«Крэмль дыскрэдытуе Пекін». Расія наладжвае пастаўкі кітайскіх беспілотнікаў у абыход кіраўніцтва КНР
Кітайскія кампаніі працягваюць пастаўляць у Расію камплектуючыя, ваенную тэхніку і тавары падвойнага прызначэння. Пастаўкі здзяйсняюцца нягледзячы на санкцыі і насуперак афіцыйнай пазіцыі Пекіна, які дэкларуе нейтралітэт у пытанні расійска-ўкраінскай вайны, паведамляе Інстытут даследаванняў глабальных пагроз і дэмакратыі Роберта Лэнсінга (RLI).
Беспілотнікі «Shahed»
Па даных аналітыкаў RLI, нягледзячы на задэклараваную афіцыйным Пекінам палітыку нейтралітэту ў дачыненні да расійска-ўкраінскай вайны, кітайскія кампаніі працягваюць пастаўляць у Расію камплектуючыя, ваенную тэхніку і тавары падвойнага прызначэння ў абыход санкцыйных абмежаванняў. Для забеспячэння закупак дэфіцытных тавараў і камплектуючых, з высокай доляй верагоднасці, Масква выкарыстоўвае каналы ваеннай разведкі.
Гэтым разам, як стала вядома RLI, адна з кітайскіх кампаній падахвоцілася паставіць дзяржаве-агрэсару тысячу БПЛА.
«Па нашых даных, кітайская кампанія «Shandong Buyun Aviation Technology Co., Ltd» плануе паставіць у Расію 1000 дронаў. Замовай на вытворчасць дронаў і лагістычнымі пытаннямі, звязанымі з іх выкарыстаннем, будзе займацца ганконгская гандлёвая кампанія SGGI Limited (3/F, Workingston Tower, 78 Bonham Strand, Sheung Wan, HK), якая, хутчэй за ўсё, звязана з расійскай выведкай, яна ж возьме на сябе лагістычныя пытанні па іх дастаўцы з КНР у Расію», — адзначана ў паведамленні.
У RLI таксама адзначылі, што дроны ў разабраным выглядзе спачатку будуць перапраўляць у Казахстан у асобных скрынях, а адтуль яны адправяцца ўжо на тэрыторыю РФ.
«Такім чынам, схема паставак сведчыць пра тое, што ўрад Казахстана не перашкаджае, а хутчэй падтрымлівае Маскву ў стварэнні схем пераадолення санкцый, якія перашкаджаюць пастаўкам зброі ў Расію. Адпаведна, Астана свядома парушае санкцыйны рэжым і правілы экспартнага кантролю, верагодна, з-за пранікнення расійцаў у сістэму прыняцця рашэнняў на вышэйшым узроўні», — лічаць аналітыкі.
Па даных RLI, кантакты паміж РФ і вытворцам дронаў былі ўсталяваны яшчэ ў лютым 2023 года. Тады бакі дамовіліся аб пастаўцы ў красавіку ў Расію партыі са 100 БПЛА. Пры гэтым выкарыстоўваліся схемы непрамых паставак, выбудаваныя вайсковай выведкай РФ.
Гаворка пры гэтым, мяркуюць аналітыкі, ідзе не пра выведвальныя БПЛА, а пра кітайскія дроны-камікадзэ.
«Хутчэй за ўсё, дамоўленасці датычацца мадэлі беспілотніка ZT-180, які здольны несці карысную нагрузку масай 35-50 кг. Мяркуючы з усяго, дрон з'яўляецца «блізкім клонам» іранскага «Shahed-136», які шырока выкарыстоўваецца Расіяй ва Украіне. Расія, хутчэй за ўсё, будзе выкарыстоўваць ZT-180 сапраўды гэтак жа, як яна разгарнула іранскія дроны-камікадзэ «Shahed» (131 і 136) ва Украіне», — сказана ў паведамленні.
Гэтыя дроны прайшлі выпрабаванні падчас вайсковых вучэнняў. Там, па даных кітайскіх крыніц, яны прадэманстравалі «першакласную» тэхнічную моц. Цяпер жа на чарзе, імаверна, выпрабаванні на полі бою ва Украіне. Кітайцаў цікавіць, ці сапраўды іх дроны-камікадзэ могуць канкурыраваць з іранскімі «братамі» ў нанясенні ўдараў па ваенных і грамадзянскіх цэлях ва Украіне.
Глядзіце таксама
«Аналагічная далёкасць дзеяння ZT-180 будзе азначаць, што беспілотнікі кітайскай вытворчасці змогуць цалкам камфортна паражаць ключавыя цэлі на тэрыторыі Украіны, уключаючы Кіеў. Падабенства параметраў іранскіх і кітайскіх дронаў можа сведчыць, што Масква дае Кітаю іранскія тэхналогіі для распрацоўкі аналагічных дронаў па выгаднай цане, паколькі ў Пекіна, у адрозненне ад Тэгерана, няма праблем з тэхналагічнымі кампанентамі. Такім чынам, аднаўленне перамоў з Кітаем можа сведчыць аб незадаволенасці Масквы вытворчымі магутнасцямі Ірана», — прыйшлі да высновы аналітыкі RLI.
Пры гэтым яны падкрэслілі, што не маюць пацвярджэнняў таго, што ў пагадненні ўдзельнічалі афіцыйныя ўлады КНР. Аналітыкі лічаць больш верагодным, што расійцы звярнуліся наўпрост да вытворцы і прапанавалі яму здзелку праз ганконгскую фірму-пасрэдніка ў інтарэсах Казахстана.
Акрамя таго, удакладняюць у RLI, яшчэ ў пачатку гэтага года з'явіліся прыкметы таго, што ў згаданай кампаніі могуць быць планы па стварэнні вытворчай пляцоўкі для дронаў у Расіі, дзе можна будзе вырабляць да 100 адзінак у месяц. Аднак, падкрэсліваюць аналітыкі, істотныя карэктывы ў гэтыя планы могуць унесці перамовы паміж Пекінам і Вашынгтонам.
У RLI нагадалі аб нядаўна ўведзенай Кітаем забароне на экспарт беспілотнікаў, якія могуць выкарыстоўвацца для вайсковых мэт. І Расія тут жа пачала шукаць спосабы абысці забароны праз трэція краіны і з выкарыстаннем шчылін у забаронах.
«Нельга выключыць, што некаторыя прадстаўнікі кітайскага ўрада ведаюць аб канчатковым пункце прызначэння паставак беспілотнікаў, але вырашылі не ўмешвацца. Такім чынам, пагадненне з «Shandong Buyun Aviation Technology Co.», магчыма, было карупцыйнай прапановай расійскай разведкі, якая спрабавала набыць ваенныя беспілотнікі ў абыход забароны кітайскага ўрада. Гэта дазволіла Маскве зменшыць залежнасць ад Пекіна, а супрацоўнікам выведкі атрымаць прыбытак», — рэзюмавалі ў RLI, дадаўшы, што падобнымі дзеяннямі Крэмль дыскрэдытуе Пекін.
Паводле Белнавінаў
Глядзіце таксама
