Брусель нагадаў Орбану, што ён не мае права прамаўляць пра Украіну ад імя ЕС

У аўторак 63 дэпутаты Еўрапарламента заклікалі пазбавіць Венгрыю права голасу ў ЕС. Яны лічаць, што прэм'ер-міністр краіны Віктар Орбан злоўжывае пазіцыяй краіны, якая часова старшынствуе ў Еўрапейскай радзе, і тым самым прычыніў шкоду інтарэсам Еўрасаюза.

Прэм'ер-міністр Венгрыі Віктар Орбан сваёй спробай узяць на сябе ролю ініцыятара мірных перамоў па Украіне, выступаючы пры гэтым са зручных Маскве пазіцый, дабіўся таго, што Еўракамісія, паводле звестак прэсы, папрасіла еўракамісараў не ездзіць у Венгрыю на нефармальныя сходы, а старшыня Еўрапейскай рады ў лісце Орбану нагадаў, што ён не мае права выступаць ад імя ЕС.

«Краіна, якая старшынствуе ў Еўрапейскай радзе ў парадку ратацыі, не мае паўнамоцтваў прадстаўляць Еўрапейскі Саюз на міжнароднай арэне і не атрымлівала ад Еўрапейскай рады мандата на перамовы ад імя саюза», — гаворыцца ў лісце старшыні Рады Шарля Мішэля Віктару Орбану. З тэкстам ліста азнаёмілася агенцтва Reuters, перадае Бі-бі-сі.

Венгрыя з 1 ліпеня на паўгода стала краінай, якая старшынствуе ў Еўрапейскай радзе, і Віктар Орбан на наступны ж дзень адправіўся з нечаканым візітам у Кіеў, дзе сустрэўся з прэзідэнтам Украіны Уладзімірам Зяленскім, а затым паехаў у Маскву, Пекін і ў ЗША, на сустрэчу з кандыдатам у прэзідэнты Дональдам Трампам.

Кіраўніцтва ЕС па ходзе гэтых візітаў ужо заяўляла, што Орбан, хоць і з'яўляецца кіраўніком краіны, якая часова старшынствуе ў ЕС, усё ж не мае паўнамоцтваў прадстаўляць саюз у кантактах з іншымі краінамі.

Орбан пры гэтым выступае з пазіцый, якія кардынальна разыходзяцца з пазіцыяй пераважнай большасці краін ЕС. Ён даўно варагуе з Украінай, абвінавачваючы яе ў дыскрымінацыі карэннай венгерскай меншасці ў Закарпацці, а з моманту, калі Расія развязала вялікую вайну, адмовіўся аказваць Украіне ваенную дапамогу, спрабаваў сабатаваць увядзенне санкцый супраць Расіі і прыняцце рашэнняў аб дапамозе Украіне на ўзроўні ЕС, а таксама абвінавачвае Еўрасаюз і ўсіх саюзнікаў Украіны, што яны, аказваючы гэтую дапамогу, толькі зацягваюць кровапраліцце.

Шарль Мішэль у сваім лісце ў чарговы раз адмёў гэтыя абвінавачанні Орбана.

«Роўна наадварот: Расія – агрэсар, а Украіна – ахвяра, якая карыстаецца законным правам на самаабарону», – цытуе Reuters ліст Мішэля.

У апошнія дні Брусель і асобныя краіны ЕС перайшлі ад слоў да практычных, хаця і даволі сімвалічных крокаў.

У панядзелак міжнароднае выданне Politico паведаміла са спасылкай на трох ананімных чыноўнікаў ЕС, што Еўракамісія папрасіла еўракамісараў не ездзіць на нефармальныя міністэрскія сустрэчы, якія Венгрыя праводзіць у сябе як краіна-старшыня.

Замест сябраў «урада Еўразвяза» на сустрэчы ў Венгрыі будуць ездзіць чыноўнікі рангам ніжэй, і гэта, як сказаў Politico адзін з суразмоўцаў, павінна прадэманстраваць Орбану, што яго спробы злоўжываць старшынствам у ЕС непрымальныя для Бруселя і іншых краін саюза.

Байкатаваць Венгрыю, па звестках Politico, маюць намер і чальцы Еўрапейскай рады — міністры краін саюза.

«Напрыклад, міністры замежных спраў саюза маюць намер у жніўні праігнараваць арганізаванае прэм'ер-міністрам Віктарам Орбанам мерапрыемства ў Будапешце, сабраўшыся на свой уласны саміт міністраў замежных спраў», – піша Politico.

У аўторак 63 дэпутаты Еўрапарламента заклікалі пазбавіць Венгрыю права голасу ў ЕС. Яны лічаць, што прэм'ер-міністр краіны Віктар Орбан злоўжывае пазіцыяй краіны, якая часова старшынствуе ў Еўрапейскай радзе, і тым самым прычыніў шкоду інтарэсам Еўрасаюза.

Гэта, зрэшты, сімвалічны заклік: працэдура пазбаўлення краіны голасу занадта складаная, каб быць прымененай на практыцы, тым больш з такой нагоды.

І ліст Шарля Мішэля, і заява еўрадэпутатаў была рэакцыяй на ліст Орбана, які той разаслаў лідэрам краін ЕС.

У лісце, напісаным па выніках сустрэч у Кіеве, Маскве, Пекіне і ў рэзідэнцыі Трампа ў Фларыдзе, венгерскі прэм'ер, у прыватнасці, паведаміў, што Трамп у выпадку перамогі на выбарах у пачатку лістапада неадкладна запатрабуе ад Кіева пачаць мірныя перамовы, прыгразіўшы спыненнем дапамогі.

Таму, як піша вугорскі прэм'ер, Еўрасаюз, прадбачачы змены ў палітыцы ЗША, павінен альбо прыняць неабходнасць неадкладных перамоваў паміж Расіяй і Украінай, альбо ўзяць на сябе вялікую долю ў фінансаванні абароны Украіны.