«Ёсць агульныя пункты». Украіна гатовая да прыходу Трампа да ўлады
Напярэдадні прэзідэнцкіх выбараў у ЗША, якія могуць істотна паўплываць на Украіну і яе далейшую падтрымку ў сферы бяспекі, некаторыя ўкраінскія чыноўнікі разглядаюць магчымасць зменаў як патэнцыйна станоўчае развіццё, піша The Washington Post.
Фота прэс-службы Уладзіміра Зяленскага
Афіцыйна Кіеў заяўляе, што будзе працаваць з любым лідарам, якога выберуць амерыканцы, захоўваючы нейтральную пазіцыю адносна ўнутранай палітыкі саюзніка. Аднак у неафіцыйных размовах частка прадстаўнікоў урада Уладзіміра Зяленскага прызнае магчымыя перавагі перамогі Дональда Трампа. Нягледзячы на ягокрытыку фінансавай падтрымкі Украіны і прапановы хуткага заканчэння вайны, што магло б дапамагчы Расіі, некаторыя бачаць у Трампе магчымасць новых падыходаў.
У той час як адміністрацыя Байдэна-Харыс верагодна будзе працягваць дзейную палітыку падтрымкі Украіны, Кіеў усё часцей выказвае незадаволенасць асцярожнай пазіцыяй ЗША, якія пазбягаюць рашучых крокаў, баючыся эскалацыі з Расіяй. Таму, асабліва ўлічваючы поспехі Расіі на полі бою за апошні год, некаторыя ўкраінскія чыноўнікі лічаць, што патрэбныя больш рашучыя дзеянні, у прыватнасці зняцце абмежаванняў на выкарыстанне зброі.
Адносіны паміж Зяленскім і Трампам былі няпростымі яшчэ з 2019 года, калі Трамп затрымаў ваенную дапамогу Украіне, спрабуючы, як паведамлялася, атрымаць кампрамат на сына Байдэна Хантэра. Гэта прывяло да імпічменту Трампа ў Палаце прадстаўнікоў за злоўжыванне ўладай.
Аднак, як адзначаюць украінскія чыноўнікі, перамога Трампа не будзе катастрофай для Украіны, і ёсць надзея, што асабістыя стасункі паміж лідарамі дапамогуць паўплываць на палітыку ЗША.
«Вядома, адміністрацыя Зяленскага мае агульныя пункты з Трампам», — адзначае ўкраінскі чыноўнік, які працаваў у камандзе Зяленскага падчас прэзідэнцтва Трампа.
Зяленскі бачыць сваё падабенства з Трампам. Абодва прыйшлі да ўлады з нетыповым досведам — Трамп з бізнесу, а Зяленскі з шоў-бізнесу, — што можа стаць асновай для ўзаемаразумення.
Глядзіце таксама
Трамп абяцаў знайсці хуткае рашэнне для завяршэння вайны, хоць не раскрываў дэталяў. Яго саюзнік Джэй Дзі Вэнс намякаў на план, які прадугледжваў бы замарожванне бягучых ліній фронту, пакідаючы значныя тэрыторыі пад кантролем Расіі. Адказваючы на такія заявы, Зяленскі адзначыў: «Мы таксама імкнемся да хуткага мірнага рашэння, але не гатовыя за гэта плаціць. Мы не агрэсары. Расія — агрэсар, і менавіта яна павінна несці адказнасць».
Трамп называў Зяленскага «адным з найлепшых прадаўцоў, якіх я калі-небудзь бачыў», падкрэсліваючы яго ўменне дамаўляцца аб падтрымцы ад ЗША. Аднак Трамп таксама ўсклаў частковую адказнасць за канфлікт на Зяленскага, сцвярджаючы, што той «не павінен быў дапусціць пачатак вайны». Трамп неаднаразова падкрэсліваў, што пры яго кіраванні ўварвання не адбылося б, адначасова называючы некаторыя пастановы Пуціна «хітрымі» і «геніяльнымі».
Каментуючы настроі ў ЗША, Зяленскі ў нядаўнім інтэрв'ю падкрэсліў, што амерыканскае грамадства падтрымлівае Украіну, бо разумее, што абараняюцца агульныя каштоўнасці: «Калі падтрымка з боку ЗША зменшыцца, мы будзем спадзявацца на сябе, адзінства ў Еўропе і грамадскую думку ў Амерыцы».
Выданне адзначае, што некаторыя ўкраінскія чыноўнікі лічаць крытыку Трампа Украіны толькі перадвыбарнай рыторыкай, а яго палітыка ў выпадку перамогі можа быць іншай. Яны звяртаюць увагу на тое, што пры Трампе у 2019 годзе Украіна атрымала першую смяротную зброю ад ЗША, а яго адміністрацыя ўводзіла новыя санкцыі супраць Расіі.
Нягледзячы на асцярогі, што Трамп можа настойваць на саступках з боку Украіны, у камандзе Зяленскага ёсць адчуванне, што ён не захоча выглядаць слабым на міжнароднай арэне, што можа прывесці да падтрымкі Украіны.
Антон Грушэцкі, дырэктар Кіеўскага міжнароднага інстытута сацыялогіі, адзначыў, што «ёсць пэўны страх перад зменамі», але ёсць і расчараванне дзеяннямі дзеючай адміністрацыі, якія, на думку ўкраінцаў, не заўсёды адпавядаюць іх заявам.
Паводле unian.net.