ISW: Расія выкарыстоўвае беларускія мікрасхемы ў зброі, што тэрарызуе ўкраінскія гарады

Пакуль свет чакае вынікаў «ультыматума Трампа», Украіна працягвае ўзбройвацца. Пэўныя складанасці, якія ўзнікаюць на гэтым шляху, толькі пацвярджаюць рашучасць саюзнікаў і далей дапамагаць Украіне. Тым часам Беларусь абвінавачваюць у спрыянні бамбардзіроўкам гарадоў Украіны. Ідзе 1242-гі дзень поўнамаштабнай вайны РФ супраць Украіны пра саўдзеле ў агрэсіі рэжыму Аляксандра Лукашэнкі.

За мінулыя суткі ва Украіне зафіксавана 177 баявых сутыкненняў, паведамляе Генштаб УСУ ў зводцы 19 ліпеня.

На Пакроўскім кірунку абаронцы Украіны спынілі 47 штурмаў расіян ў раёнах Палтаўкі, Уладзіміраўкі, Міралюбаўкі, Новаэканамічнага, Лісоўкі, Мірнаграду, Пакроўску, Зверава, Котліні і іншых.

На Паўночна-Слабажанскім (Курскім) кірунку за мінулыя суткі адбылося 38 боесутыкненняў. 

На Ліманскім кірунку расіяне атакавалі 26 разоў, спрабуючы прасунуцца ў раёнах Каровіна Яру, Карпаўкі, Студні, Торскага і ў бок Серабранкі.

На Новапаўлаўскім кірунку расійцы 13 разоў атакавалі ў раёнах Зоркі, Свабоднага Поля, Зялёнага Поля, Шаўчэнка і іншых.

На Краматорскім кірунку зафіксавана восем боесутыкненняў. На Тарэцкім кірунку адбіта сем атак расіян. Па шэсць атак на кожным было адбіта на Паўднёва-Слабажанскім (Харкаўскім) і Прыдняпроўскім кірунках.

* * *

Расійскія войскі прасунуліся на поўначы Сумскай вобласці і ў раёне Пакроўска, а ўкраінскія — у раёне Новапаўлаўкі, паведамляе амерыканскі Інстытут вывучэння вайны (ISW).

Геалакацыйныя кадры сведчаць, што расійскія войскі нядаўна прасунуліся на захад ад Варачына (паўночны ўсход ад горада Сумы).

Паводле ацэнкі геалакацыйных кадраў, расійскія войскі нядаўна прасунуліся ў Лысаўцы на Пакроўскім кірунку, і, магчыма, захапілі населены пункт.

Геалакацыйныя кадры, апублікаваныя 18 ліпеня, паказваюць, што сілы абароны Украіны нядаўна адбілі Ялту (на поўдзень ад Новапаўлаўкі) і прасунуліся на паўднёвы захад ад Камара.

Прадстаўнік украінскай брыгады, якая дзейнічае на напрамку Новапаўлаўкі, паведаміў, што ўкраінскія сілы адбілі не толькі Ялту, але і Васкрасенку (на паўднёвы захад ад Новапаўлаўкі).

* * *

У ноч на 19 ліпеня аналітычны праект DeepState паведаміў, што расійцы акупавалі Яблонаўку ў Сумскай вобласці. Таксама аналітыкі паведамілі аб прасоўванні ворага каля Юнаковки ў Сумскай вобласці, Хатнего і Раманаўкі ў Харкаўскай вобласці, Тарэцка ў Данецкай вобласці.

* * *

У ноч на 19 ліпеня Расія атакавала Украіну 379-цю сродкамі паветранай атакі:

• 344 ударнымі БПЛА тыпу Shahed і беспілотнікамі іншых тыпаў;
• 12 балістычнымі ракетамі Іскандэр-М / KN-23;
• 8 крылатымі ракетамі Іскандэр-К;
• 15 крылатымі ракетамі Х-101.

Супрацьпаветранай абаронай збіта 208 сродкаў паветранага нападу праціўніка:

• 185 ўдарных БПЛА тыпу Shahed;
• 7 балістычных ракет Іскандэр-М / KN-23;
• 7 крылатых ракет Іскандэр-К;
• 9 крылатых ракет Х-101.

Акрамя таго, 7 крылатых ракет і 129 дронаў былі лакацыйна страчаныя / задушаныя РЭБ.

У ноч на 19 ліпеня ў чарговы раз была атакаваная Адэса. У выніку ўспыхнуў пажар з 6 па 9 паверхі 9-павярховага жылога дома. Яго ліквідавалі ратавальнікі разам з добраахвотнікамі. З падпаленых кватэр выратавалі 5 чалавек, адна выратаваная жанчына ад атрыманых траўмаў загінула.

У ноч на 19 ліпеня Паўлаград Днепрапятроўскай вобласці падвергнуўся найбольш масіраванай атацы, расійцы білі па горадзе дронамі і ракетамі. У выніку атакі разбураныя пажарная частка, прамысловыя прадпрыемствы, 5-павярховы будынак. Узніклі ўзгаранні.

* * *

* * *

Амерыканскі Інстытут вывучэння вайны (ISW) у сённяшняй справаздачы адзначае, што Расія працягвае спадзявацца на беларускія абаронныя прадпрыемствы ў вытворчасці кампанентаў узбраення для вайсковых патрэб Расіі і ўхілення ад санкцый.

Украінскі тэлеканал «Канал 24» паведаміў 17 ліпеня, што расійскія абаронныя прадпрыемствы ўсё часцей выкарыстоўваюць беларускія мікрасхемы, кандэнсатары, стабілізатары і іншыя кампаненты ў расійскіх ракетах, уключаючы крылатыя ракеты Х-101 і Х-69, балістычныя ракеты паветранага базавання «Кінжал», а таксама зенітныя ракетныя комплексы С-300 і С-400. «Канал 24» прывёў ліст ад намесніка міністра прамысловасці і гандлю Расіі Кірыла Лусагорскага кіраўніку Дзяржаўнага ваенна-прамысловага камітэта Беларусі Дзмітрыю Пантусу з просьбай да беларускіх абаронных прадпрыемстваў, а менавіта да мінскіх заводаў «Інтэграл» і «Пеленг», пастаўляць мікраэлектроніку ў Расію.

Украінскі тэлеканал паведаміў, што Расія таксама выкарыстоўвае беларускія мікрасхемы ў кіраваных авіябомбавых блоках і некіравальных ракетах.

* * *

У суботу ўрад Аўстраліі заявіў, што перадаў Украіне танкі M1A1 Abrams у рамках пакета дапамогі на суму 245 мільёнаў аўстралійскіх долараў ($160 мільёнаў) для падтрымкі ў абароне ад Расіі.

Украіна ўжо атрымала большасць з 49 танкаў, прадастаўленых Аўстраліяй, астатнія будуць дастаўлены ў бліжэйшыя месяцы, паведаміў міністр абароны Аўстраліі Рычард Марлз.

Танкі з'яўляюцца часткай дапамогі на суму 1,5 мільярда аўстралійскіх долараў, якую Канбера дала Кіеву.

* * *

Адміністрацыя прэзідэнта ЗША Дональда Трампа будзе пераразмяркоўваць пастаўкі зброі саюзнікам, аддаючы ў будучыні прыярытэт тым краінам, якія гатовыя аддаць Украіне ўзбраенне, у прыватнасці сістэмы Patriot, са сваіх запасаў, піша The Wall Street Journal.

У прыватнасці, адміністрацыя перамясціла Германію на першае месца ў чарзе на атрыманне сістэм супрацьпаветранай абароны Patriot, што дазволіць нямецкаму боку перадаць Украіне наяўныя ў яе сістэмы.

Як адзначае выданне, абяцанне ЗША хутка замяніць нямецкія сістэмы Patriot — першы выпадак, калі Пентагон спрыяе пастаўкам зброі ва Украіну з тых часоў, як Трамп абвясціў у пачатку гэтага месяца, што ён падтрымлівае дадатковыя вайсковыя пастаўкі.

Першапачатковае пагадненне падобна на крок, зроблены ў 2024 годзе адміністрацыяй папярэдняга прэзідэнта Джо Байдэна, якая перамясціла Украіну на першае месца ў чарзе на атрыманне сродкаў супрацьпаветранай абароны непасрэдна з ЗША.

Па меры таго як усё больш краін будуць згаджацца на пастаўку Patriot са сваіх арсеналаў ва Украіну, адміністрацыя Трампа будзе і далей пераглядаць планы будучых паставак, аддаючы прыярытэт гэтым саюзнікам, заявіў амерыканскі высокапастаўлены чыноўнік.

* * *

Сістэма супрацьпаветранай абароны Patriot, якую Германія плануе аплаціць для перадачы Украіне, цяпер дапрацоўваецца і будзе гатовая не раней, чым праз 6 месяцаў, піша Bild.

Гаворка ідзе пра Patriot, які павінна была атрымаць Швейцарыя, аднак яе пасунулі ў чарзе дзеля Украіны. Выдаткі па ёй возьме на сябе Германія. Аднак у публікацыі гаворыцца, што гэтая сістэма ўсё яшчэ дапрацоўваецца амерыканскім абаронным падрадчыкам Raytheon і, як чакаецца, будзе гатовая не раней чым праз шэсць-восем месяцаў.

Паводле звестак Bild, каб паскорыць пастаўкі Украіне, Германія разглядае магчымасць адпраўкі Patriot з запасаў сваіх узброеных сіл. Пры гэтым выданне адзначае, што ў Германіі не стае сродкаў СПА для сябе. У пачатку вайны Бундэсвер меў 12 сістэм Patriot, з якіх тры былі перададзеныя Украіне, яшчэ дзве сістэмы выкарыстоўваюцца ў Польшчы для аховы аэрапорта ў Жэшуве. Тры сістэмы цяпер абнаўляюцца, і пакуль не гатовыя да выкарыстання, а яшчэ як мінімум адна патрэбная для вучэнняў.

Такім чынам, для ўласнай супрацьпаветранай абароны Германіі ў цяперашні час даступныя максімум тры адзінкі. Калі Украіне будзе перададзена яшчэ адна сістэма, іх застанецца дзве, адзначае выданне.

У той жа час Германія чакае пастаўкі Patriot, якія замаўляў папярэдні ўрад. Першая з іх павінна паступіць у будучым годзе, а астатнія – да 2029 года.