотным».

Карэкціроўкі таксама закранаюць паўнамоцтвы Міністэрства антыманапольнага рэгулявання і гандлю. Сярод іншага на ведамства ўскладаецца задача прадастаўляць Генеральнаму штабу інфармацыю, неабходную «для прымянення мер па забеспячэнні ваеннага становішча».

«[МАРГ] распрацоўвае план нармаванага забеспячэння насельніцтва асноўнымі харчовымі таварамі і іншымі таварамі першай неабходнасці <…>; распрацоўвае план паставак <…> для нармаванага забеспячэння насельніцтва, які ўваходзіць у склад дзяржаўнага абароннага заказу на ваенны час. Сумесна з Міністэрствам аховы здароўя вызначае неабходнасць карэкціроўкі норм забеспячэння <…> у залежнасці ад катэгорый грамадзян, удакладняе нормы забеспячэння <…> у залежнасці ад катэгорый грамадзян», — было адзначана ў праекце дакумента.

17 ліпеня мінулага года Аляксандр Лукашэнка падпісаў закон «Аб народным апалчэнні», які дазваляе фармаваць з цывільных асоб нерэгулярныя ўзброеныя атрады.

24 лютага 2022 года Расія пачала поўнамаштабную вайну супраць Украіны, называючы яе СВА — «спецыяльнай вайсковай аперацыяй».

На першапачатковым этапе ўварвання Беларуская тэрыторыя актыўна выкарыстоўвалася для ўводу войскаў, а таксама абстрэлу ўкраінскай тэрыторыі. Лукашэнка неаднаразова заяўляў, што падтрымлівае РФ у яе дзеяннях.