Пуцін не хоча спыняць вайну: у РФ «выдалілі» з выбараў адзіную антываенную партыю

Вярхоўны суд Расіі адхіліў партыю «Яблоко» ад удзелу ў выбарах у Дзяржаўную думу: адзіную партыю з антываеннай пазіцыяй. Гэта азначае, што Масква не хоча спыняць вайну. У ISW тлумачаць, на чым заснаваная ўпэўненасць Пуціна ў перамозе. А Штаты гатовыя нанесці яшчэ адзін санкцыйны ўдар па РФ. Ідуць 1630-я суткі поўнамаштабнай вайны РФ супраць Украіны пры саўдзеле ў агрэсіі рэжыму Аляксандра Лукашэнкі.

На працягу мінулых сутак ва Украіне зафіксавана 212 баявых сутыкненняў, паведамляе Генштаб УСУ ў ранішняй зводцы 11 жніўня. 

На Канстанцінаўскім кірунку зафіксавана 26 атак у раёнах Канстанцінаўкі, Іллінаўкі і Іванаполля, а таксама ў кірунках Навасёлаўкі, Торскага і Мікалайполля.

На Пакроўскім кірунку абаронцы Украіны спынілі 25 атак у раёнах Біліцкага, Новааляксандраўкі, Котліна і Сяргееўкі, а таксама ў кірунках Кучарава Яра, Тарэцкага, Вольнага, Новага Данбаса, Светлага, Васільеўкі, Удачнага і іншых.

На Славянскім кірунку расійцы здзейснілі 15 штурмаў у раёнах Закітнага і Крывой Лукі, у кірунках Дронаўкі і Рай-Аляксандраўкі.

На Паўднёва-Слабажанскім кірунку ўкраінскія падраздзяленні адбілі 12 атак расіян у раёнах Старыцы, Лімана, Валахоўкі.

На Ліманскім кірунку армія РФ 10 разоў атакавала ў раёнах Лімана і Дзібровы, у кірунках Навасёлаўкі і Карпаўкі.

* * *

У ноч на 11 жніўня расійскія войскі нанеслі масіраваны камбінаваны ўдар па Запарожжы, прымяніўшы балістычныя ракеты і кіраваныя авіябомбы. У выніку атакі шэсць чалавек загінулі, 19 атрымалі раненні, у горадзе ўзніклі пажары і адбылося адключэнне электраэнергіі.

У ноч на 11 жніўня расійскія войскі нанеслі ўдар балістычнымі ракетамі па Кіеве. У выніку атакі пацярпеў як мінімум адзін чалавек.

У прыгарадзе расійскага Варонежа, у вёсцы Аляксандраўка Наваўсманскага раёна Варонежскай вобласці РФ, у ноч на 11 жніўня пасля выбухаў ўспыхнуў маштабны пажар на лагістычным комплексе маркетплейса Wildberries.

У расійскім Камсамольску-на-Амуры пасля атакі невядомых дронаў на досвітку 11 жніўня адбыўся пажар на Камсамольскім нафтаперапрацоўчым заводзе «Раснафты». Прадпрыемства знаходзіцца за 6700 км ад Украіны.

* * *

* * *

Кіраўнік РФ Уладзімір Пуцін не пойдзе на мірныя перамовы да таго часу, пакуль Расія мае магчымасць беспакарана наносіць ракетныя ўдары па Кіеве і іншых гарадах з-за вострага дэфіцыту ракет для Patriot, піша амерыканскі Інстытут вывучэння вайны (ISW).

ISW падкрэслівае катастрафічныя наступствы дэфіцыту ракет-перахопнікаў напярэдадні будучай зімы. ЗРК Patriot з'яўляецца пакуль адзіным сродкам, здольным збіваць расійскія балістычныя ракеты, аднак нястача боепрыпасаў пакідае ўкраінскае неба безабаронным.

Скарыстаўшыся гэтай уразлівасцю, Крэмль свядома пераарыентаваў абаронную вытворчасць на выпуск балістычных ракет. «Пераарыентацыя вытворчых намаганняў Расіі на выпуск балістычных ракет будзе спрыяць спробам Крамля выкарыстаць будучую зіму, каб зламаць волю Украіны да супраціву. У Крамлі лічаць, што змогуць скарыстацца дэфіцытам ракет-перахопнікаў ва Украіне, каб пазбегнуць неабходнасці ўступаць у змястоўныя перагаворы ці ісці на саступкі ў дачыненні да сваіх максімалісцкіх патрабаванняў», — адзначаюць у інстытуце.

У ISW падкрэсліваюць, што беспакаранасць балістычных атак пераконвае Пуціна ў эфектыўнасці яго «тэорыі перамогі»: здагадцы, што Расія можа выйграць вайну на знясіленне, калі расійскія войскі будуць неперарыўна аказваць ціск на фронце, а ракеты будуць наносіць удары па ўкраінскіх гарадах і інфраструктуры, знясільваючы рэсурсы Украіны і цярпенне Захаду.

* * *

Прэзідэнт Украіны Уладзімір Зяленскі 10 жніўня паўтарыў, што РФ атрымала ад КНДР дадатковую балістычную тэхніку і плануе размясціць на сваёй тэрыторыі дадатковы кантынгент.

«Гэта ўпершыню ў гісторыі Расіі, калі ў іх ужо няма бяспечнага стратэгічнага тылу. І гэта ўпершыню, калі яны не могуць ваяваць без папаўненняў з Паўночнай Карэі. Цяпер рыхтуюцца размясціць на сваёй тэрыторыі дадатковы кантынгент карэйцаў. Атрымалі дадатковую балістычную тэхніку з Паўночнай Карэі. І кожны ў свеце павінен разумець, што гэта азначае», — сказаў Зяленскі.

Ён адзначыў, што балістычная зброя з Паўночнай Карэі, як і іншая іх зброя, удасканальваецца дзякуючы супрацоўніцтву з Расіяй: «Чым больш тут у нас, ва Украіне, — у Еўропе — паўночнакарэйскіх траплянняў, тым часцей будуць прымяняцца іх ракеты і салдаты, чым больш яны будуць выпраўляць свае недахопы і няведанне, тым, адпаведна, будзе і больш небяспек у будучыні для Японіі, для Рэспублікі Карэя, для Філіпін і іншых краін рэгіёна».

* * *

Двухпартыйны законапраект Ліндсі Грэма аб санкцыях супраць Расіі і Ірана, раней падтрыманы Сенатам ЗША, унеслі ў Палату прадстаўнікоў.

Тэкст, унесены ў ніжнюю палату, цалкам ідэнтычны таму, што ўжо прайшоў Сенат — гэта важна, таму што калі палаты прымаюць розныя версіі дакумента, іх прыходзіцца ўзгадняць, што зацягвае працэс. Ідэнтычны тэкст азначае: як толькі Палата прадстаўнікоў прагаласуе за дакумент, ён адразу можа пайсці на подпіс прэзідэнту Дональду Трампу.

Дату галасавання пакуль афіцыйна не называлі, але з улікам шырокай двухпартыйнай падтрымкі — сярод суаўтараў больш за 15 кангрэсменаў ад абедзвюх партый — шанцы на прыняцце ацэньваюць як высокія.

Пасля подпісу прэзідэнта санкцыі набудуць моц, а

Законапраект уводзіць санкцыі супраць найбуйнейшых расійскіх банкаў, забараняе новыя амерыканскія інвестыцыі ў Расію і куплю расійскага дзярждлогу, а таксама б'е па «ценевым флоце», які перавозіць нафту ў абыход санкцый. Асобна дакумент дазваляе ўвесці пошліны да 500% на тавары з Расіі і да 100% — на тавары з краін, якія найбольш купляюць расійскую нафту ці газ або дапамагаюць абыходзіць санкцыі. Таксама працягваецца дзеянне Закона аб санкцыях супраць Ірана да 2031 года.

* * *

Вярхоўны суд Расіі адхіліў партыю «Яблоко» ад удзелу ў выбарах у Дзяржаўную думу. Суд задаволіў пазоў аб адхіленні партыі, падтрымаўшы адпаведнае зварот партыі «Родина». Зняць «Яблоко» з выбараў таксама патрабавала Генеральная пракуратура РФ.

Справу разглядаў суддзя Вячаслаў Кірылаў. У красавіку 2026 года ён прыняў рашэнне аб прызнанні «экстрэмісцкім» міжнароднага грамадскага руху «Мемарыял».

«Яблоко» было адзінай партыяй з антываеннай пазіцыяй на парламенцкіх выбарах у РФ. «Родина» абвінаваціла прадстаўнікоў палітсілы ў падтрымцы ЛГБТ, закліках да «экстрэмісцкай дзейнасці», а таксама да парушэння тэрытарыяльнай цэласнасці РФ.