Клічко: Пагроза захопу Кіева застаецца

Умацаванне ўкраінскай сталіцы, павышэнне яе абараназдольнасці ў выпадку верагодных нападаў ворага працягваецца, заявіў мэр Кіева.

Кіеў быў і застаецца мэтай агрэсара. Пра гэта заявіў гарадскі галава Віталь Клічко ў інтэрв'ю «Голасу Амерыкі».

«Кіеў — гэта сэрца. Кіеў — гэта сталіца. І таму мы робім усё для таго, каб прадугледзець розныя сцэнары, нават найгоршы, для таго, каб, калі хтосьці зможа і захоча (зможа — гэта вялікае пытанне) зноў атакаваць Кіеў, яму даць па зубах», — сказаў Клічко.

Клічко адзначыў, што горад добра ўмацаваны, і работы па яго абароне ад верагоднага нападу працягваюцца.

«Цяпер горад абаронены значна лепш, чым месяц таму, чым паўгода таму, тым больш, чым год таму», — падкрэсліў Клічко.

«Цяпер сістэма кантролю, сістэма блокпастоў, сучаснае ўзбраенне, і ўжо ў нас Узброеныя сілы значна мацнейшыя, чым год таму», — дадаў ён.

Уладзімір Зяленскі наведаў беларуска-ўкраінскую мяжу і паглядзеў, як будуюцца ўмацаванні на памежжы.

Таксама прэзідэнт суседняй дзяржавы паведаміў, што Украіна атрымала сістэму супрацьпаветранай абароны «Patriot» ад Злучаных Штатаў, Германіі і Нідэрландаў.

Таму Украіна ўжо на сённяшні дзень мае сур'ёзныя сістэмы для абароны неба, але неўзабаве яны будуць яшчэ больш магутныя, заявіў Зяленскі ў сваім учорашнім відэазвароце.

«Сістэмы СПА і іншая зброя для абароны неба ўжо цяпер у нас ва Украіне вельмі сур'ёзныя. Але павінны быць і, упэўнены, будуць яшчэ больш магутныя», — заявіў кіраўнік Украіны.

Таксама трэба згадаць, што пасля поўнамаштабнага ўварвання РФ ва Украіне запусцілі праграму-дадатак «Паветраная трывога», які інфармуе аб небяспецы.

Паводле korrespondent.net