520-ты дзень вайны: Дзяржаўнасць цяжка абараніць, але вярнуць страчаную — яшчэ цяжэй
«Мы не верым, што РФ не захоча вяртацца», — так Уладзімір Зяленскі выказаўся з нагоды Дня дзяржаўнасці Украіны. Пагроза для ЗАЭС расце: выбухі прагучалі каля Запарожскай АЭС і былі зафіксаваны экспертамі МАГАТЭ.
Ва Украіне сёння — Дзень дзяржаўнасці
Прэзідэнт Украіны Уладзімір Зяленскі выступіў з нагоды Дня ўкраінскай дзяржаўнасці пад сценамі Міхайлаўскага Залатаверхага манастыра ў Кіеве і ўзнагародзіў украінскіх абаронцаў.
«Сёння мы святкуем Дзень дзяржаўнасці — другі раз ва ўмовах поўнамаштабнай вайны. Мы ўсе імкнёмся, каб у наступным годзе мы адзначылі гэты дзень такім жа чынам у свабоднай сталіцы, але ўжо з перамогай.
...Больш чым тысячагадовая гісторыя нашай дзяржаўнасці падказвае, што трэба перамагаць. Не спыняцца, а перамагаць, не гандлявацца, а перамагаць, не спадзявацца на капрызы лёсу, а перамагаць і будаваць такую моцную дзяржаву, каб яе патэнцыял і здольнасць абараніць сябе, вера нашага народа ў сябе, зброя ў руках украінцаў і згуртаванасць усіх разам у дзяржаве гарантавалі захаванне дзяржаўнасці Украіны і непаўтарэнне агрэсіі супраць нашай дзяржавы.
Мы не верым, што Расія не захоча вярнуцца з агрэсіяй нават пасля таго, як мы выганім захопнікаў з усёй нашай зямлі. Але перамога Украіны можа і павінна быць такой, каб любыя спробы праціўніка вярнуцца не выходзілі за рамкі хворай фантазіі тых вар'ятаў, якія выношваюць такія планы.
Наша дзяржаўнасць — гэта наш адказ на неабходнасць бяспекі і міру для Украіны.
Дзяржаўнасць, якую цяжка абараніць, але цяжэй вярнуць, страчаную. Гэта ніколі не бывае проста дадзенасцю. Гэта вынік службы і працы на карысць Украіны.
Дзяржаўнасць хтосьці можа ўспрымаць толькі як заробак, імкненне да ўлады, свае амбіцыі, але для іншых — моцных і чыстых — дзяржаўнасць становіцца найвышэйшай ахвярай — жыццём, якое аддаюць нашы героі дзеля ўсіх нас, дзеля свабоды Украіны».
Падчас святочных мерапрыемстваў Зяленскі ўзнагародзіў украінскіх абаронцаў.
Навіны вайны
Паводле штодзённай справаздачы ўкраінскага Генштаба, агульныя баявыя прыкладныя страты рускай арміі склалі: асабістага складу 244 830 (+560 за мінулыя суткі) чалавек.
За суткі 27 ліпеня руская армія нанесла тры ракетныя і 29 авіяцыйных удараў, больш за 70 удараў па пазіцыях украінскіх войскаў і розных населеных пунктах. Не абышлося без гібелі і ранення мірных жыхароў, таксама была разбурана або пашкоджана партовая інфраструктура на поўдні Украіны і жылыя дамы.
Верагоднасць ракетных і авіяцыйных удараў па ўсёй Украіне застаецца вельмі высокай.
На Бахмуцкім кірунку сітуацыя вельмі напружаная, але сілы абароны Украіны паступова прасоўваюцца наперад, паведаміў камандуючы сухапутнымі войскамі Аляксандр Сырскі.
Паводле яго, на першы план у дзеяннях УСУ цяпер выйшла контрбатарэйная барацьба. Для падтрымкі сваіх войскаў у раёне Кляшчыеўкі, Курдзюмаўкі, Андрэеўкі РФ засяродзіла значную колькасць артылерыі, знішчэнне якой з'яўляецца адной з галоўных задач украінскіх войскаў.
На Купянскім і Ліманскім кірунках армія РФ пастаянна атакуе, ужываючы свае найбольш прафесійныя падраздзяленні. Штодня сілы абароны Украіны адбіваюць на гэтых кірунках шматлікія штурмы.
Расія цяпер не мае магчымасці ўзмацніць Чарнаморскі флот за кошт іншых флатоў — Балтыйскага або Паўночнага, заявіў спікер ВМС Украіны Дзмітрый Пляцянчук. Ён растлумачыў, што такое ўзмацненне немагчымае, у прыватнасці, з-за закрытага Турцыяй праліва Басфор. Звычайна ў Чорным моры знаходзіцца ад 7 да 11 баявых караблёў РФ і яшчэ ад аднаго да трох караблёў памежнікаў. Яны ўяўляюць пагрозу для Украіны, у прыватнасці, з-за «магчымасці прамога баявога сутыкнення» ў моры, дадаў спікер ВМС.
Спікер паветраных сіл Юрый Ігнат не верыць у аднаўленне палётаў грамадзянскай авіяцыі ва Украіне да заканчэння вайны. Паводле яго слоў, практыка Ізраіля тут не можа быць прыменена, паколькі плошча Украіны значна большая, і ўсю яе пакрыць СПА вельмі складана. Таксама незразумела, як будзе ажыццяўляцца страхаванне пасажыраў і самалётаў ва ўмовах вайны.
Глядзіце таксама
Пагроза для ЗАЭС расце
У акупаванай расіянамі зоне Запарожскай АЭС прагрымелі выбухі. Іх зафіксавалі назіральнікі місіі МАГАТЭ.
Пра гэта паведаміў кіраўнік украінскага Дзяржатамнагляду Алег Корыкаў падчас брыфінгу. Ён адзначыў, што эксперты МАГАТЭ зафіксавалі выбухі 26 і 27 ліпеня. Таксама назіральнікі выявілі міны на тэрыторыі станцыі.
«Нядаўна мы атрымалі інфармацыю ад прадстаўнікоў МАГАТЭ, якія пастаянна знаходзяцца на Запарожскай АЭС, што міны выяўлены. Апошняя інфармацыя — 26 і 27 ліпеня чулі выбухі», — сказаў Корыкаў.
Пагроза для Запарожскай АЭС расце, бо няма ўпэўненасці, што сістэмы бяспекі працуюць, а персанал, які выдзяляюць акупанты, кваліфікаваны і адказны.
Алег Корыкаў назваў два асноўныя фактары рызыкі для АЭС.
Ён адзначыў, што для ўпэўненасці ў выкананні патрабаванняў, нормаў і правіл тэхнікі бяспекі праводзіцца своечасовае тэхабслугоўванне і рамонт тэхнікі. «Гэта значыць, у выпадку надзвычайнай сітуацыі або аварыі ў нас на станцыі ёсць сістэмы бяспекі, якія павінны спрацаваць. Яны павінны як мінімум лакалізаваць аварыю або прадухіліць яе», — сказаў ён.
Па словах Корыкава, пры адсутнасці належнага абслугоўвання нельга быць упэўненым, што гэтыя сістэмы будуць працаваць належным чынам.
Яшчэ адзін фактар рызыкі — непрадказальны і безадказны персанал, мабілізаваны акупацыйнай уладай на ЗАЭС. Бо гаворка ідзе пра пабочны персанал на ядзернай устаноўцы. Таму з першага дня захопу станцыі расіянамі існуе вялікая рызыка.
Ён растлумачыў, што правілы бяспекі прадугледжваюць, што эксплуатуючая арганізацыя-аператар павінна кантраляваць доступ на АЭС такім чынам, каб доступ на яе меў толькі той персанал, які непасрэдна ўдзельнічае ў бяспечнай эксплуатацыі станцыі.
З-за акупацыі Расійскай Федэрацыі на прамысловай пляцоўцы ЗАЭС не ўяўляецца магчымым выкананне ў поўным аб'ёме патрабаванняў Міжнароднай канвенцыі аб раннім папярэджанні.
Украіна праінфармавала пра гэта сваіх партнёраў і МАГАТЭ, каб яны маглі аказаць нейкі ціск. Ён растлумачыў, што гэта неабходна для таго, каб аднавіць анлайн-перадачу даных радыяцыйнага кантролю Запарожскай АЭС. Аднак перадача даных пакуль не адноўлена.
«Такім чынам, рызыкі для ЗАЭС істотна ўзрастаюць, а магчымасці эксплуатуючай арганізацыі і магчымасці іншых устаноў па рэагаванні ў выпадку аварыі мінімальныя», — дадаў ён.
Украіна просіць ЮНЕСКА выключыць са сваіх шэрагаў Расію
Вярхоўная Рада звярнулася да ЮНЕСКА, парламентаў і ўрадаў яе дзяржаў-чальцоў па пытанні неабходнасці пазбаўлення РФ сяброўства ў арганізацыі. Таксама парламентарыі просяць ЮНЕСКА неадкладна накіраваць ва Украіну місію для ацэнкі шкоды, нанесенай расійскімі атакамі на аб'екты Сусветнай спадчыны ў Львове і Адэсе, а парламенты і ўрады замежных дзяржаў — прыняць усе магчымыя меры па расследаванні злачынстваў, прыцягненні да адказнасці і справядлівым пакаранні вінаватых.
Акрамя таго, Рада звярнулася да ААН, парламентаў і ўрадаў краін, Міжнароднага камітэта Чырвонага Крыжа, незалежнай міжнароднай медыцынскай гуманітарнай арганізацыі «Лекары без меж» па пытанні забеспячэння абмену і вяртання ва Украіну ваеннапалонных абаронцаў Марыупаля.
Беларусь і найміты-«вагнераўцы»
Беларусь выкарыстоўвае наймітаў ПВК «Вагнер» для нагнятання сітуацыі, а іх колькасць і месцазнаходжанне ў РБ на гэты момант не ўяўляюць пагрозы для Украіны, заявіў спікер Дзяржпамежслужбы Украіны Андрэй Дземчанка. Паводле яго слоў, сітуацыя на мяжы з Беларуссю застаецца кантраляванай, непасрэдна па лініі дзяржмяжы — спакойнай.
Паводле ўкраінскай інфармацыі, цяпер колькасць «вагнераўцаў» на тэрыторыі Беларусі складае крыху больш за 5000, і яны знаходзяцца на значнай адлегласці ад мяжы з Украінай. «Цяпер бачым, што яны больш нагнятаюць сітуацыю, у тым ліку ў дачыненні да краін Еўрапейскага саюза. Гэта адзін з фактараў уплыву, які яны працягваюць выкарыстоўваць», — дадаў Дземчанка.
ЗША перадасць Украіне дроны, каб дакументаваць вайсковыя злачынствы
Амерыканскае агенцтва міжнароднай дапамогі (USAID) перадасць Генпракуратуры Украіны дзевяць аўтаномных дронаў «Skydio» для дакументавання вайсковых злачынстваў. Беспілотнікі абсталяваны камерамі 4K, якія будуць выкарыстоўвацца для фота- і відэаздымкі. Гэта дапаможа задакументаваць больш за 115 тысяч выпадкаў знішчэння грамадзянскай інфраструктуры і доказаў парушэння правоў чалавека на прыфрантавых і вызваленых тэрыторыях.
У цяперашні час дзве ўкраінскія праваабарончыя кааліцыі пры падтрымцы USAID задакументавалі больш за 40 тысяч выпадкаў ваенных злачынстваў Расіі з пачатку поўнамаштабнага ўварвання.
Танкі «Abrams» будуць ва Украіне ўвосень
Першыя амерыканскія танкі «Abrams» могуць трапіць на поле бою ва Украіне ўжо ў верасні, піша «Politico» са спасылкай на крыніцы. Мяркуецца, што ў жніўні некалькі танкаў адправяць у Нямеччыну, дзе яны пройдуць канчатковы рамонт, а потым першая партыя «Abrams» будзе адпраўлена ва Украіну. Паводле інфармацыі выдання, ЗША адправяць больш старыя мадэлі «Abrams» M1A, а не сучасную версію A2, на дастаўку якой ва Украіну спатрэбіўся б год.
У першую партыю ўвойдзе ад шасці да васьмі танкаў, а ўсяго ЗША плануюць адправіць 31 «Abrams». Са слоў чыноўніка Мінабароны, украінскія вайскоўцы павінны закончыць навучанне на танках «Abrams» у жніўні.