Калі Лукашэнка абвесціць мабілізацыю, мяжа будзе зачынена ў тую ж ноч

Арцём Шрайбман — пра тое, што азначаюць мабілізацыйныя мерапрыемствы ў Беларусі.

Арцём Шрайбман упэўнены, што ўсе дзеянні беларускага ваеннага кіраўніцтва, якое з пачатку вайны інтэнсіфікавала вучэнні, носяць выключна адміністрацыйную накіраванасць.

— Гэта падрыхтоўка на ўсялякі выпадак, — цытуе эксперт «Салідарнасць» са спасылкай на «Св*бода Premium». — Гэта не стрэльбы, не адпрацоўка нейкіх баявых дзеянняў, а адпрацоўка механізму мабілізацыі, прызыву, разгортвання і перакідання войскаў. Многія заходнія вайсковыя спецыялісты, якія сочаць за беларускім войскам з пункту гледжання таго, да чаго яна рыхтуецца, адзначаюць менавіта такую дэталь: апошнія месяцы яшчэ да мабілізацыі ў Расіі яно рыхтавалася менавіта да нейкіх патэнцыйных сцэнароў.

Аналітык адзначае, што ўсе гэтыя мерапрыемствы таксама нельга назваць «спектаклем для расійцаў», бо ў тых наўрад ці ёсць жаданне і час разбірацца ў тым, якія сігналы ім хоча паслаць Лукашэнка, правяраючы ваенкаматы ў Гомельскай вобласці.

— Таму гэта проста падобна на падрыхтоўку да сітуацыі, калі вайна, напрыклад, закране Беларусь ці будзе непазбежная, ці Лукашэнка адчувае, што на нейкім этапе яго могуць у гэтую вайну ўцягнуць. І каб хаця б дзяржаўная машына паказала сябе лепш, чым паказвае сябе ў Расіі. Я ўпэўнены, што калі ў Беларусі дойдзе да мабілізацыі, то мяжа будзе зачынена ў тую ж ноч. Не будзе такіх вольнасцяў, як у Расіі, дзе больш за мільён з'ехала. Так што гэта выглядае як падрыхтоўка да магчымага развіцця падзей, — яшчэ раз падкрэслівае Шрайбман.

Ён нагадвае, што многія праўладныя аналітыкі ў сваіх тэлеграм-каналах і інтэрв'ю з пачатку расійскай мабілізацыі адкрыта заклікаюць рыхтаваць Беларусь, грамадзян і структуры да вайны на ўсялякі выпадак.

— І я думаю, што гэтая ментальнасць перамагае. Гэта не кажа нам, што рэжым рыхтуецца дакладна ўступіць у вайну. Сумняваюся, што гэта ў планах, намеры і інтарэсах беларускай улады. Але што называецца змазваць аўтамат да гэтага моманту яны пачалі, — кажа Шрайбман.

На думку палітычнага аналітыка, гэтая вайскова-адміністрацыйная актыўнасць беларускага рэжыму цалкам рэзаніруе з тым пасылам, які транслююць лукашэнкаўцы і сам кіраўнік Беларусі: супакойцеся, нічога страшнага не адбываецца, мы не плануем уступаць у вайну, а ўсе нашы вайсковыя падрыхтоўкі і разгортванне расійскай групоўкі — гэта не папярэджанне магчымай пагрозы.

— Лукашэнка ўсё яшчэ спрабуе гуляць у пацыфізм на хатнюю аўдыторыю, разумеючы, што менавіта на пацыфізм у беларускім грамадстве кансалідаваны запыт. І калі ён уключыць мілітарызм і тую ж шарманку, якую завёў Уладзімір Пуцін, то гэта не зрэзануе з беларускім грамадствам і нават з яго прыхільнікамі. Таму я думаю, што гэтых вайскоўцаў адправілі ў працоўныя калектывы, каб не было адчування, што за спінамі людзей улада спрабуе ўцягнуць краіну ў вайну. І там паміж радкоў я бачу не пагрозу таго, што мы пойдзем прэвентыўна граміць полк Каліноўскага, а тое, што пагрозы ёсць, яны не такія страшныя, як могуць здавацца, і для таго, каб яны не сталі яшчэ страшней, мы трэніруемся і запрасілі рускіх. Так што гэта заспакойлівы меседж. А разводзіць паніку і мілітарызаваць грамадства сталі б інакш, — лічыць Арцём Шрайбман.