«Развал Украіны» стане прыніжэннем для ЗША, большым за Афганістан

Уільям Хейг, які займаў пасаду міністра замежных спраў Вялікабрытаніі з 2010 па 2014 гады, кажа, што Пуцін хоча знішчыць Украіну як дзяржаву, а не проста захапіць частку яе тэрыторыі: «[Пуцін] хоча ўсю Украіну, і прынамсі ён хоча настолькі, каб тое, што засталося, не магло функцыянаваць як суверэнная дзяржава, каб яна не магла стаць членам ЕС, NATO».

Калі Злучаныя Штаты пакінуць Украіну, гэта будзе яшчэ большым прыніжэннем для Амерыкі, чым пакінуць Афганістан, лічыць экс-міністр замежных спраў Вялікабрытаніі Уільям Хейг, піша www.holosameryky.com.

У падкасце брытанскай газеты The Telegraph Хейг заявіў, што калі будучая адміністрацыя абранага прэзідэнта Дональда Трампа дазволіць здарыцца «развалу Украіны», гэта будзе мець наступствы для аўтарытэту Амерыкі ў свеце і здольнасці Злучаных Штатаў прадухіліць будучыя канфлікты.

«Трамп крытыкуе [палітыку] Байдэна ў Афганістане, хаатычны выхад, тое, як ЗША пакінулі краіну тры гады таму, але калі ён сам прывядзе да краху Украіны, гэта будзе значна большым прыніжэннем для ЗША, для моцы Злучаных Штатаў у свеце за здольнасць стрымліваць будучы крызіс вакол Тайваня», — сказаў Хейг у інтэрв'ю The Telegraph Daily podcast.

«У асабістых інтарэсах [Дональда] Трампа падтрымліваць уладу Захаду ў свеце», — дадаў Хейг.

Адміністрацыя Байдэна вывела амерыканскія войскі з Афганістана ў 2021 годзе — пасля 20 гадоў вайны ў гэтай краіне. Многія назіральнікі палічылі аперацыю хаатычнай, бо яна дазволіла талібам захапіць уладу ў Кабуле і вярнуць краіну пад свой кантроль.

Хейг перасцерагае адміністрацыю Трампа ад спадзяванняў на «хуткае ўрэгуляванне» вайны або «ўрэгуляванне яе на ўмовах, выгадных для Расіі». Паводле слоў дыпламата, замарожванне вайны на лініі судакранання азначала б стварэнне асновы для новай вайны.

«Гэта прывядзе да яшчэ адной, трэцяй вайны, таму што Пуцін зноў прыйдзе за тым, што засталося», — упэўнены Хэйг у планах прэзідэнта Расіі Уладзіміра Пуціна.

Адказваючы на пытанне вядоўцы газеты The Telegraph аб тым, ці хоча Пуцін заваяваць усю Украіну, Хейг сказаў:

«Я думаю, што гэта вельмі ясна, ён хоча ўсю Украіну. Прынамсі, ён хоча настолькі, каб тое, што засталося, не магло функцыянаваць як суверэнная дзяржава, каб яно не магло стаць членам ЕС, NATO, каб яно не магло даваць крэдыты, атрымліваць грошы на аднаўленне сваіх гарадоў, то-бок, каб гэта не была функцыянальная дзяржава».

На яго думку, у гэтай вайне вырашаецца пытанне не пра тое, дзе будзе праходзіць мяжа, а пра тое, ці зможа ў выніку Украіна функцыянаваць як дзяржава.

Паводле яго слоў, без надзейных гарантый бяспекі з боку ЗША і NATO Украіна не зможа існаваць як дзяржава, не зможа «спыніць Пуціна праз два гады, пасля таго як ён адбудуе свае ўзброеныя сілы і вернецца за астатнімі».

«Можна наіўна казаць, што мы ўсталюем мір за 24 гадзіны, але гэта не дапаможа, калі вы разбудоўваеце новую вайну», — лічыць Хейг.

Асцярогі, што ЗША могуць пакінуць Украіну, сталі гучаць у Еўропе пасля каментараў высокапастаўленых рэспубліканцаў падчас выбарчай кампаніі ў ЗША ў 2024 годзе, якія выступалі супраць дапамогі Украіне.

Нагадаем, падчас перадвыбарчай кампаніі Дональд Трамп казаў, што зможа спыніць вайну Расіі супраць Украіны за 24 гадзіны, прычым зробіць гэта яшчэ да сваёй інаўгурацыі, але не ўдакладніў, якім чынам ён плануе гэтага дасягнуць.

Афіцыйныя асобы ў Кіеве і еўрапейскія партнёры Украіны занепакоеныя абяцаннем Трампа. Яны хвалююцца, што Расія можа выкарыстаць час, каб перагрупавацца і нанесці ўдар па Украіне з новай сілай.

Па словах Хейга, калі б новая адміністрацыя ЗША спыніла дапамогу Украіне, ЕС і Вялікабрытанія павінны былі б павялічыць гэтую падтрымку. Пры гэтым ён папярэджвае, што еўрапейская дапамога не можа замяніць амерыканскую і з'яўляецца толькі часовай падтрымкай.

Бо гаворка ідзе не толькі аб фінансавай дапамозе, тут гуляе ролю тэхналагічная і ваенная моц ЗША, лічыць Хейг.

«Вайна пайшла ў такім кірунку, што без амерыканскіх спадарожнікаў і праграмнага забеспячэння ад амерыканскіх кампаній Украіна б не дажыла да цяперашняга моманту, — аналізуе былы брытанскі дыпламат, — у еўрапейскіх краін няма арсеналу зброі, каб падтрымаць Украіну ў поўнамаштабнай сучаснай вайне».

Але гэта тое, што яны павінны будуць рабіць, па меншай меры, пакуль сітуацыя не зменіцца, дадае Хейг.

Ён падкрэслівае, што гэта датычыцца не толькі Украіны — ніводная дэмакратыя ў свеце не змагла б абараніць сябе без дапамогі ЗША.

«Для любой дэмакратыі ў любым пункце свету, калі б краіна пацярпела ад працяглага нападу, было б вельмі цяжка выжыць без добрай волі і шчодрасці Злучаных Штатаў», — сказаў Хейг.

Паведамляецца, што абраны прэзідэнт ЗША прызначыў сваім наступным дзяржсакратаром сенатара Марка Рубіа, які выказаў падтрымку Украіне, але таксама падкрэсліў, што вайна павінна скончыцца.

Хейг, які быў міністрам замежных спраў Вялікабрытаніі падчас акупацыі Крыма, прызнае, што Захад зрабіў памылку, калі не адрэагаваў больш рашуча на дзеянні Расіі пасля захопу Крыма ў 2014 годзе.

Як нагадвае Хейг, яго краіна, якая на той момант яшчэ была членам Еўрасаюза, прапаноўвала ўзмацніць санкцыі супраць Расіі, у той час, як Берлін і Рым «усё яшчэ спадзяваліся неяк дамовіцца аб трывалым міры з Пуціным, і адгаварыць іх ад гэтага было цяжка».

«Але цяпер, вядома, азіраючыся на гэта, становіцца ясна, што Захад павінен быў быць значна больш жорсткім у гэтым», — сказаў Хейг.