«Не караць, а абараняць». 23-гадовая паліцэйская ахоўвае дзяцей ва ўкраінскай школе ля беларускай мяжы

Па новым загадзе Міністэрства навукі і адукацыі Украіны ва ўсіх школах, набліжаных да Беларусі, будуць дзяжурыць афіцэры службы адукацыйнай бяспекі. Такі крок стане дадатковай мерай, што дапаможа маленькім украінцам адчуваць адносны спакой і абароненасць ад магчымых крывавых тэрактаў з боку рэжыму Лукашэнкі ды расійскіх наймітаў, што перабываюць на тэрыторыі нашай краіны.

Новая пасада патрабуе як высокіх навыкаў работы з дзецьмі, так і ўпэўненых скілоў па аказанні першай медыцынскай дапамогі, вайсковай справе і дзеянняў падчас абстрэлаў. Таму пакуль ідзе адбор прафесіяналаў, на службу ва ўстановы адукацыі Чарнігаўскай, Сумской, Жытомірскай, Ровенскай і Валынскай абласцей часова выйшлі мясцовыя афіцэры паліцыі. 23-гадовая Юлія Насуліч, адна з першых паліцэйскіх, хто выконвае гэтыя абавязкі, распавяла сваю гісторыю «12 Каналу».

Юлія — афіцэрка па Ратнаўскім раёне на ўкраінскай Валыні. Ужо два тыдні дзяўчына нясе службу ў мясцовай сярэдняй школе ў сяле Гута, што размешчана ў двух кіламетрах ад кардону з Беларуссю.

«Гэты лес — ужо ёсць тэрыторыі Беларусі», — паказвае афіцэрка з трэцяга паверха будынка на гай, што знаходзяцца зусім побач. Далей, у васьмі кіламетрах, цяпер недасягальны Хаціслаў Маларыцкага раёна, а яшчэ праз дзесяць і сама Маларыта.

Сельскую школу штодзень наведваюць каля 300 вучняў, за якімі дзяўчына павінна трымаць вока ды вока. Сярод абавязкаў, якімі ў першую чаргу займаецца Юлія, паліцэйская вылучае забеспячэнне прапускнога рэжыму, у выпадку ракетнай трывогі — суправаджэнне дзетак да сховішчаў у падвалах школы, спыненне правапарушэнняў ды прафілактычныя размовы з вучнямі. Юлія адзначае, што як толькі пачынала працу ва ўстанове адукацыі, дзеці ставіліся да яе з асцярожнасцю. На то ёсць дзве прычыны. Першая — гэта яшчэ савецкі прататып паліцэйскага ў абліччы строгага дзядзькі, мэта якога — выключна караць. А другая заключаецца ў агульным стэрэатыпе, характэрным для большасці постсавецкіх дзяржаў, што ўсе супрацоўнікі паліцыі злыя ды карумпаваныя.

Папярэдні слайдНаступны слайд

Першы час дзеці думалі, маўляў, «палісмэнка будзе караць за дрэнныя ўчынкі», але дзяўчыне ўдалося хутка змяніць сітуацыю. Цяпер вучні не толькі звяртаюцца да яе з пытаннямі ці па дапамогу, але і разам гарна бавяць час на перапынках.

«Дзеці, асабліва малодшыя класы, ім дужа падабаецца, яны кожны перапынак ля мяне стаяць нібыта, я б сказала, сябры», — кажа Юлія.

На адной толькі Валыні да праекта абароны школ далучыліся ўжо 47 устаноў адукацыі, што, безумоўна, нясе выключна пазітыўныя змены: дзеці становяцца больш дысцыплінаванымі, паводзяць сябе спакайней, лепей засвойваюць і выконваюць правілы бяспекі. Да таго ж, самавітыя паліцэйскія становяцца для іх аўтарытэтам, таму да іх парад і заўваг вучні прыслухоўваюцца больш эфектыўна. Ды і агулам, спакайней у школах становіцца не толькі дзецям, але і супрацоўнікам, бо, як ніяк, побач навучаны чалавек са зброяй. 

Падчас падрыхтоўкі паліцэйскіх на часовую пасаду афіцэра службы адукацыйнай бяспекі спецыялісты надаюць асаблівую ўвагу псіхалагічным аспектам работы з дзецьмі. Цяпер да конкурсу могуць далучыцца грамадзянскія асобы — звычайныя местачкоўцы, якіх таксама навучаць усім неабходным дзеянням у надзвычайных сітуацыях і выдадуць зброю.

У студзені ахоўнікі з'явіліся і ў 20 навучальных установах Жытоміршчыны — перш за ўсе, у памежных з Беларуссю населеных пунктах Славечна, Народычы, Оўруч, Олеўск ды Гладкавічы. Яны знаходзяцца насупраць Нараўлянскага раёна, адкуль у лютым 2022 года заходзілі калоны расійскай акупацыйнай тэхнікі па напрамку Барадзянкі, Бучы ды Ірпеня.

Агулам, сёлета афіцэрамі павінны забяспечыць 150 устаноў адукацыі на адной толькі Жытоміршчыне. Акрамя таго, у школах будуць усталяваны спецыяльныя рамкі і металашукальнікі, а таксама кнопкі для хуткай сувязі з МНС, выклікам міліцыі і асабістым рэагаваннем на правапарушэнні і падазроныя сітуацыі. Нацыянальная паліцыя апытала больш за 300 тысяч рэспандэнтаў з усіх рэгіёнаў Украіны, у асноўным настаўнікаў і бацькоў вучняў. Больш за 70% удзельнікаў анкетавання станоўча ацанілі актуальнасць і мэтазгоднасць работы такога міліцыянера па ахове ва ўстановах адукацыі.

На гэтым тыдні таксама стала вядома, што на ўмацаванне мяжы з Беларуссю ў Ровенскай вобласці выдаткуюць больш за 900 мільёнаў грыўняў (≈ 2,4 мільёны еўра). Гэтую суму і яшчэ 50 мільёнаў (≈ 1,2 мільёны еўра) з абласнога бюджэту накіруюць на абарону кардону. У мінулым годзе для патрэб тэраабароны мясцовыя ўлады праводзілі закупку блокаў, тэтраэдраў, габіёнаў ды абсталявання для ўладкавання супрацьтокавых равоў. Цяпер, калі найбольш крытычныя ўчасткі ўмацаваныя і знаходзяцца ў адноснай бяспецы, памежнікі разам з тэрытарыяльнай абаронай і валанцёрамі займаюцца дадатковым удасканаленнем збудаванняў на іншых адрэзках мяжы.