Бункеры «Азоўсталі» змогуць вытрымаць прамое траплянне ядзернай бомбы — гендырэктар завода

Гендырэктар "Азоўсталі" распавёў, што мінімальная таўшчыня паміж паверхняй зямлі і столлю падземных тунэляў складае 8 метраў, а бамбасховішчы — значна глыбей.

Кіраўніцтва завода "Азоўсталь" у Марыупалі паведаміла, што пяць бамбасховішчаў на тэрыторыі прадпрыемства здольныя вытрымаць прамое траплянне ядзерных боезарадаў. Пра гэта заявіў генеральны дырэктар Металургічнага камбінату "Азоўсталь" Энвер Цкіцішвілі, піша УНІАН.

Ён адзначыў, што кіраўніцтва пачало задумвацца пра бамбасховішчы яшчэ ў 2014 годзе, калі Марыупаль трапіў пад абстрэл цяжкай артылерыі.

"Мы пачалі аднаўляць бамбасховішчы, якія засталіся з часоў Савецкага Саюза. І звярнулі ўвагу, што іх было 36 штук, і адначасова ў іх маглі знаходзіцца 12 006 чалавек", — распавёў ён, і дадаў, што на заводзе працавала 10 847 чалавек. "Зразумелі, што мы можам з горада паклікаць людзей, якія прыйдуць і будуць ратавацца", — распавёў Цкіцішвілі.

"Мы адкрылі архівы... убачылі, што на камбінаце... было 5 вельмі магутных бамбасховішчаў, якія вытрымлівалі, згодна з нормамі савецкага заканадаўства... траплянне аднаго прамога ядзернага ўдару. Яны маглі вытрымаць і выратаваць людзей", — распавёў ён.

Гендырэктар дадаў, што мінімальная таўшчыня паміж паверхняй зямлі і столлю падземных тунэляў складае 8 метраў, але па яго словах, гэта камунікацыйныя тунэлі, якія з'яўляюцца пераходамі паміж рознымі бункерамі, а самі бамбасховішчы знаходзяцца глыбей.

Цкіцішвілі сказаў, што супрацоўнікі завода напярэдадні ўварвання Расіі ва Украіну стварылі вельмі вялікія запасы пітной вады і харчавання ў бункерах, што дазваляе доўгае пражыванне ў іх. Ён перакананы, што гэта дапамагло абаронцам Марыупаля і цывільным утрымацца пад прамымі бамбаваннямі расійскіх акупантаў.

Акрамя таго, ён сказаў, што ў цяперашні час у падземных бамбасховішчах завода да гэтага часу знаходзяцца каля 300 цывільных асоб, сярод іх 30-40 — дзеці. Акрамя таго, большая частка людзей маюць цяжкія раненні і ім патрэбна кваліфікаваная медыцынская дапамога.

Цкіцішвілі распавёў, што ФСБ РФ спрабавала дапытваць супрацоўнікаў “Азоўсталі”, якіх сілком дэпартавалі на тэрыторыю, падкантрольную расіянам. Войскі РФ хацелі даведацца ў работнікаў завода, дзе праходзяць камунікацыі бункераў і як уладкаваныя ўваходы і выхады ў бамбасховішчы. Аднак, са слоў Цкіцішвілі, супрацоўнікі рабілі выгляд, што мелі пасады, што не прадугледжвалі наяўнасць пропуску на рэжымныя аб'екты.