У галоўнага рэдактара «Нашай нівы» праходзіць ператрус

Сёння ў кватэру галоўнага рэдактара «Нашай нівы» Ягора Марціновіча прыйшлі супрацоўнікі ўпраўлення ўласнай бяспекі МУС. Яны праводзяць ператрус, паведаміла ў Facebook ягоная жонка, журналістка TUT.by Адар’я Гуштын.

Паводле яе слоў, ператрус звязаны з артыкулам, размешчаным «Нашай Нівай». У ёй адзін з ды-джэяў пераменаў сцвярджаў, што да яго ў камеру падчас знаходжання ў ЦІП на Акрэсціна прыходзіў намеснік міністра МУС.

Паводле інфармацыі TUT.by, Ягор Марціновіч і Адар’я Гуштын знаходзяцца ў кватэры разам з сілавікамі. Імі прад'яўлена пастанова, верагодна, яно тычыцца правядзення ператрусу.

Нагадаем, гукарэжысёры Уладзіслаў Сакалоўскі і Кірыл Галанаў 6 жніўня ў скверы каля кінатэатра «Кіеў» ўключылі песню гурта «Кіно» «Пераменаў». Пасля гэтага іх затрымалі. Сакалоўскага і Галанава арыштавалі на 10 сутак за дробнае хуліганства і непадпарадкаванні патрабаванню службовай асобы.

Пасля вызвалення Уладзіслаў Сакалоўскі даў інтэрв'ю «Нашай ніве», у выніку якога і з’явіўся артыкул, дзе згадваўся намеснік міністра ўнутраных спраў. Пазней гукарэжысёра выклікалі на размову ў міліцыю і пагражалі ўзбуджэннем крымінальнай справы па артыкуле за паклёп. У выніку Сакалоўскі і Галанаў з’ехалі ў Літву.

Паводле REFORM.by