Украіна выплаціць $100 тысяч за перадачу ваеннага злачынцы Гіркіна
Галоўнае ўпраўленне выведкі Міністэрства абароны Украіны заявіла пра намер выплаціць 100 тысяч долараў за перадачу расійскага ваеннага злачынцы Ігара Гіркіна ва ўкраінскі палон.
«Галоўнае ўпраўленне выведкі Міністэрства абароны Украіны гарантуе выплату $100 000 за перадачу Ігара Гіркіна (Стралкова) ва ўкраінскі палон», — гаворыцца ў паведамленні.
Адзначаецца таксама, што Гіркін вырашыў аднавіць свой удзел у вайне супраць Украіны.
«Ігар Гіркін (Стралкоў) — расійскі тэрарыст, былы так
званы «міністр абароны ДНР». Цяпер СБУ і Генеральная пракуратура
распачалі супраць Гіркіна шэраг спраў за тэрарыстычную дзейнасць, катаванні,
забойствы і парушэнні дзяржаўнага суверэнітэту», — гаворыцца ў
паведамленні.
Таксама нагадваецца, што Гіркін абвешчаны Нідэрландамі ў
міжнародны вышук па справе аб збіцці грамадзянскага Boeing 777 рэйса MH17.
Акрамя таго, у выведцы адзначаюць, што ніводзін ваенны
злачынца не пазбегне пакарання.
Ігар Стралкоў-Гіркін — «экс-міністр абароны ДНР»,
які мае дачыненне да збіцця пасажырскага Boeing 777 у 2014 годзе. Баявік
публічна заяўляў, што пазбаўлены магчымасці патрапіць на фронт. Ён актыўна
крытыкаваў Мінабароны РФ і сабраў вялікую аўдыторыю ў сваім тэлеграм-канале.
Улетку паведамлялася, што ён паспрабаваў уехаць у Херсонскую вобласць па
падробных дакументах, але яго затрымала расійская паліцыя.
Нядаўна Гіркін назваў выбух на Крымскім мосце
найлепшым «віншаваннем» Пуціна з 70-годдзем.
Ён напісаў, што «паважаныя кіеўскія партнёры зрабілі
святочны "феерверк"».
На думку Гіркіна, у Расіі можа пачацца рэвалюцыя, у ходзе
якой заб'юць Пуціна.
Ён адкрыта крытыкаваў рэжым Пуціна і бясталентнае камандаванне ВС РФ за паразы на фронце.
Паводле unian.net.