На ўчастку ў Віцебску, дзе загадвалі перапісаць пратакол на карысць Лукашэнкі, правялі праверку. І што?

На выбарчым участку № 25 у Віцебску парушэнняў падчас прэзідэнцкіх выбараў не ўстаноўлена. Такі адказ прыйшоў на запыт TUT.BY з галоўнага ўпраўлення ідэалагічнай работы і па справах моладзі аблвыканкама. Нагадаем, менавіта з гэтага ўчастка ў сеціва патрапіла скандальны аўдыёзапіс з голасам, як мяркуецца, на той момант кіраўніка Кастрычніцкага раёна Віцебска Сяргея Сташэўскага, які прымусіў настаўнікаў перапісаць пратакол на карысць кандыдата Аляксандра Лукашэнкі.



У адказе за подпісам галоўнага ідэолага вобласці Генадзя Ягорава паведамляецца, што «цяпер Сяргей Віктаравіч Сташэўскі не працуе кіраўніком адміністрацыі Кастрычніцкага раёна Віцебска».

Згодна з інфармацыяй УУС аблвыканкама, «па выніках разгляду інфармацыі аб працы выбарчага ўчастка № 25 у Віцебску па выбарах прэзідэнта парушэнняў не ўстаноўлена».

Пра тое, што чыноўнік Сяргей Сташэўскі, які, як мяркуецца, 9 жніўня прымусіў настаўнікаў на выбарчым участку № 25 перапісаць пратакол галасавання на карысць кандыдата ў прэзідэнты Аляксандра Лукашэнкі, больш не з'яўляецца кіраўніком адміністрацыі Кастрычніцкага раёна Віцебска, стала вядома 1 кастрычніка.

Дзе і кім ён будзе працаваць, пакуль не вядома.

2 кастрычніка імя па бацьку і фота Сташэўскага прыбралі з раздзелу «Кіраўніцтва» на сайце адміністрацыі Кастрычніцкага раёна Віцебска.

Нагадаем, пасля выбараў у інтэрнэце з'явіўся аўдыёзапіс, на якім, як мяркуецца, былы кіраўнік Кастрычніцкага раёна Віцебска Сяргей Сташэўскі сустракаецца з чальцамі камісіі ўчастка № 25 у СШ № 44 пасля падліку галасоў і прымушае іх перапісаць пратакол, каб у кандыдата ў прэзідэнты Святланы Ціханоўскай засталося ўсяго 20%, хоць менавіта яна перамагла на гэтым участку.

17 жніўня, на сустрэчы з дэлегацыяй гараджан, якія мірна пратэставалі супраць вынікаў выбараў, губернатар Мікалай Шарстнёў заявіў, што ў дачыненні да Сяргея Сташэўскага праводзіцца праверка. Губернатар не ўдакладніў, хто яе ініцыяваў, — абласныя ўлады або сілавыя структуры. З адказу ўладаў TUT.BY стала зразумела, што праверку праводзіла міліцыя рэгіёну.

Паводле tut.by