На месцы знесеных савецкіх помнікаў — новыя радарныя пазіцыі! Шмат цікавых навін з Эстоніі

Напрыканцы мінулага месяца Эстонія абвясціла пра перадачу замарожаных расійскіх актываў Украіне і неабходнасць паставіць Расію на калені, што выклікала шмат рэакцый у расійскім грамадстве. Колькасць новых учынкаў для падтрымкі Украіны ў краінах Балтыі толькі павялічваецца і не можа не ўражваць. Сабралі галоўныя навіны Эстоніі за апошні час.

11 чэрвеня Міністэрства абароны Эстоніі на сваім афіцыйным сайце паведаміла, што ў якасці ваеннай дапамогі дзяржава перадае Украіне зенітна-ракетныя ўстаноўкі малой далёкасці тыпу «Mistral» і ракеты для яе. Дакладная колькасць абсталявання не будзе апублікавана з меркаванняў бяспекі.

«Украіне тэрмінова патрэбна супрацьпаветраная абарона, каб супрацьстаяць жорсткаму націску Расіі, які працягваецца, і ў прамых інтарэсах бяспекі Эстоніі таксама ўнесці свой уклад у гэта разам са сваімі саюзнікамі. Мы склалі пакет дапамогі такім чынам, каб ён прыносіў максімальную карысць Украіне, без шкоды для боегатоўнасці Сіл абароны Эстоніі», — адзначыў міністр абароны Хана Пеўкур. 

У мінулым Эстонія бязвыплатна перадавала ракеты, гаўбіцы, артылерыйскія боепрыпасы, супрацьтанкавыя міны, супрацьтанкавыя гранатамёты, мінамёты, транспартныя сродкі, сродкі сувязі, палявыя шпіталі, сродкі індывідуальнай абароны і наборы з сухімі прадуктамі.

6 чэрвеня стала вядома, што, згодна з праектам рашэння ўрада, Эстонія спыняе дзённую работу памежнага пункта «Койдула» на расійска-эстонскай мяжы (КПП «Кунічкіна Гара» з боку РФ).

Праз тое, што Фінляндыя закрыла ўсе наземныя пункты пропуску, а Латвія — два на поўначы дзяржавы, склалася сітуацыя, калі гандаль паміж Расіяй і ЕС ажыццяўляецца пераважна праз мытні на поўдні Эстоніі. Урад не бачыць прычын трымаць гэты памежны пункт адкрытым ноччу праз фактары небяспекі з боку Расіі, а таксама нежадання прапускаць тавары з прызнанай дзяржавы-тэрарысткі праз свае мытні.

 Такім жа чынам з траўня працуе і найбуйнейшы пераход «Нарва» - «Івангорад». Прычынай увядзення такой меры на мытні эстонскія ўлады называюць немагчымасць траціць грошы падаткаплацельшчыкаў на кругласутачнае абслугоўванне расійцаў. Колькасць людзей, якія перасякаюць расійска-эстонскую мяжу праз гэты КПП, рэзка скарацілася пасля ўвядзення жорсткіх абмежаванняў, у прыватнасці, канфіскацыю аўтамабіляў на расійскіх рэгістрацыйных нумарах пры спробе ўезду на тэрыторыю краін Балтыі.

А яшчэ эстонцы прыдумалі годны спосаб перапрафіляваць стылабаты знесеных савецкіх помнікаў пад сучасныя актуальныя патрэбы! Для павышэння бяспекі мяжы, што праходзіць па рацэ Нарва, Дэпартамент паліцыі і пагранаховы будуе на іх дадатковыя радарныя пазіцыі. Дзякуючы ім можна будзе атрымліваць поўны агляд усяго, што адбываецца на мяжы ў рэжыме рэальнага часу.

Адна з радарных станцый будуецца пад горадам Нарва на месцы знесенага ў 2022 годзе помніка «Тры штыкі», а зачышчаны ад савецкай спадчыны ўчастак, на якім стаяў на пастаменце помнік з танкам Т-34, чакае прыходу будаўнікоў, каб прынесці карысць памежнікам і Сілам абароны. Паводле Pohjarannik, усе новыя сістэмы сачэння за мяжой уздоўж ракі павінны быць уведзены ва эксплуатацыю на працягу наступных трох гадоў.

Напачатку месяца міністр абароны Эстоніі Хана Пеўкур заявіў, што Сілам абароны неабходна дадатковае фінансаванне ў памеры €1,6 млрд для адбіцця магчымай атакі расійскай арміі, паведамляе эстонскі партал ERR.

Выданне адзначае, што доўгі час эстонскае войска магло абараняць краіну толькі ў блізкім баі — «у кровапралітных бітвах» з супернікам, які знаходзіцца на адлегласці ўсяго некалькіх сотняў метраў, у лепшым выпадку — некалькіх кіламетраў. У выпадку нападу ім прыйшлося б знішчаць акупантаў на сваёй тэрыторыі. Такая вайна багатая цяжкімі стратамі, і, як ужо не раз казалі еўрапейскія вайсковыя эксперты, з высокай доляй верагоднасці прымежныя Нарва, Вярска і Мерамяэ ператварыліся б у Ірпень, Гастомель і Барадзянку.

У апошнія гады адбыўся скачок у развіцці абароннага патэнцыялу. Сілы абароны ўжо атрымалі ці вось-вось атрымаюць зброю, якая дазволіць у выпадку расійскай агрэсіі супраць краін Балтыі весці баі ў глыбіні варожай тэрыторыі і знішчаць акупантаў на адлегласці сотняў кіламетраў унутры Расіі. Праціўнік у такім выпадку змог бы ўвесці на тэрыторыю Эстоніі значна меншую колькасць войскаў і нанесці краіне адчувальныя страты.

 Згодна з разлікамі, каб адбіць першую магутную хвалю расійскай агрэсіі, спатрэбіцца больш за 800 балістычных ракет ATACMS, амаль 500 кіраваных рэактыўных снарадаў калібра 227 мм, больш за 25 тысяч артснарадаў і адна тысяча кіраваных боепрыпасаў. Вышэйназваныя 1,6 млрд еўра, у тэрміновым парадку запрошаныя для Сіл абароны, складаюць якраз палову такой закупкі.

«З гэтым у выпадку ажыццёўленай супраць нас агрэсіі мы зможам вывесці з ладу пэўную частку ўзбраення — 75%. І мы зможам зрабіць гэта за адносна кароткі тэрмін, пазбегнуўшы сітуацыі, якая склалася цяпер ва Украіне, дзе Расіі ўдаецца пастаянна папаўняць страчанае і рэагаваць на дзеянні ўкраінцаў з адлегласці ў дзясяткі кіламетраў пры дапамозе новых войскаў або зброі далёкага радыусу дзеяння», — дадаў кіраўнік Сіл абароны генерал Марцін Херэм.

16 чэрвеня эстонскія паліцэйскія адправілі ўкраінскім калегам 31 аўтамабіль са скончаным тэрмінам лізінгу са свайго аўтапарка. Ва Украіне большасць паліцэйскіх машын — вельмі старыя, і іх запас стала трэба папаўняць, асабліва ў прыфрантавых зонах, адзначылі эстонцы.

Гэтыя машыны каля пяці гадоў патрулявалі вуліцы і дарогі ў Эстоніі. Цяпер яны адправіліся ва Украіну і будуць працаваць там. Большасць парку паедзе ў Чарнігаў і Жытомір, і некалькі — у паліцэйскі батальён на фронт. 

«Гэтая ідэя нарадзілася падчас нашай апошняй паездкі ва Украіну. Мы абмяркоўвалі з кіраўнікамі ўкраінскай паліцыі, як можна дапамагчы. Сітуацыя ва Украіне такая, што там паліцыянты робяць вельмі шмат працы разам з вайскоўцамі», — распавёў гендырэктар Дэпартамента паліцыі і памежнай аховы Эгерт Бялічаў.

«Украінскія паліцэйскія першымі ўваходзяць на вызваленыя ад ворага тэрыторыі. Ім даводзіцца працаваць у раёнах, дзе яны могуць сутыкнуцца з супернікам, з дыверсантамі. Любая з машын можа быць падарваная. Мы самі вязем гэтыя машыны ва Украіну, каб пераканацца, што яны сапраўды патрапяць да паліцэйскім», — дадаў прадстаўнік эстонскай паліцыі.

Што да аўтамабіляў для вайскоўцаў, эстонцы за часы поўнамаштабнага ўварвання ахвяравалі суму на перадачу каля 1000 адзінак аўтамабільнай тэхнікі. Цяпер каля 50-60% перададзеных транспартных сродкаў дзейнічаюць на «нулі», астатнія — працуюць на трэніровачных пляцоўках, пашкоджаны альбо знішчаны.

 Нагадаем, напрыканцы красавіка ў Эстоніі ініцыявалі праект, паводле якога Маскоўскі патрыярхат можа быць прызнаны тэрарыстычнай арганізацыяй і выдвараны з краіны за падтрымку расійскай агрэсіі. У мінулым месяцы ў краіне дазволілі перадачу замарожаных расійскіх актываў Украіне, што выклікала шмат адмоўных рэакцый сярод расійскага грамадства і прапагандыстаў, якія заклікалі сцерці Эстонію з твару Зямлі і «ўзяць часова эстонскі горад Нарва назад».