Ва Украіне з'явіцца новы род войскаў?

Прэзідэнт Уладзімір Зяленскі даручыў Кабінету міністраў і Генштабу стварыць войскі беспілотных сістэм як асобную структуру ў складзе Узброеных сіл Украіны.

Пра гэта гаворыцца ва ўказе ўкраінскага прэзідэнта, паведамляе РБК.

Як тлумачыцца ва ўказе, стварэнне войскаў беспілотных сістэм неабходна для нарошчвання патэнцыялу Узброеных сіл Украіны.

«Кабінету міністраў Украіны з прыцягненнем Генеральнага штаба Узброеных сіл Украіны прапрацаваць пытанне аб стварэнні войскаў беспілотных сістэм як асобнага віду войскаў у структуры Узброеных сіл Украіны і на аснове па выніках працы ўнесці адпаведныя прапановы на разгляд Рады нацыянальнай бяспекі і абароны Украіны», — гаворыцца ва ўказе №51/2024.

Пазней Зяленскі ў відэазвароце заявіў, што стварэнне новага віду войскаў павінна даць цалкам канкрэтны вынік у бліжэйшы час.

«Дроны — беспілотныя комплексы — даказалі сваю эфектыўнасць у баях на зямлі, у небе і на моры. Украіна сапраўды змяніла сітуацыю з бяспекай у Чорным моры дзякуючы беспілотнікам. Адбіццё штурму на зямлі — гэта ў значнай ступені праца беспілотнікаў. Буйны вынік — маштабнае знішчэнне акупантаў і іх тэхнікі — гэта таксама беспілотнікі», — сказаў Зяленскі.

Паводле яго слоў, на дадзены момант пералік задач па стварэнні новых сіл зразумелы:

• спецыяльныя штатныя пасады для працы з беспілотнікамі;
• спецыяльныя падраздзяленні і іх эфектыўная падрыхтоўка;
• сістэматызацыя вопыту і пастаяннае маштабаванне вытворчасці і прыцягненне лепшых ідэй, лепшых спецыялістаў у гэтай галіне.

Прэзідэнт Зяленскі канстатаваў, што гэта сумесная задача і арміі, і Міністэрства абароны, і ўрада.

Нагадаем, ва Украіне ўжо ёсць Цэнтральнае ўпраўленне беспілотных сістэм. Яно створана для кіравання прымяненнем беспілотных і рабатызаваных паветраных, наземных і марскіх сістэм. А таксама яно мусіць ажыццяўляць кантроль за станам гатоўнасці воінскіх часцей Узброеных сіл, якія выкарыстоўваюць беспілотныя сістэмы, да выканання задач па прызначэнні, стратэгічным планаванні і каардынацыі прымянення.

Мільён беспілотнікаў FPV для УСУ

Яшчэ ў снежні мінулага года прэзідэнт Украіны Уладзімір Зяленскі заявіў, што ў 2024 годзе краіна плануе вырабіць і перадаць сваім абаронцам мільён беспілотнікаў. Пазней стала вядома, што гаворка ідзе толькі аб беспілотніках FPV.

Нядаўна паведамлялася, што Агенцтва па абаронных закупках Мінабароны плануе ў гэтым годзе заключыць кантракты на «сотні тысяч» беспілотнікаў.

Ці можа такая колькасць беспілотнікаў змяніць ход вайны?

Навошта дроны FPV патрэбны на перадавой?

Украінскія вайскоўцы масава запускаюць беспілотнікі FPV не ад добрага жыцця. Перш за ўсё, з-за адсутнасці артылерыйскіх снарадаў, кажуць украінскія ваенныя эксперты. 

Еўрапейскія партнёры не паспяваюць паставіць абяцаны мільён боепрыпасаў, а пакет дапамогі ЗША Украіне на 2024 год пакуль не зацверджаны. Усё гэта прымушае УСУ эканоміць рэсурсы. Сёння ў артылерыйскай дуэлі на адзін украінскі снарад прыходзіцца 5-7 расійскіх.

Як заявіў у інтэрв'ю агенцтву «Reuters» камандуючы аператыўна-стратэгічнай групоўкай «Таўрыя» Аляксандр Тарнаўскі, асабліва моцна адчуваецца недахоп боепрыпасаў калібру 122 і 152 мм.

«І сёння гэтыя праблемы ёсць па ўсёй лініі фронту. Тыя аб'ёмы, якія мы сёння маем, з улікам нашых патрэбнасцей недастатковыя», — сказаў ён.

Па словах намесніка міністра абароны Украіны Івана Гаўрылюка, часовым рашэннем могуць стаць беспілотнікі-камікадзэ.

«Што тычыцца боепрыпасаў для артылерыі, то гэтае пытанне будзе паўставаць і далей. Таму Украіна будзе вырашаць гэтыя пытанні шляхам стварэння магутнай вытворчасці БПЛА», — сказаў ён у інтэрв'ю BBC.

Ваенны эксперт, былы прэс-сакратар Генштаба Узброеных сіл Украіны Уладзіслаў Селязнёў у каментары РБК-Украіна патлумачыў, што многае залежыць ад аб'ёмаў вытворчасці, але нават вялікая колькасць БПВ пакрые недахоп у снарадах толькі часткова. 

У прыватнасці, беспілотнікі не здольны ўзламаць агнявыя пункты, бетонныя збудаванні і рубяжы абароны. Яны выступаюць хутчэй як «хірургічны інструмент» для кропкавага паражэння тэхнікі і ўзбраення праціўніка.

Партал «Мілітары» прыводзіць довады вайскоўца тэрытарыяльнай абароны з пазыўным «Турыст», які кіруе FPV-бамбавіком LuckyStrike ўкраінскай вытворчасці. Паводле яго слоў, «Шчасліўчык» (LuckyStrike) скідае боепрыпас масай да 1,5 кг з вышыні да 100 метраў і хуткасцю 60 км/г. Дзякуючы працы такіх беспілотнікаў можна выратаваць вайскоўцаў. І гэта важна, бо людзі на вайне застаюцца самым каштоўным рэсурсам.

Пры цяперашніх тэмпах Украіна здольная вырабляць 600 000 FPV у год. Каб выйсці на лічбу ў мільён, трэба павялічыць вытворчасць да 83 тысяч у месяц, гэта значыць на 60 працэнтаў.

«Гэта не так ужо і шмат. Мы ставім задачу, і яна павінна быць выканана, каб яны былі ў нашых войсках. Гэта не занадта вялікая лічба для перадавой, якая ў нас сёння ёсць... Што тычыцца вытворчасці, мы не бачым вялікіх праблем», — растлумачыў у эфіры агульнаўкраінскага тэлемарафону сакратар СНБА Аляксей Данілаў.

Паводле www.rbc.ua