531-шы дзень вайны. Расія абстраляла Пакроўск Данецкай вобласці — колькасць ахвяр узрасла

Увечары 7 жніўня расійскія акупанты нанеслі ўдар па Пакроўску Данецкай вобласці. Ёсць загінулыя і параненыя.

Паводле слоў кіраўніка Данецкай вобласці Паўла Кірыленкі, вораг біў па цэнтры горада «Іскандэрамі» двойчы з інтэрвалам у некалькі дзясяткаў хвілін (у 19:15 і 19:52). Пашкоджаны дзевяці- і пяціпавярхоўкі, жылыя дамы ў прыватным сектары, гасцініца, установы харчавання, крамы, адміністрацыйныя будынкі.

Падчас паўторнага ўдару загінуў намеснік начальніка Галоўнага ўпраўлення Дзяржаўнай службы па надзвычайных сітуацыях Данецкай вобласці, яшчэ нямала паліцэйскіх і ратавальнікаў, якія першымі прыбылі на месца абстрэлу дапамагаць людзям, былі траўміраваны.

Па стане на раніцу аўторка вядома пра сем загінулых і 67 пацярпелых, інфармуе Міністэрства ўнутраных спраў.

«67 параненых, з іх 29 супрацоўнікаў паліцыі, сем ратавальнікаў і двое дзяцей. Аднаўляем разбор завалаў. Уначы былі вымушаны прыпыніць працы праз высокую пагрозу паўторных абстрэлаў», — гаворыцца ў паведамленні.

Расійцы атакавалі кіраванымі авіябомбамі Харкаўшчыну, у выніку чаго два чалавекі загінулі. Пасля акупанты зладзілі паўторную атаку — ужылі касетныя боепрыпасы, з-за чаго раненні атрымалі ратавальнікі і паліцэйскі.

«Расійцы абстралялі чатырма кіраванымі авіябомбамі сяло Круглякоўка, што ў Купянскім раёне. Трапілі па прыватных дамах. Паводле папярэдніх звестак, двое цывільных загінулі», — паведаміў у тэлеграме кіраўнік Офіса прэзідэнта Украіны Андрэй Ярмак, адзначыўшы, што цяпер вядома пра пяцярых параненых у выніку ўдару.

Пасля міністр унутраных спраў Украіны Ігар Кліменка заявіў, што расійцы атакавалі Купянскі раён яшчэ і касетнымі боепрыпасамі.

«У выніку ўдараў авіябомбамі загарэўся прыватны дом. Загінулі 45-гадовая жанчына і 65-гадовы мужчына. Яшчэ двое грамадзянскіх атрымалі траўмы. Калі на месца прыехалі праваахоўнікі і надзвычайнікі, праціўнік здзейсніў паўторны абстрэл касетнымі боепрыпасамі. Паранены два выратавальнікі і следчы паліцыі Харкаўшчыны», — напісаў Кліменка ў Тэлеграме.

530-ты дзень вайны. Страты Расіі ва Украіне перавысілі 250 тысяч чалавек, значную лепту ўнеслі самі расіяне

Раніцай 8 жніўня расійцы ўдарылі таксама па жылых кварталах Херсоншчыны: загінуў адзін чалавек, больш за дзесяць атрымалі раненні.

Як паведаміў кіраўнік Херсонскай абласной ваеннай адміністрацыі Аляксандр Пракудзін, за мінулыя суткі праціўнік здзейсніў 68 абстрэлаў, выпусціўшы па рэгіёне 342 снарады з мінамётаў, артылерыі, танкаў і БПЛА.

«Толькі па Херсоне вораг выпусціў 18 снарадаў. Расійскія вайскоўцы патрапілі ў жылыя кварталы населеных пунктаў вобласці. У Херсоне — у будынак «Пункта нязломнасці». Праз расійскую агрэсію адзін чалавек загінуў, 13 атрымалі раненні», — падкрэсліў Пракудзін.

Расійскія акупанты спрабавалі наступаць у раёнах трох населеных пунктаў на бахмуцкім кірунку, але іх спробы былі беспаспяховыя. Як паведамляе Генеральны штаб УСУ, за мінулыя суткі адбылося 37 баявых сутыкненняў.

«На бахмуцкім кірунку праціўнік вёў беспаспяховыя наступальныя дзеянні ў раёнах Андрэеўкі, Курдзюмаўкі і Дружбы Данецкай вобласці. Ад варожых артылерыйскіх абстрэлаў пацярпелі больш за дзесяць населеных пунктаў», — паведамілі ў Генштабе.

На аўдзееўскім кірунку ўкраінскія абаронцы паспяхова адбілі атакі расійскіх войскаў у раёне Аўдзееўкі, а на Мар'інскім кірунку сілы абароны працягваюць стрымліваць наступ захопнікаў у раёне Мар'інкі. Там жа вораг нанёс авіяцыйны ўдар.

«На Купянскім напрамку нашы воіны стойка трымаюць абарону. Паспяхова адбілі атакі праціўніка ў раёне Сінькоўкі, на поўнач ад Іванаўкі Харкаўскай вобласці і на поўдзень ад Навасёлаўскага Луганскай вобласці», — гаворыцца ў паведамленні.

У Генштабе дадалі, што на гэтым кірунку вораг нанёс авіяцыйныя ўдары ў раёнах Круглякоўкі і Кучараўкі Харкаўскай вобласці, а артылерыйскім і мінамётным абстрэлам праціўніка падвергліся больш за 15 населеных пунктаў.

На ліманскім кірунку артылерыйскім абстрэлам акупантаў падвергліся шэсць населеных пунктаў, а на шахцёрскім вораг нанёс авіяцыйны ўдар у раёне Атраднага Данецкай вобласці.

На запарожскім кірунку захопнікі рабілі беспаспяховыя спробы аднавіць страчанае становішча ў раёне Рабоціна Запарожскай вобласці. Яны нанеслі авіяцыйныя ўдары ў раёнах Гуляйполя, Малой Такмачкі і Арэхава, а артылерыйскім абстрэлам падвергліся больш за 15 населеных пунктаў.

На херсонскім кірунку праціўнік нанёс авіяцыйныя ўдары ў раёнах Зміеўкі, Тамарына і Атрадакаменкі Херсонскай вобласці. Артылерыйскім абстрэлам тут таксама падвергліся больш за 15 населеных пунктаў.

«У той жа час Сілы абароны Украіны працягваюць вядзенне наступальнай аперацыі на мелітопальскім і бярдзянскім напрамках, замацоўваюцца на дасягнутых рубяжах, ажыццяўляюць меры контрбатарэйнай барацьбы», — адзначылі ў Генштабе.

На северскім і слабажанскім напрамках акупанты здзейснілі мінамётныя і артылерыйскія абстрэлы больш за 30 населеных пунктаў.

Узброеныя сілы Украіны працягваюць весці абарончыя і наступальныя аперацыі. Пра гэта паведаміў галоўнакамандуючы УСУ Валерый Залужны падчас размовы са старшынёй Аб'яднанага камітэта начальнікаў штабоў ЗША генералам Маркам Мілі.

«Адносна абароны. Яна — стойкая. Нашы воіны для гэтага прыкладаюць максімум намаганняў. На шэрагу кірункаў праціўнік праводзіць актыўныя штурмавыя дзеянні, але поспеху не мае. У прыватнасці, гэта звязана са спробай адцягнуць украінскія сілы ад пэўных участкаў фронту», — паведаміў Залужны ў сваім тэлеграм-канале.

Каментуючы наступ, галоўнакамандуючы паведаміў, што працягваюцца цяжкія баі. «Украінскія войскі крок за крокам працягваюць ствараць умовы для прасоўвання наперад. Ініцыятыва на нашым баку», — дадаў ён.

Ён абмеркаваў з Мілі актуальныя патрэбы ўкраінскага войска ва ўзбраенні і боепрыпасах, а таксама падзякаваў партнёрам за дапамогу і падтрымку.