600-ты дзень вайны ва Украіне. Расія «зліваецца» пад Аўдзееўкай і падстаўляе Лукашэнку

«Сустрэчны контрнаступ» Расіі пад Аўдзееўкай разбіўся аб жэлезабетонную абарону УСУ. Нават Пуцін знізіў запал рыторыкі наконт чаканняў поспехаў на гэтым кірунку. А расійская прапаганда ў чарговы раз нагадала, за што Лукашэнку свеціць Гаага.

Расійскія войскі на мінулым тыдні ажыццявілі ў раёне Аўдзееўкі больш за сто няўдалых спробаў выцесніць сілы абароны Украіны са сваіх пазіцый, паведаміў спікер Генеральнага штаба Узброеных Сіл Украіны Андрэй Кавалёў у эфіры тэлемарафона.

У той жа час украінскія войскі працягваюць весці наступальныя дзеянні на Бахмуцкім і Мелітопальскім напрамках, паведаміў прадстаўнік Генштаба.

На Бахмуцкім напрамку працягваюцца наступальныя дзеянні УСУ на поўдзень ад Бахмута. «Маюць поспех на ўсход ад Кляшчы, на ўсход ад Андрэеўкі і на поўнач ад Курдзюмоўкі. Акупанты цягам тыдня распачалі больш за 20 няўдалых спробаў аднавіць страчанае становішча ў гэтых раёнах», — адзначыў Кавалёў.

Акрамя таго, дадаў афіцэр, праз катастрафічныя страты ў жывой сіле расійскія акупанты перакідваюць на Бахмуцкі кірунак дадатковыя падраздзяленні.

Украінскія войскі працягнулі наступальныя аперацыі ў заходняй частцы Запарожскай вобласці 15 кастрычніка і, як паведамляецца, нядаўна прасунуліся наперад. Па паведамленнях Генштаба, украінскія войскі працягнулі наступальныя аперацыі ў напрамку Мелітопаля, паведамляе Інстытут вывучэння вайны (ISW).

* * *

Кіраўнік РФ Уладзімір Пуцін і прадстаўнікі крамлёўскай прапаганды змянілі рыторыку з нагоды наступу акупантаў на Аўдзееўку. Яны «памяншаюць надзею» на верагодныя поспехі на гэтым кірунку, гаворыцца ў справаздачы Інстытута вывучэння вайны (ISW).

У прыватнасці, у інтэрв'ю расійскім прапагандыстам Пуцін заявіў, што расійскія войскі вядуць «актыўную абарону» на Аўдзееўскім, Купянскім і Запарожскім кірунках. На думку экспертаў, Пуцін назваў наступ пад Аўдзееўкай «актыўнай абаронай», а не «актыўнымі баявымі дзеяннямі», каб знізіць узровень надзей.

«Расійскія войскі наўрад ці зробяць значныя прарывы або адрэжуць украінскія сілы ў населеным пункце ў бліжэйшай перспектыве, а патэнцыйныя маштабныя прасоўвання, верагодна, запатрабуюць значнага і працяглага прыцягнення асабовага складу і матэрыяльных сродкаў», — адзначаюць аналітыкі.

* * *

Камандзір расійскага батальёна «Усход» Аляксандр Хадакоўскі заявіў, што расійская пяхота на фронце ва Украіне сутыкаецца з праблемамі недастатковага контрбатарэйнага патэнцыялу, кампетэнтнасці камандзіраў, медыцынскай падтрымкі, ратацыі і забеспячэння.

Хадакоўскі сцвярджае, што адсутнасць сувязі паміж расійскімі батальёнамі і штабамі з'яўляецца настолькі распаўсюджанай з'явай, што, калі ўкраінскія войскі нанеслі ўдар па будынку расійскага штаба, расійскі батальён не зразумеў, што той знішчаны, і працягнуў праводзіць аперацыі самастойна.

Іншы расійскі блогер паскардзіўся, што расійскія войскі ў цэлым адчуваюць недахоп боепрыпасаў і працягваюць адчуваць праблемы з украінскімі беспілотнікамі.

Гэтыя факты паказваюць, што грэбаванне да расійскага вайсковага камандавання захоўваецца, нягледзячы на верагодныя спробы зверху падвергнуць цэнзуры абмеркаванне пэўных участкаў фронту, пішуць эксперты ISW.

* * *

Падчас начной атакі па Украіне РФ запусціла ракету «Іскандэр», 12 БПЛА і пяць ракет Х-59. СПА збіла 11 расійскіх дронаў-камікадзэ і дзве ракеты Х-59. Авіяцыйныя ракеты атакавалі паўночныя і ўсходнія рэгіёны Украіны, «шахеды» РФ накіравала па розных напрамках, у прыватнасці на захад.

У Міргарадскім раёне Палтаўскай вобласці абломкі ракеты пашкодзілі дамы, пацярпелі тры чалавекі. У Хмяльніцкай вобласці разбурэнняў і параненых няма.

* * *

Прадстаўнік выведкі Украіны Андрэй Юсаў адзначыў, што Расія можа абвясціць новую мабілізацыю. «Машыну рыхтуюць да новых хваль мабілізацыі. Юрыдычна заканадаўства і паўнамоцтвы рэпрэсіўных органаў павялічваюцца такім чынам, каб у любы момант нечаканае абвяшчэнне рашэння аб новай хвалі мабілізацыі не магло сустрэцца з адчувальным супрацівам», — сказаў прадстаўнік ГУР.

Аднак расійскія ўлады яшчэ асцерагаюцца бунтаў, таму наўпрост мабілізацыю не абвяшчаюць. «Улады баяцца пратэстаў. Як бы дыктатура не ставілася да грамадскага бунту, але яны баяцца. Баяцца, што будуць забіраць людзей з вуліцы. Так цяпер робяць на акупаваных тэрыторыях Украіны, у прыватнасці, у Данбасе», — заявіў Юсаў.

* * *

У эфіры расійскага дзяржТБ распавялі пра вываз украінскіх дзяцей-сірот у Беларусі з ухвалення Лукашэнкі. У сюжэце канала «Расія 1» гаворыцца, што ў Беларусь на «аздараўленне» прывезлі ў тым ліку дзяцей-сірот. А гэта па міжнародным праве можа разглядацца як ваеннае злачынства. Дзяржсакратар «Саюзнай дзяржавы» Мезенцаў заявіў, што вываз дзяцей узгаднілі з Лукашэнкам.

* * *

Джо Байдэн заявіў у інтэрв'ю CBS News, што ЗША ў стане аказваць дапамогу і Украіне, і Ізраілю: «Мы можам паклапаціцца і пра Украіну, і пра Ізраіль і пры гэтым захаваць нашу агульную міжнародную абарону. У нас ёсць магчымасці для гэтага. Мы абавязаны гэта зрабіць».

* * *

Цяпер у Беларусі знаходзяцца каля 2 тысяч расійскіх вайскоўцаў. Павелічэнне колькасці жаўнераў войскаў РФ не фіксуецца, паведамляе маніторынгавая група «Беларускі Гаюн».

Адзначаецца, што ў верасні фактычна не змянілася сітуацыя з расійскім вайсковым кантынгентам у Беларусі. Павелічэння колькасці Узброеных Сіл РФ не назіралася і пакуль няма перадумоў да значнага іх павелічэння. Аднак у Беларусі працягвае знаходзіцца частка вайскоўцаў РФ:

• на аэрадромах «Мазыр» і «Зябраўка» — да 600 чалавек.
• радыётэхнічны вузел «Баранавічы» і 43-ці вузел сувязі «Вілейка» — да 1450 чалавек.

У цэлым, па стане на 1 кастрычніка «Беларускі Гаюн» ацэньвае колькасць расійскіх вайскоўцаў, якія знаходзяцца ў Беларусі, у прыкладна 2 тысячы чалавек.