Еўрапарламент прагаласуе па пытанні прызнання Расіі дзяржавай-спонсарам тэрарызму
Еўрапейскі парламент ухваліў запыт групы еўрапейскіх кансерватараў і рэфармістаў аб уключэнні ў парадак дня пленарных пасяджэнняў дэбатаў аб прызнанні Расійскай Федэрацыі дзяржавай-спонсарам тэрарызму.
Падчас галасавання 201 еўрадэпутат падтрымаў уключэнне рэзалюцыі ў дэбаты, 99 выказаліся супраць, яшчэ 61 — устрымаўся, паведаміў дэпутат Еўрапарламента ад Польшчы Богдан Жоньца, перадае АФН са спасылкай на Польскае агенцтва друку.
«Мы рады, што дыскусія адбудзецца і што ў лістападзе мы будзем галасаваць за гэтую рэзалюцыю, якая дазволіць прадставіць сапраўдныя адносіны паміж Расіяй і ЕС і пакажа варварства Пуціна і ягонага атачэння, а таксама тых з Заходняй Еўропы, якія маюць з ім бізнес», — пракаментаваў Жоньца.
Чакаецца, што рэзалюцыя будзе абмеркавана і вынесена на галасаванне ў Еўрапарламенце на сесіі 21-24 лістапада.
13 кастрычніка Парламенцкая асамблея Савета Еўропы (ПАСЕ) прыняла рэзалюцыю з заклікам да ўсіх дзяржаў — удзельніц арганізацыі прызнаць Расію «тэрарыстычным рэжымам». На думку дэлегатаў ПАСЕ, незаконная анексія акупаваных украінскіх тэрыторый, пагрозы ўжывання ядзернай зброі і ўзмацненне рэпрэсій унутры Расіі робяць краіну «тэрарыстычнай».
Літва і Латвія яшчэ раней абвясцілі РФ краінай, якая падтрымлівае тэрарызм. Парламент Эстоніі 18 кастрычніка зрабіў такі ж крок. У падтрымку гэтай заявы выступілі 88 дэпутатаў, «тых, хто ўстрымаўся ці прагаласаваў супраць, не было», адзначала ЕЕR. У паказаным дакуменце Расія кваліфікуецца як «дзяржава — спонсар тэрарызму», а таксама «галоўная пагроза міру ў Еўропе». У якасці «тэрарыстычных арганізацый» таксама пазначаны ПВК «Вагнер» і ўзброеныя фарміраванні ДНР і ЛНР.
Акрамя таго, у заяве асуджаюцца вайна РФ супраць Украіны і ўваходжанне ў склад Расіі новых суб'ектаў. Удакладняецца, што Эстонія «ніколі не прызнае» вынікі рэферэндумаў, якія прайшлі ў Запарожскай і Херсонскай абласцях, а таксама ў ДНР і ЛНР. У дадатак да гэтага дэпутаты Рыйгікога заклікалі выключыць Расію з ліку пастаянных членаў Савета бяспекі ААН.