Беларускага амбасадара выклікалі ў МЗС Германіі

Берлін "адназначна прымае бок людзей у Беларусі, якія імкнуцца да свабоды, дэмакратыі і палітычных зменаў", заявіў у панядзелак, 31 жніўня, афіцыйны прадстаўнік урада ФРГ Штэфен Зайберт (Steffen Seibert).

Ён назваў "сапраўды ўражлівай" "мужнасць многіх тысяч людзей", якія "і праз тры тыдні пасля выбараў прэзідэнта не даюць запалохаць сябе бесперапыннымі рэпрэсіямі" з боку Аляксандра Лукашэнкі і "яго спецпадраздзяленняў".
Лукашэнку пара "прызнаць сапраўдны стан рэчаў", працягнуў Зайберт. Ён адзначыў, што Беларусь мае патрэбу ў адкрытым дыялогу з удзелам кіраўніцтва краіны, сіл апазіцыі і ўсяго беларускага грамадства, і Арганізацыя па бяспецы і супрацоўніцтву ў Еўропе (АБСЕ) гатова адыгрываць ролю пасярэдніка ў такім дыялогу.

Беларускі амбасадар у Берліне выкліканы ў МЗС Германіі

31 жніўня беларускі амбасадар у Берліне быў выкліканы ў МЗС Германіі ў знак пратэсту супраць жорсткіх дзеянняў праваахоўнікаў у дачыненні да журналістаў, у тым ліку нямецкіх, адзначае агенцтва dpa, учыненых падчас пратэстаў.
Намеснік прэс-сакратара МЗС ФРГ Крыстафер Бургер (Christopher Burger) заявіў, што 21 і 22 жніўня ў Беларусі шэраг прадстаўнікоў СМІ "затрымалі ў адвольным парадку і без якой-небудзь прававой падставы".
У Беларусі ўжо некалькі тыдняў не заціхаюць акцыі пратэсту і страйкі, якія пачаліся пасля прэзідэнцкіх выбараў 9 жніўня. Па версіі ЦВК, перамогу з вынікам 80 адсоткаў галасоў атрымаў Аляксандр Лукашэнка, яго галоўны апанент Святлана Ціханоўская не прызнала афіцыйныя вынікі выбараў.
Толькі ў першыя дні, па афіцыйных дадзеных, былі затрыманыя амаль 7000 чалавек, некалькі чалавек загінулі. Адразу пасля выбараў у Беларусі быў фактычна заблакаваны інтэрнэт, сілавікі пры разгоне дэманстрантаў праяўлялі беспрэцэдэнтную жорсткасць.
Паводле belaruspartisan.by