427-мы дзень вайны. Украінскія памежнікі «троляць» беларускіх калег

Расійскія войскі крыху прасунуліся ў Бахмуце, але не ўзялі горад поўнасцю і не атачылі яго. Армія РФ па-ранейшаму ваюе з грамадзянскім насельніцтвам. А ў Палаце прадстаўнікоў ЗША, падобна, не сумняюцца ў перамозе Украіны. Сабралі галоўнае на раніцу 26 красавіка.

Бахмут

Расійцы працягваюць наступаць на трох кірунках, нягледзячы на значныя страты, а таксама наносяць удары па грамадзянскіх аб'ектах. Армія РФ засяроджвае асноўныя намаганні на вядзенні наступальных дзеянняў на Бахмуцкім, Аўдзееўскім і Мар'інскім напрамках, паведаміў Генеральны штаб УС Украіны ў ранішняй зводцы 26 красавіка.

За мінулыя суткі УСУ адбілі 39 атак праціўніка на названых участках фронту. Самыя жорсткія баі працягваюцца за Бахмут і Мар'інку.

Амерыканскі Інстытут вывучэння вайны (ISW) у чарговай зводцы-аналізе пацвярджае тое, пра што расійскія і ўкраінскія крыніцы казалі ў апошнія тры дні: атрады ПВК «Вагнер» прасунуліся за чыгунку, якая перасякае горад з поўначы на поўдзень.

Пад кантролем украінцаў застаецца заходняя частка горада працягласцю з усходу на захад каля двух кіламетраў (агульная працягласць Бахмута з усходу на захад — каля сямі кіламетраў).

«Геалакаваная здымка, апублікаваная 24 красавіка, паказвае, што сілы "Вагнера" нязначна прасунуліся наперад на паўднёвым захадзе ад станцыі Бахмут-2 у заходнім Бахмуце», — піша ISW.

Далей аўтары зводкі пераказваюць паведамленні расійскіх вайсковых блогераў, якія паведамлялі аб прасоўванні вагнераўцаў ад вакзала, баі за які ішлі некалькі дзён, далей на захад.

Міністэрства абароны Вялікабрытаніі ў Twitter адзначае, што ключавой падзеяй апошняга тыдня сталі баі на ўскраінах горада, асабліва каля вёскі Хромава, паколькі Украіна імкнецца захаваць кантроль над сваім маршрутам забеспячэння.

Па даных брытанскай выведкі, іншыя магчымасці Украіны па папаўненні запасаў у Бахмут, верагодна, ускладняюцца брудам на грунтавых дарогах.

«Паколькі горад падвяргаецца нападам ужо больш за 11 месяцаў, украінская абарона Бахмута стала адным з элементаў значна больш глыбокай абарончай зоны, у якую ўваходзіць горад Часаў Яр на захадзе», — гаворыцца ў Мінабароны Брытаніі.

Памежнікі «хуліганяць»

На Валынскім і Палескім кірунках аператыўная сітуацыя без істотных змен, прыкмет фарміравання наступальных груповак ворага не выяўлена, паведамляе Генштаб Украіны.

Аднак украінскія памежнікі знаходзяць усё больш крэатыўныя спосабы тролінгу беларускіх калегаў. Яны пачалі ўключаць сігнал паветранай трывогі на мяжы з Беларуссю ў Жытомірскай і Ровенскай абласцях. Адпаведнае відэа ў аўторак, 25 красавіка, апублікавала Дзяржпамежслужба Украіны.

«Такія захады накіраваныя на тое, каб суседзі, якія яшчэ не вызначыліся, на чыім яны баку, усё ж разумелі, што калі сігнал трывогі раздаецца некалькі разоў удзень і ўначы, гэта жудасна», — заявілі памежнікі.

Украінскія памежнікі рэгулярна троляць сваіх беларускіх калегаў. У сакавіку ўкраінцы павесілі на мяжы з Беларуссю макет жаўнера РФ, якога назвалі «Валерам». Перад гэтым на мяжы паднялі бел-чырвона-белы сцяг. А ў лютым памежнікі Беларусі скардзіліся на «непрыстойныя жэсты» ад украінцаў.

Абстрэлы грамадзянскіх

Войскі РФ у ноч на 26 красавіка здзейснілі абстрэл Запарожскай вобласці. Зафіксавана разбурэнне. Пра гэта паведаміў кіраўнік Запарожскай вобласці Юрый Малашка. Вораг здзейсніў 67 удараў па 19 мірных абшчынах: 53 артабстрэлы, шэсць нападаў з РСЗА, сем — з ужываннем БПЛА і адзін авіяўдар. Па яго словах, абышлося без пацярпелых.

За мінулыя суткі армія РФ 75 разоў абстраляла Херсонскую вобласць. Пра гэта 26 красавіка паведаміў кіраўнік абласной вайсковай адміністрацыі Аляксандр Пракудзін. Ён адзначыў, што вораг выпусціў па жылых кварталах гарадоў і вёсак рэгіёна 389 снарадаў з цяжкай артылерыі, БПЛА і авіяцыі. Трапіў, у прыватнасці, у будынак царквы і краму ў Белаазёрскай суполцы. Херсон трапіў пад агонь 11 разоў.

«Праз расійскую агрэсію адзін чалавек атрымаў раненні», — сказаў кіраўнік рэгіёна.

За мінулыя суткі расійскія акупанты ажыццявілі абстрэл чатырох памежных абшчын Сумскай вобласці — Хоцінскай, Белапольскай, Юнакаўскай і Эсманскай. Зафіксавана 70 прылётаў з мінамётаў, артылерыі, гранатамётаў. На жаль, ёсць разбурэнні.

Вакол вайны

Аналітыкі Інстытута вывучэння вайны (ISW) у сваёй справаздачы пішуць, што расійскія ультранацыяналісты выступаюць за вяртанне сталінскіх рэпрэсій і спадзяюцца на іх узмацненне. Напрыклад, яны неаднаразова заклікалі Крэмль нацыяналізаваць маёмасць, што належыць расійцам, якія здраджваюць краіне, а таксама аднавіць у Расіі смяротнае пакаранне.

Але, нягледзячы на гэтыя заклікі, Крэмль працягвае пазбягаць адкрытых рэпрэсіўных захадаў праз боязь за стабільнасць пуцінскага рэжыму. Таму ўрад РФ адклікаў з Дзярждумы законапраект, які прадугледжваў павелічэнне падаткаў з 13 да 30% для ўцеклых з краіны расійцаў.

«Пуцін, хутчэй за ўсё, не наважваецца разбурыць свой імідж дыпламатычнага і памяркоўнага цара», — мяркуюць у ISW.

У Вашынгтоне прадставілі двухпартыйны праект рэзалюцыі ніжняй Палаты прадстаўнікоў ЗША «Аб пазіцыі Палаты прадстаўнікоў адносна ўмоў перамогі Украіны».

Праект рэзалюцыі быў урачыста прадстаўлены на Капіталійскім узгорку. У дакуменце адзначаецца, што Палата прадстаўнікоў ЗША:

1. пацвярджае, што палітыка Злучаных Штатаў заключаецца ў тым, каб Украіна перамагла ўварванне (РФ-рэд.) і аднавіла свае міжнародна прызнаныя межы 1991 года;
2. лічыць, што свет пасля перамогі Украіны павінен быць забяспечаны шляхам інтэграцыі Украіны ў НАТА і іншыя еўраатлантычныя інстытуты, што адпавядае доўгатэрміновай палітыцы Злучаных Штатаў;
3. заяўляе, што Злучаныя Штаты павінны працаваць са сваімі саюзнікамі і партнёрамі, каб гарантаваць:

• выплату РФ рэпарацый Украіне;
• дапамогу сусветнай супольнасці ў аднаўленні Украіны;
• прыцягненне кіраўніцтва РФ да адказнасці за гэтую захопніцкую вайну;
• аднаўленне справядлівасці для ахвяр злачынстваў, учыненых РФ падчас яе ўварвання.

Паводле ВВС; Карэспандэнт; Украінская праўда; РБК-Украіна