У доме Валерыя і Веранікі Цапкала ў Мінску ператрус

Хто яго праводзіць і ў рамках якой справы, муж і жонка не ведаюць, паведамілі яны TUT.BY.

— Хто праводзіць ператрус, мы не ведаем, відавочна, што гэта палітычная замова. У доме прысутнічаюць нашы сваякі, але падрабязнасцяў мы не ведаем, — распавяла Вераніка Цапкала.
Нагадаем, 24 ліпеня экс-прэтэндэнт у прэзідэнты Валерый Цапкала з'ехаў з Беларусі і павёз з сабой дзяцей. Па словах Цапкала, яго папярэдзілі сябры ў праваахоўных органах аб тым, што дадзеная каманда аб яго арышце. Акрамя таго, да дзяцей, па словах мужа і жонкі, у школу прыйшлі работнікі пракуратуры і пачалі ў настаўнікаў, завуча, дырэктара школы патрабаваць, каб яны падпісвалі нейкія паперы ў дачыненні да аднаго з дзяцей Цапкала. Генпракуратура адрынула гэтыя здагадкі.
9 жніўня стала вядома, што Вераніка Цапкала таксама пакінула Беларусь.
Да гэтага, у канцы чэрвеня МУС Беларусі пачало праверку па заяве бізнэсмена Сядата Ігдзеджы пра факты «супрацьпраўнай дзейнасці Валерыя Цапкала». У пісьмовым каментары, разасланым па СМІ, Ігдзеджы сцвярджаў, што яго заява не звязана з палітыкай і ён проста хоча «вярнуць свае грошы».
Прэтэндэнт у кандыдаты ў прэзідэнты Валерый Цапкала звярнуўся ў пракуратуру з нагоды, як ён лічыць, ілжэсведчання Сядата Ігдзеджы ў яго адрас.
Атрымаць аператыўны каментар у КДБ і МУС не ўдалося. У Камітэце Дзяржкантролю сказалі, што ператрус праводзяць не іх супрацоўнікі.
У Следчым камітэце TUT.BY сказалі, што пакуль не могуць ні пацвердзіць, ні абвергнуць інфармацыю.
— Разбіраемся, — сказалі ў прэс-службе СК.