659-ты дзень вайны: асноўнае на гэты час

На вайне ва Украіне цяпер знаходзяцца 617 тысяч расійскіх салдат, паведаміў Пуцін падчас прамой лініі, і заявіў, што мэты вайны з Украінай застаюцца нязменныя.

Пуцін: Задачы «спецаперацыі» не мяняюцца

Пуцін зладзіў прамую лінію. І пакуль расійскі кіраўнік распавядае пра «поспехі ў СВА», так званай расійскай «ваеннай спецаперацыі», на экране з'яўляюцца «нязручныя пытанні», якія расійскі прэзідэнт ігнаруе. Таксама паблікі пішуць пра хакерскую атаку на сайт Крамля.

Пуцін заявіў на прамой лініі, што мэты і задачы вайны ва Украіне не змяніліся: «Мір будзе тады, калі мы дасягнем сваіх мэтаў, яны не мяняюцца — гэта дэнацыфікацыя, дэмілітарызацыя, нейтральны статус Украіны». Таксама ён заявіў, што «ў аснове сваёй рускія і ўкраінцы — адзін народ». Кіраўнік Крамя сцвярджае, што Расія нібыта «дзесяцігоддзямі старалася выбудаваць нармальныя стасункі з Украінай», а тое, што цяпер адбываецца ў стасунках з Украінай, «падобна на грамадзянскую вайну». Адэсу ён пры гэтым назваў «рускім горадам».

Са слоў Пуціна, у «зоне спецаперацыі» цяпер знаходзіцца 244 тысячы мабілізаваных, пры гэтым другой хвалі мабілізацыі не будзе, бо няма такой неабходнасці. Ён сцвярджае, што штодня ў добраахвотнікі запісваюцца 1,5 тысячы чалавек, а з пачатку года такім чынам набрана 486 тысяч чалавек.

• Мінабароны РФ заявіла, што ўначы сродкі СПА нібыта знішчылі і перахапілі дзевяць «украінскіх беспілотнікаў» над тэрыторыямі Калужскай і Маскоўскай абласцей.
• Расійскія паблікі таксама паведамляюць, што ўначы дроны атакавалі вайсковыя базы ў Алабіна і Падольску ў Падмаскоўі, а таксама Валадарскую нафтабазу. Усе беспілотнікі нібыта збілі. Украінскія СМІ пішуць са спасылкай на крыніцы, што гэта была спецаперацыя ГУР.

РФ узмацняе рэпрэсіі супраць украінцаў

МУС РФ абвясціла ў вышук кіраўніка ГУР Мінабароны Украіны Кірылу Буданава. У красавіку Маскоўскі суд завочна арыштаваў Буданава нібыта за «стварэнне тэрарыстычнай супольнасці» і «захоўванне зброі і выбухоўкі». Расійскія СМІ выказалі меркаванне, што гаворка ідзе пра выбух на Керчанскім мосце.

Расія напярэдадні прэзідэнцкіх выбараў узмацніла рэпрэсіі супраць украінцаў на акупаваных тэрыторыях, паведамляе ГУР Мінабароны Украіны. У прыватнасці, тым, хто не хоча атрымліваць расійскія пашпарты, адмаўляюць у прадастаўленні медыцынскай і сацыяльнай дапамогі, пазбаўляюць доступу да электраэнергіі і сістэмы водазабеспячэння.

Карна-рэпрэсіўныя групы праводзяць сістэматычныя ператрусы прыватных памяшканняў украінцаў на часова акупаваных тэрыторыях Запарожскай і Херсонскай абласцей. 

Акрамя таго, расіяне спрабуюць перакрыць усе магчымыя каналы сувязі і доступ да інфармацыі. Так, для атрымання дазволу і магчымасці карыстацца мабільным інтэрнэтам украінцы ў акупацыі павінны звярнуцца да падкантрольных расіянам правайдэраў. У гэтых кампаніях у тэлефоны людзей уводзяць невядомыя коды, што можа сведчыць аб схаванай усталёўцы шпіёнскіх праграм.

У «ЛНР» так званыя «выбары» прэзідэнта Расіі будуць доўжыцца тры тыдні

Пра гэта паведаміў кіраўнік Луганскай вобласці Арцём Лысагор. Так, датэрміновае «галасаванне» працягнецца з 25 лютага па 14 сакавіка, а на працягу 15-17 сакавіка можна будзе «прагаласаваць» дыстанцыйна, прыняўшы ўдзел у электронным «волевыяўленні».

«У гарадах і вёсках акупаванай Луганшчыны, дзе паўтара года няма інтэрнэту, гэта будзе зрабіць складана, але людзі справяцца, калі ім загадаюць. У адваротным выпадку прыйдуць да іх дадому, таму што дазволена форма пакватэрнага абыходу для галасавання», — дадаў Лысагор.

Акрамя таго, пашыраны пералік дакументаў для ўдзелу ў выбарах. У прыватнасці, можна аддаць голас, не маючы пашпарта РФ, а прад'явіўшы замяняе яго дакумент. Напрыклад, у рэкамендаваны пералік дакументаў для галасавання, размешчаным на сайце ЦВК РФ, уключаны пашпарт грамадзяніна СССР узору 1974 года.

Украіна ўначы збіла 41 з 42 запушчаных РФ беспілотнікаў

Навіны вайны

Супрацьпаветраная абарона Украіны ўвечары і ўначы знішчыла 41 з 42 ударных БПЛА Shahed-136/131, якімі Расія атакавала з трох кірункаў: Балаклава, Чауда ў Крыме і Прыморск-Ахтарск. Асноўны напрамак удару — Адэская вобласць. Акрамя таго, ноччу войска РФ выпусціла шэсць зенітных кіраваных ракет С-300 з акупаваных тэрыторый Херсонскай вобласці ў напрамку Мікалаеўскай і Херсонскай абласцей.

• У Адэсе ў выніку падзення абломкаў збітых дронаў пашкоджаны інтэрнат, пацярпелі 11 чалавек, з іх трое дзяцей, паведаміў кіраўнік АВА Алег Кіпер. Акрамя інтэрната, пашкоджана яшчэ 11 будынкаў. 
• Пасля атакі Адэсы расіяне запусцілі больш за 20 ударных дронаў па прыпартовай інфраструктуры ў Ізмаільскім раёне. Пашкоджаныя складскія памяшканні, людзі не пацярпелі.
• Позна ўвечары 13 снежня расіяне ўдарылі ракетай С-300 па вёсцы Міралюбаўка Херсонскага раёна — адзін чалавек загінуў, звесткі пра іншых пацярпелых удакладняюцца, паведаміла пракуратура. Пашкоджаны прыватныя дамы, навучальная ўстанова, часткова разбураны будынак мясцовай амбулаторыі. Паводле дадзеных АВА, за папярэднія суткі ў вобласці ад расійскіх абстрэлаў адзін чалавек загінуў, яшчэ адзін атрымаў раненні.
• Камандуючы Аб'яднанымі сіламі УСУ Сяргей Наеў наведаў памежныя раёны Чарнігаўскай вобласці і паказаў, як на найбольш небяспечных напрамках абсталююцца рубяжы і пазіцыі першай і другой паласы абароны. «Калі пагроза будзе расці, на падрыхтаваныя рубяжы прыбудуць дадатковыя сілы і мы будзем гатовыя адэкватна рэагаваць на любое развіццё сітуацыі», — дадаў Наеў. На відэа, у прыватнасці, відаць, як усталёўваюць «зубы дракона». Гэта робіцца ў тым ліку на мяжы з Беларуссю.

Украінскі Генштаб агучыў арыенціровачныя страты РФ паводле стану на раніцу 14 снежня: асабовага складу — каля 342 800 (+1300 за мінулыя суткі) чалавек, танкаў — 5692 (+10), баявых браніраваных машын — 10 616 (+22), артылерыйскіх сістэм — 8088 (+12).

За мінулыя суткі на фронце адбылося 120 баявых сутыкненняў, паведаміў украінскі Генштаб у ранішняй зводцы. У прыватнасці, на Аўдзееўскім кірунку Сілы абароны Украіны адбілі 29 нападаў на ўсход ад Навабахмутаўкі, Стэпавага, Аўдзееўкі і яшчэ 28 атак — на поўдзень ад Паўночнага, Першамайскага і Невельскага Данецкай вобласці. 

На Купянскім кірунку УСУ адбілі 21 атаку РФ у раёне Сінькоўкі і яшчэ дзве атакі на ўсход ад Петрапаўлаўкі Харкаўскай вобласці, на Мар'інскім — 19 атак у раёнах Новаміхайлаўкі і Краснагораўкі Данецкай вобласці.

Акрамя таго, на Ліманскім кірунку ўкраінскія сілы адбілі атакі РФ ў раёне Серабранскага лясніцтва Луганскай вобласці і на ўсход ад Тэрнаў Данецкай вобласці; на Бахмуцкім — каля Іваноўскага, Андрэеўкі і Кляшчэеўкі Данецкай вобласці; на Запарожскім — паблізу Рабоціна і на захад ад Вербавай Запарожскай вобласці.

Навіны замежных партнёраў Украіны

• Орбан перад самітам ЕС, які адбудзецца 14-15 снежня, зноў выступіў супраць пачатку перамоваў аб уступленні Украіны ў Еўрасаюз: «Мы вызначылі сем умоў, якія суправаджалі статус кандыдата Украіны. І паводле ацэнкі Еўракамісіі, тры з сямі не выкананыя. Няма прычын што-небудзь абмяркоўваць, ёсць сэнс да гэтага вярнуцца, калі Украіна выканае ўсё».
• Прэзідэнт Еўрасавета Шарль Мішэль, прэзідэнт Францыі Эмануэль Макрон і канцлер Гермаіі Олаф Шольц збяруцца на працоўны сняданак з прэм'ерам Венгрыі Віктарам Орбанам, каб зноў паспрабаваць пераканаць яго змяніць сваё меркаванне аб пастановах аб Украіне, піша Politico са спасылкай на крыніцы.
• Трэці за час вайны візіт Зяленскага ў Вашынгтон быў закліканы дамагчыся ад Кангрэса вылучэння новага пакета вайсковай дапамогі. Пасля сустрэчы з украінскім прэзідэнтам Байдэн заявіў, што ягоная адміністрацыя працягне дапамогу Кіеву, але папярэдзіў, што магчымасці вычэрпваюцца праз адсутнасць ухваленага Кангрэсам дадатковага фінансавання. І, падобна, сёлета Кангрэс ужо нічога ўхваляць не будзе.
• NATO павялічыў свой грамадзянскі і вайсковы бюджэт на 2024 год на 18,2% і 12% — да 438,1 мільёнаў еўраў і 2,03 мільярда еўраў адпаведна.
  
• Сенат ЗША таксама прыняў абаронны бюджэт краіны на 2024 фінансавы год на рэкордную суму 886 мільярдаў долараў, паведамляе Reuters. Законапраект быў прыняты пры значнай падтрымцы як дэмакратаў, так і рэспубліканцаў. У дакуменце, акрамя іншага, гаворыцца аб стварэнні офіса спецыяльнага генеральнага інспектара дапамогі Украіне. Закон таксама пашырыць на 2024 год паўнамоцтвы прэзідэнта ЗША прадастаўляць або здаваць у арэнду абаронныя вырабы Украіне і іншым краінам Усходняй Еўропы, пацярпелым ад ўварвання Расіі ва Украіну.
• Тым часам спікер Палаты прадстаўнікоў рэспубліканец Майк Джонсан адмовіўся падтрымаць заклік лідара дэмакратаў у Сенаце, каб працягнуць на тыдзень працу абедзвюх палат для прыняцця дадатковага фінансавання, у прыватнасці для Украіны. У Белым доме назвалі гэта адмовай ад крокаў, жыццёва важных для нацыянальнай бяспекі ЗША. «Як вы чулі ўчора ад прэзідэнта, амерыканскі народ не адвернецца ад Украіны і яе барацьбы за свабоду супраць тыраніі. Але спікер Джонсан сказаў, што Палата прадстаўнікоў завершыць сваю працу заўтра без узгаднення пытанняў мяжы, без фінансавання Ізраіля, без фінансавання неадкладных патрэбаў для Украіны... Свет назірае за дзеяннямі рэспубліканцаў у Кангрэсе. Масква, Пекін і Тэгеран — усе яны глядзяць. Рэспубліканцы з Палаты прадстаўнікоў не павінны вяртацца дадому на святы, калі трэба зрабіць жыццёва важныя крокі для бяспекі Злучаных Штатаў і свету», — заявіла спікер Белага дома Карын Жан-П'ер.
• Еўрапейскі саюз, імаверна, ухваліць перагляд бюджэту да 2027 года, які прадугледжвае 50 мільярдаў еўраў для Украіны. 
• Венгрыя павінна пагадзіцца на рашэнне аб пераглядзе бюджэту, паколькі яно тычыцца і яе ўласных інтарэсаў, заявіў еўракамісар па бюджэце Ёханэс Хан. «Гэты пакет не толькі для Украіны, у ім ёсць сёе-тое для міграцыі, абароны межаў, падтрымкі такіх краін, як Турцыя, якія цяпер з'яўляюцца добрымі сябрамі Венгрыі і наадварот, каб атрымаць дадатковыя фінансавыя сродкі», — растлумачыў еўракамісар.

Паводле korrespondent.net, ВВС, www.unian.ua