Байдэн папярэдзіў Сі Цзіньпіна пра наступствы падтрымкі Расіі

Прэзідэнт ЗША Джозэф Байдэн і старшыня КНР Сі Цзіньпін больш за дзве гадзіны абмяркоўвалі вайну ва Украіне і наступствы дадзенага крызісу для двухбаковых адносін і сусветнага парадку. Пра гэта гаворыцца ў паведамленні Белага дома па выніках гутаркі.

Джо Байдэн папярэдзіў кітайскага лідара пра наступствы, якія можа пацягнуць для КНР аказанне падтрымкі расійскаму ўраду.
«Прэзідэнт Байдэн ясна даў зразумець значэнне і наступствы таго, што Кітай аказвае матэрыяльную падтрымку — калі Кітай будзе аказваць матэрыяльную падтрымку — Расіі, паколькі яна вядзе сваю жорсткую вайну на Украіне, не толькі для адносін Кітая са Злучанымі Штатамі, але і для ўсяго свету», — сказаў прадстаўнік Белага дома.
Амерыканскі бок падкрэсліў памылковасць абвінавачанняў у распрацоўцы біялагічнай зброі ва Украіне, якія распаўсюджваюцца Расіяй. Байдэн таксама пазнаёміў Сі Цзіньпіна з дзеяннямі, якія прадпрымае Захад для прыцягнення РФ да адказнасці. Бакі абмяркоўвалі тэму Тайваня.
У паведамленні кітайскага боку адзначаецца, што Байдэн пацвердзіў адсутнасць прэтэнзій на новую халодную вайну і далейшую канфрантацыю з Кітаем, выказаў зацікаўленасць у кантактах з кітайскім кіраўніцтвам.
«Кітай і ЗША павінны не толькі прасоўваць двухбаковыя адносіны ў правільным кірунку, але і несці на сабе неабходную міжнародную адказнасць за мір і спакой ва ўсім свеце», — адзначыў Сі Цзіньпін.
Паводле яго слоў, меркаванні двух кіраўнікоў дзяржаў пра важнасць узаемнай павагі і мірнага суіснавання супадаюць. Разам з тым кітайскі лідар падкрэсліў, што пакуль яшчэ не цалкам пераадоленыя наступствы палітыкі папярэдняй амерыканскай адміністрацыі. Ён акцэнтаваў увагу на пытанні Тайваня і прапанаваў ЗША ўстрымлівацца ад неабдуманых заяў па гэтым пытанні.
Сі Цзіньпін назваў сітуацыю ва Украіне вельмі непажаданай для Кітая.
«Любая ацэнка і выснова Кітая фармуецца выключна аб'ектыўна на аснове самой сутнасці таго, што адбываецца. Неабходна адстойваць міжнароднае права і агульнапрызнаныя нормы міжнародных адносін, строга выконваць Статут ААН, прытрымлівацца канцэпцыі агульнай, комплекснай, сумеснай і ўстойлівай бяспекі», — гаворыцца ў паведамленні кітайскага боку.
Сі Цзіньпін падкрэсліў важнасць сумеснай падтрымкі перамоўнага працэсу паміж Расіяй і Украінай. «ЗША і NATO таксама павінны наладзіць дыялог з Расіяй, што дазволіла б ліквідаваць карэнныя прычыны ўзнікнення ўкраінскага крызісу, зняць заклапочанасці ў сферы бяспекі як Масквы, так і Кіева», — адзначаецца ў рэлізе.
Старшыня КНР таксама адзначыў, што лідары Кітая і ЗША павінны справіцца з задачамі ўрэгулявання глабальных «гарачых кропак», не менш важна быць гарантам глабальнай стабільнасці і годнага жыцця людзей на планеце. Ён выказаў непрыманне санкцый і папярэдзіў, што узмацненне іх жорсткасці прывядзе да глабальнага крызісу.
«Доўгатэрміновы мір стане магчымым толькі пры выбудоўванні стасункаў паміж буйнымі дзяржавамі на аснове ўзаемнай павагі, адмове ад менталітэту часоў Халоднай вайны і блокавага мыслення ў імя паслядоўнага фармавання збалансаванай, эфектыўнай і ўстойлівай архітэктуры бяспекі глабальнага і рэгіянальнага маштабу», — падводзіцца выснова ў кітайскім паведамленні.