Сачыце за логікай. Прапагандыст прадставіў доказ «перамогі» Лукашэнкі на выбарах 2020 году

У эфіры беларускага дзяржаўнага Першага каналу Дзьмітры Жук заявіў, што выбары 2020 году былі «рэальнымі» і прадставіў свой уласны доказ таго, што беларусы на іх падтрымалі Лукашэнку, піша «Св*бода».

У якасьці аргумэнта Жук прывёў сустрэчы высокапастаўленых лукашэнкаўскіх сілавікоў на дзяржаўных прадпрыемствах.

«Прэзыдэнт (так Жук называў Аляксандра Лукашэнку) накіроўвае найвышэйшых службовых асобаў сілавога блёку Беларусі да людзей расказваць пра рэальныя небясьпекі і пагрозы. І пры гэтым увогуле не баіцца, што абураныя гэтым людзі выйдуць на нейкія палітычныя мітынгі ці яшчэ нешта. А чаму? Бо гэта элемэнт даверу. І гэты элемэнт даверу падкрэсьлівае тое, што рэальнасьць выбараў 2020 году ў тым, што большасьць грамадзтва падтрымала», — сказаў Дзьмітры Жук у эфіры перадачы «Клюб рэдактараў».

Кіраўнікі сілавога блока адправіліся ў прапагандысцкі рэйд па буйных прадпрыемствах

Пасьля выбараў 2020 году ў Беларусі пачалася найбуйнейшая за гады незалежнасьці хваля палітычных рэпрэсіяў. Дзясяткі тысяч грамадзян былі асуджаныя ў адміністрацыйных працэсах, тысячы сталі фігурантамі крымінальных справах, сотні тысяч пакінулі краіну.

На дадзены момант, паводле праваабаронцаў, у беларускіх турмах знаходзіцца 1334 чалавекі, прызнаныя палітвязьнямі. У краіне ліквідавалі сотні недзяржаўных арганізацый і СМІ. Падчас судовых працэсаў беларусаў караюць за выказваньне меркаваньня ў форме лайка ў сацыяльных сетках або камэнтара.