Ціханоўская на дзяржаўным радыё: Незалежнасць — наша абсалютная галоўная каштоўнасць

Кандыдат у прэзідэнты Святлана Ціханоўская выступіла ў эфіры Першага нацыянальнага канала Беларускага радыё, дзе падзялілася пунктамі сваёй праграмы і распавяла, што будзе пасля яе перамогі на выбарах.

— Мяне ніколі не прыцягвала ідэя будаваць кар'еру, я адчувала сябе перш за ўсё жонкай і маці. Я ніколі не цікавілася палітыкай, але год таму мой муж Сяргей Ціханоўскі стварыў свой інтэрнэт-праект «Краіна для жыцця», у рамках якога ён сустракаўся з людзьмі розных прафесій. Яны расказвалі яму, што іх турбуе, што адчуваюць, што думаюць пра жыццё ў Беларусі. Мяне ўразіла, што людзей, якія выступілі ў праекце «Краіна для жыцця», сталі караць штрафамі і кідаць у турмы. Вось скажыце, куды гэта варта? Хіба з такой несправядлівасцю можна мірыцца? Вось таму, калі майго мужа пазбавілі магчымасці ўдзельнічаць у выбарах, я і вырашыла замяніць яго і ісці да перамогі за сябе, за мужа, за ўсіх нас, — сказала Ціханоўская.
Святлана Ціханоўская заявіла, што не стане нічога абяцаць: для гэтага ёсць іншыя людзі, якія 26 гадоў раздаюць «пустыя абяцанні». Кандыдат акрэсліла праблемныя кропкі краіны, якія, як яна лічыць, неабходна змяніць: масавая эміграцыя беларусаў за мяжу, паміраюць вёскі і маленькія гарады, а таксама што людзі паміраюць ад каронавіруса, «пакуль улада хавае ад іх рэальныя лічбы па захварэлых, не забяспечвае меддапамогу, не плаціць лекарам годныя зарплаты».
— Гэтым летам людзей пачалі хапаць на вуліцах і нават не за тое, што яны выйшлі на нейкі мітынг ці дэманстрацыю з лозунгамі і заклікамі. Іх пачалі хапаць толькі за тое, што яны стаялі ў чарзе і хацелі сваім подпісам падтрымаць вылучэнне прэтэндэнтаў. А цяпер хапаюць ужо за тое, што хочаш падаць скаргу ў ЦВК на відавочнае парушэнне. Дык на што разлічвае цяперашняя ўлада? Няўжо дзеючы прэзідэнт разлічвае, што, збіваючы людзей дубінкамі, кідаючы за краты, выпісваючы ім штрафы, ён прымусіць людзей сябе любіць? Ён што, сапраўды думае, што гвалтам, нахрапам, хамствам і пастаяннай хлуснёй можна вырашыць праблемы ў эканоміцы, да якіх ён сам жа і прывёў нашу краіну? А колькі ён яшчэ збіраецца збіваць людзей і кідаць іх у турмы? Не прэзідэнт павінен нам указваць, як нам жыць і што нам рабіць, а мы самі павінны гэта вызначаць, — заявіла Ціханоўская.
Кандыдат яшчэ раз паўтарыла, што пасля перамогі 9 жніўня плануецца правесці новыя выбары з усімі альтэрнатыўнымі кандыдатамі, жадаючымі балатавацца. Падчас пераходнага перыяду краінай будуць кіраваць тыя ж чыноўнікі, што і цяпер, за выключэннем тых, хто груба парушаў закон. Тых, хто сыдзе ў адстаўку, заменяць прафесіяналы з ліку дзяржслужачых. Новыя выбары будуць праведзены на працягу паўгода. Акрамя выбараў Ціханоўская плануе прызначыць рэферэндум па вяртанні Канстытуцыі 1994 года.
Кандыдат агучыла асноўныя тэзісы сваёй праграмы «Краіна для жыцця, дзяржава для людзей»: стварэнне новых працоўных месцаў у Беларусі, зняцце бар'ераў для малога і сярэдняга бізнесу, перагляд фінансавання стратных прадпрыемстваў, рэформа сістэм аховы здароўя і адукацыі,
— Ну і нарэшце знешняя палітыка. Незалежнасць — наша абсалютная галоўная каштоўнасць, мы яе не прадаем, мы ёю не гандлюем, мы мірныя людзі, мы будзем сябраваць з усімі, але толькі ў інтарэсах уласнай краіны. Мы павінны стварыць партнёрства на роўных, а не залежаць ад газавай і нафтавай іголкі. Простага шляху няма: альбо мы аб'ядноўваемся і разам ідзем у краіну для жыцця, альбо паўтараем памылкі мінулых гадоў, — заявіла Ціханоўская.
tut.by