841-ы дзень вайны: У судзе ў Гаазе — справа пра наўмысны голад у Марыупалі, што зладзіла РФ

Як можна знішчыць расійскія сістэмы супрацьпаветранай абароны і чаму гэта можа быць звязана з падрыхтоўкай да выкарыстання заходніх знішчальнікаў F-16?

Расія зладзіла наўмысны голад у Марыупалі

Расія ўжыла наўмысную тактыку голаду падчас 85-дзённай аблогі Марыупаля вясной 2022 года, што прыраўноўваецца да ваеннага злачынства. 

Пра гэта піша The Guardian са спасылкай на дасье, падрыхтаванае юрыстамі Global Rights Compliance сумесна з урадам Украіны і перададзенае ў Міжнародны крымінальны суд у Гаазе. 

У дакуменце падкрэсліваецца, што расійскія ўлады і вайскоўцы мелі намер забіць і нанесці шкоду як мага большай колькасці мірных жыхароў Марыупаля, пакідаючы іх без вады, газу і электрычнасці пры тэмпературы ніжэй за мінус 10°C. 

Паводле іншых ацэнак, падчас аблогі і захопу Марыупаля расійскай арміяй загінулі як мінімум 22 тысячы чалавек. У горадзе былі пашкоджаныя або разбураныя каля 90% медыцынскіх устаноў і жылых дамоў. 

Партнёр Global Rights Compliance Катрыёна Мердак распавяла журналістам, што расійская аблога Марыупаля складалася з чатырох этапаў: гэта атакі на грамадзянскую інфраструктуру, адключэнне электраэнэргіі, ацяплення і вады, адмова ў гуманітарных калідорах і дастаўцы дапамогі. 

«На трэцім этапе аб’ектам нападу была астатняя крытычна важная інфраструктура, грамадзянскае насельніцтва тэрарызавалі бамбаваннямі гуманітарнай дапамогі і пастаўкамі вады. Нарэшце, на чацвёртым этапе Расія распачала стратэгічныя атакі з мэтай знішчыць або захапіць аб’екты інфраструктуры, якія засталіся», — распавяла яна.

У Кіеўскай вобласці суткі тушаць прадпрыемства, якое загарэлася з-за атакі РФ

Працягваецца ліквідацыя пажару на прадпрыемстве ў Кіеўскай вобласці, які адбыўся прыкладна ў той жа час 12 чэрвеня ў выніку ракетна-беспілотнага абстрэлу Украіны з боку РФ. Пра гэта паведамляе РБК-Украіна са спасылкай на Дзяржслужбу па надзвычайных сітуацыях.

На месцы працуюць 249 ратаўнікоў, 98 адзінак тэхнікі, чатыры пажарныя машыны.

Нагадаем, у ноч на 12 чэрвеня РФ атакавала тэрыторыю Украіны ўдарнымі беспілотнікамі і крылатымі ракетамі.

У Кіеўскай вобласці, паводле інфармацыі Кіеўскай абласной ваеннай адміністрацыі, з-за падзення абломкаў пачаўся пажар на прамысловым прадпрыемстве. Пра тое, абломкі якога менавіта аб’екта гэта былі, не ўдакладняецца. У самым пачатку тушэння пажару было задзейнічана больш за 105 чалавек і 30 адзінак тэхнікі.

Канада адправіць ва Украіну больш за 2000 ракетных рухавікоў CRV7

Канада адправіць ва Украіну больш за 2000 ракетных рухавікоў CRV7. Таксама краіна будзе пастаўляць патроны да стралковай зброі і сістэмы дыстанцыйнага кіравання. Пра гэта паведамляе РБК-Украіна са спасылкай на Yahoo.

Першую партыю з больш чым 2000 ракетных рухавікоў CRV7, якія раней былі знятыя з узбраення, Канада адправіць украінскім войскам ужо хутка. Пра гэта паведаміла міністэрства абароны Канады.

Раней урад Канады заяўляў, што мае намер пачаць пастаўкі рухавікоў у бліжэйшыя тыдні. Вядома, што ў Канадзе больш за 83 тысяч такіх ракетных рухавікоў, якія ўжо не выкарыстоўваюцца.

Міністр абароны Канады Біл Блэр падчас сустрэчы кантактнай групы па абароне Украіны ў фармаце Rammstein заявіў, што яго краіна таксама прадаставіць 29 дыстанцыйных сістэм ўзбраення Nanuk і больш за 130 тысяч патронаў да стралковай зброі.

CRV7 — гэта 70-мм некіравальная авіяцыйная ракета канадскай распрацоўкі са складаным хваставым апярэннем. Ён прызначаны для нанясення удараў па наземных цэлях. Гэтыя ракеты таксама лічацца зброяй часоў халоднай вайны, так як былі створаны яшчэ ў 1980-я гады.

Ракетныя рухавікі CRV7 могуць выкарыстоўвацца для ўзбраення верталётаў, якія маюцца ва УСУ. Таксама спецыялізаваныя выданні адзначаюць, што наземныя пускавыя ўстаноўкі могуць вырабляцца з CRV7.

Дапамога з Канады:

• Нагадаем, Канада падтрымлівае Украіну, прадаставіла зброю, фінансавую і гуманітарную дапамогу. Да падрыхтоўкі ўкраінскіх вайскоўцаў далучылася і Канада.
• Паведамлялася, што Канада накіруе ва Украіну чатыры баявыя браніраваныя машыны для эвакуацыі параненых. Украінскае войска атрымае 50 такіх машын.

Паляванне на С-300/С-400. Чаму Украіна ўсё часцей б’е па расійскіх СПА і навошта гэта F-16?

Украінскія войскі ўсё часцей наносяць удары па расійскіх сістэмах С-300 і С-400. Прычым у апошні час не абмяжоўваюцца сістэмамі на акупаваных тэрыторыях, але знішчаюць іх і ў самой РФ, піша РБК-Украіна. Як Расія выкарыстоўвае С-300/С-400 на вайне?

Зенітна-ракетны комплекс С-300 створаны для прыкрыцця важных аб’ектаў і барацьбы з самалётамі стратэгічнай і тактычнай авіяцыі, крылатымі і балістычнымі ракетамі. У залежнасці ад тыпу ракеты-перахопніка далёкасць дасягае 300 км. Больш сучасныя С-400, верагодна, могуць збіваць цэлі на большай вышыні і на адлегласці да 380 км.

С-300 была распрацавана, каб мець магчымасць паражаць наземныя мэты, і яе пераемнік С-400 атрымаў у спадчыну гэтую асаблівасць. Мяркуецца, што далёкасць можа складаць да 120 і 230 км адпаведна.

Поўнамаштабнае ўварванне РФ ва Украіну стала першай у гісторыі вайной, дзе па такім сцэнары масава ўжываліся зенітныя ракеты. Для гэтага расіяне іх мадыфікавалі: замест паўактыўнай галоўкі саманавядзення ўсталявалі адмысловы спадарожнікавы прыёмнік, каб ракета магла кіраваццца і ляцець па каардынатах.

Паколькі траекторыя балістычная, ракеты С-300 падаюць на вялікай хуткасці. Ад запуску да паражэння праходзяць хвіліны. Яны могуць быць збітыя такімі сістэмамі, як Patriot і SAMP/T. Праблема ў тым, што ў РФ тысячы ракет, і наўрад ці супрацьпаветраная абарона Украіны зможа масава збіваць такія цэлі.

У рэжыме «зямля-зямля» С-300 адносна дакладная на дыстанцыі да 40 км. Таму Расія наносіць удары па прыфрантавых гарадах. Напрыклад, рэгулярна абстрэльвалі Запарожжа, Канстанцінаўку, Славянск, Краматорск і навакольныя населеныя пункты. Цягам двух гадоў і да апошняга часу Харкаў асабліва пакутаваў ад ракетных абстрэлаў.

Што тычыцца новых С-400, то калі і былі падобныя выпадкі, то толькі як выключэнне. Яшчэ летась у ВПС Украіны казалі, што комплексы «Трыумф» ахоўваюць паветраную прастору ў прыярытэтным парадку.

Але апошнія навіны даюць надзею, што колькасць атак на ўкраінскія гарады зменшыцца. За апошні месяц адкрыўся ўкраінскі «сезон палявання» на расійскія ракетныя сістэмы, прычым не толькі на акупаванай украінскай тэрыторыі.

Чаму Украіна б’е па расійскіх сістэмах СПА?

Аналітыкі Інстытута вывучэння вайны (ISW) называюць удары па расійскіх СПА кампаніяй па паслабленні супрацьпаветранай абароны. Што ў выпадку поспеху дазволіць Украіне больш эфектыўна выкарыстоўваць пілатуемую авіяцыю. У прыватнасці, знішчэнне сістэмаў у Белгарадзкай вобласці вымусіла расіян перакінуць супрацьпаветраную абарону з Крыму.

Яны адзначаюць, што С-300/С-400 з’яўляецца тым бар’ерам, які абмяжоўвае магчымасці Украіны выкарыстоўваць авіяцыю паблізу фронту. І пры гэтым падтрымлівае наступальныя дзеянні РФ.

Навіны вайны

Расіяне абстралялі мястэчка Стары Салтаў Чугуевского раёна Харкаўскай вобласці, пацярпелі тры чалавекі, паведаміў кіраўнік АВА Алег Синягубаў. Яшчэ два чалавекі параненыя ў выніку абстрэлу вёскі Курылаўка Купянскага раёна.

У выніку ўчорашняга ракетнага ўдару па Крывым Рогу загінулі дзевяць чалавек, 32 параненыя, з іх пяцёра — дзеці. Аварыйна-выратавальная аперацыя завершаная, паведаміў кіраўнік гарадской ваеннай адміністрацыі Аляксандр Вілкул. Паводле папярэдняй інфармацыі, РФ ударыла па жылым квартале горада балістычнай ракетай Іскандэр-М з Крыма. Пашкоджаны 41 шматкватэрны дом, адна гімназія, два вучылішчы. У пятніцу, 14 чэрвеня, у Крывым Рогу будзе абвешчаны дзень жалобы.

• Украінскі Генштаб агучыў прыкладныя страты РФ паводле стану на раніцу 13 чэрвеня: асабовага складу — каля 522 810 (+980 за мінулыя суткі) чалавек, танкаў — 7928 (+17), баявых браніраваных машын — 15 208 (+21), артылерыйскіх сістэм — 13 770 (+34), БПЛА аператыўна-тактычнага ўзроўню — 11 075 (+33), крылатых ракет — 2285 (+5), аўтамабільнай тэхнікі і аўтацыстэрнаў — 18 794 (+58), спецыяльнай тэхнікі — 2294 (+4).
• NATO не лічыць прымяненне Украінай Заходняй зброі, у тым ліку F-16, на тэрыторыі РФ эскалацыяй, заявіў генеральны сакратар арганізацыі Енс Столтэнберг.
• Расія летась закупіла 90% чыпаў з Кітая, што дазваляе ёй працягваць вайну ва Украіне, заявіў кіраўнік NATO Енс Столтэнберг: «Мы бачым, як Кітай цяпер адыгрывае ключавую ролю ў забеспячэнні або падтрымцы вайны Расіі ва Украіне. 90% мікраэлектронікі, якую Расія імпартавала летась, паступіла з Кітая. Гэтыя прадметы, электроннае абсталяванне, з’яўляюцца ключавымі для вытворчасці ракет, бомбаў і баявых танкаў, якія ўжываюцца ў агрэсіўнай вайне Расіі супраць Украіны».
• Дарадца прэзідэнта ЗША Джэйк Саліван заявіў, што ў Белага дома ёсць новыя дакладныя паведамленні аб тым, што расійскія ўлады размяшчаюць выкрадзеных украінскіх дзяцей на расійскіх сайтах усынаўлення.
• Канада адпраўляе Украіне першыя чатыры браняваныя аўтамабілі медыцынскай эвакуацыі з абяцаных 50, паведаміла Мінабароны краіны. Гэтыя бронетранспарцёры абсталяваныя абсталяваннем, якое дазволіць «аказваць медыцынскую дапамогу пры розных раненнях», дадалі ў ведамстве.
• У цэнтры ўвагі 23-й сустрэчы ў фармаце Рамштайн, якая адбудзецца 13 чэрвеня ў Бруселі, будзе абмеркаванне магчымасцяў для ўзмацнення супрацьпаветранай абароны Украіны, у тым ліку ўстаноўкамі Patriot і іншымі сістэмамі, паведаміла намесніца спікера Пентагона Сабрына Сінгх. Яна таксама адзначыла, што кіраўнік Пентагона Лойд Осцін разам з кіраўніком Аб’яднанага камітэта начальнікаў штабоў ЗША Чарльзам Браўнам вылецеў у Брусэль для ўдзелу ў сустрэчы кантактнай групы. Там ён таксама возьме ўдзел у сустрэчы міністраў абароны краін NATO ў пятніцу, 14 чэрвеня.