Як украінцы ставяцца да беларусаў. Вынікі апытання паказваюць радыкальную змену

За час вайны істотна пагоршылася стаўленне ўкраінцаў не толькі да Беларусі як краіны, не толькі да Лукашэнкі, але і да жыхароў Беларусі, да народу, піша ў сваім блогу на сайце амерыканскага «экстрэмісцкага» ў Беларусі радыё Юры Дракахруст. Гэта паказваюць вынікі даследавання, якое напрыканцы красавіка сёлета правяла ўкраінская сацыялагічная група «Рэйтынг».


І сапраўды — вось як у сакавіцкім апытанні «Рэйтынгу» рэспандэнты ставіліся да Беларусі як краіны.

Графік 1. Сяброўскія-варожыя краіны

Беларусь ацэньвалі як краіну, у той ці іншай ступені сяброўскую, толькі 7% рэспандэнтаў.

У апытанні ў канцы красавіка «Рэйтынг» высвятляў стаўленне ўкраінцаў да сусветных лідараў.

Графік 2. Стаўленне да сусветных лідараў

Ва Украіне Лукашэнка цяпер — «Саша 3%». Аляксандра Лукашэнку ацанілі станоўча толькі 3% рэспандэнтаў.

Гэтыя дадзеныя пацвярджаюць другую частку тлумачэння кіраўніка «Рэйтынгу»: «Беларусь як краіна і ўлада — кепская».

Але апытанне «Рэйтынгу», праведзенае напрыканцы красавіка, паказала, што першая частка яго ацэнкі, што для ўкраінцаў «беларусы як народ — добрыя», не зусім дакладная.

У гэтым апытанні задавалася прамое пытанне пра стаўленне рэспандэнтаў да розных групаў людзей.

Графік 3. Як бы вы ацанілі сваё стаўленне да гэтых групаў людзей?

Параўнаем цяпер графікі 1-3. Станоўчых ацэнак Лукашэнкі — 3%, Беларусь — сяброўская краіна для 7%, у той ці іншай ступені цёпла ставяцца да жыхароў Беларусі — 22% украінцаў, прыкладна кожны пяты.

Стаўленне да жыхароў Беларусі — у 7 разоў лепшае, чым да Лукашэнкі, і ў 3 разы лепшае, чым да Беларусі як краіны.

Але ў параўнанні са стаўленнем да іншых групаў, якія фігуруюць у графіку 3, да жыхароў Беларусі — стаўленне вельмі кепскае. Горшае, чым да іх, стаўленне — толькі да жыхароў Расіі.

Варта адзначыць, што ўласна этнічнасць і мова не цалкам вызначае стаўленне да адпаведных групаў. Да этнічных расійцаў, якія жывуць ва Украіне, стаўленне заўважна лепшае, чым да жыхароў РФ, хоць таксама не надта цёплае. А стаўленне да расійскамоўных украінцаў дык і вельмі добрае.

Пытанне пра стаўленне да беларусаў як этнічнай групы, а таксама да беларусаў — жыхароў Украіны, у апытанні не задавалася. Але адказы на пытанне пра стаўленне да жыхароў Беларусі — паказальныя і, так выглядае, вызначальныя. Магчыма, што калі б спыталіся пра стаўленне да беларусаў, што жывуць ва Украіне, яно было б лепшае, чым да грамадзян Беларусі. Але наўрад ці кардынальна лепшае.

Звяртае на сябе ўвагу, што частка «жыхароў акупаванага Крыму» і «жыхароў так званых ДНР/ЛНР» са зброяй у руках ваюе з Украінай, жыхары Беларусі — не ваююць. А стаўленне да іх — крыху горшае, чым да «жыхароў так званых ДНР/ЛНР», і значна горшае, чым да «жыхароў акупаванага Крыму».

Наступны графік дэманструе дынаміку стаўлення да некаторых з групаў, якія фігуруюць на графіку 3.

Графік 4. Дынаміка стаўлення

Як бачым, за год пазітыўнае стаўленне да жыхароў Беларусі абрынулася, зменшыўшыся ў 3 разы. На графіку 4 цікава адзначыць паляпшэнне стаўлення да расійскамоўных украінцаў. Яно істотна палепшылася ў параўнанні з 2021 годам, і крыху, але заўважна, палепшылася нават падчас вайны — з сакавіцкага да красавіцкага апытання.

Калі гаварыць пра сувязі стаўлення да жыхароў Беларусі з сацыяльна-дэмаграфічнымі характарыстыкамі, то яны нязначныя. Крыху цяплей ставяцца да іх жыхары поўдня Украіны, людзі сталага веку, тыя, хто дома размаўляе па-расійску, і этнічныя расійцы — жыхары Украіны.

Падводзячы вынікі, можна сказаць, што за час вайны істотна пагоршылася стаўленне ўкраінцаў не толькі да Беларусі як краіны, не толькі да Лукашэнкі, але і да жыхароў Беларусі, да народу.

Украінскія ўлады, украінскія палітыкі збольшага такога стаўлення да беларусаў не дэманструюць. Але і яны бяруць пад увагу грамадскую думку, якую адлюстроўваюць — у прыватнасці, і сацыялагічныя апытанні.



Хочаце ведаць больш? Сачыце за нашымі публікацыямі ў Telegram і Facebook!

  • Апошняе на сайце
,
Больш цікавага на «Новым Часе»: