Як вынікі выбараў у ЗША адаб'юцца на падтрымцы Украіны
Ці змогуць прыхільнікі Дональда Трампа змяніць сітуацыю на франтах Украіны?
Цяперашні прэзідэнт ЗША Джо Байдэн і былы прэзідэнт Дональд Трамп
Гэтае пытанне займае першае месца ў Вашынгтоне. Ёсць асцярогі, што канец кантролю Дэмакратычнай партыі ў Кангрэсе і пашырэнне правоў і магчымасцей рэспубліканцаў-прыхільнікаў Дональда Трампа могуць прывесці да скарачэння амерыканскай дапамогі Украіне, піша «AP».
Нядаўна рэспубліканец Кевін Макарці, які прэтэндуе на пасаду спікера, папярэдзіў, што рэспубліканцы не падтрымаюць выпісванне «чыстага чэка» для Украіны, калі яны атрымаюць большасць.
Што ЗША паставілі Украіне на сённяшні дзень
З пачатку расійскага ўварвання ў лютым Кангрэс ухваліў выдзяленне Украіне дзясяткаў мільярдаў долараў на надзвычайную бяспеку і гуманітарную дапамогу. Адміністрацыя Байдэна таксама паставіла зброі і абсталявання на мільярды долараў з вайсковых запасаў.
У верасні заканадаўцы ўхвалілі каля 12,3 мільярда долараў дапамогі, звязанай з Украінай, у рамках законапраекта, які фінансуе федэральны ўрад да 16 снежня. У гэтую суму ўваходзіць дапамога ўкраінскім вайскоўцам, а таксама прадастаўленне магчымасці ўкраінскаму ўраду аказваць асноўныя паслугі сваім грамадзянам. І гэта ў дадатак да больш чым 50 мільярдаў долараў, прадугледжаных у двух папярэдніх законапраектах.
Моцная двухпартыйная падтрымка
Увесь гэты час фінансавая падтрымка Украіны падтрымлівалася абедзвюма партыямі Сената ЗША. Лідар Рэспубліканскай партыі Мітч Маконэл і Рычард Шэлбі, вядучы рэспубліканец у Камітэце па асігнаваннях, былі першымі і паслядоўнымі прыхільнікамі дапамогі Украіне. У апошнія дні іншыя рэспубліканцы, уключаючы сенатара Дж. Тома Котана з Арканзаса і Рыка Скота з Фларыды, адзначалі ў інтэрв'ю, што іх партыя рашуча падтрымлівае ўкраінцаў.
Аналагічная карціна і ў Палаце прадстаўнікоў, дзе ўкраінская дапамога карыстаецца падтрымкай большасці. Нават апублікаваны ў мінулым месяцы ліберальным крылом партыі ліст з просьбай да адміністрацыі Байдэна працягнуць дыпламатычныя перамовы з Расіяй быў хутка адкліканы пасля шквалу крытыкі з абодвух бакоў.
Прэзідэнт Джо Байдэн пасля выбараў у сераду выказаў надзею, што ён зможа працягнуць свой «двухпартыйны падыход» да падтрымкі Украіны. Ён сказаў, што мае намер запрасіць лідараў Кангрэса ад абедзвюх партый у Белы дом для абмеркавання таго, як «прасоўваць прыярытэты эканомікі і нацыянальнай бяспекі Злучаных Штатаў».
Правая апазіцыя набірае моц
Тым не менш Рэспубліканская партыя далёка не аднадушна падтрымлівае Украіну.
Некаторыя правыя заканадаўцы, асабліва тыя, хто прытрымліваецца філасофіі знешняй палітыкі Дональда Трампа, кажуць, што Злучаныя Штаты не могуць дазволіць сабе выдзяляць мільярды Украіне падчас рэкордна высокай інфляцыі ўнутры краіны.
Член Палаты прадстаўнікоў і ультракансерватыўнага «Камітэта свабоды» Марджары Тэйлар Грын заявіла на мітынгу прыхільнікаў Трампа ў Аёве, што «пры рэспубліканцах ніводзін пені не пойдзе ва Украіну». У Агаё рэспубліканец Джэй Дзі Вэнс, які толькі што выйграў гонку ў Сенат штата, правёў кампанію за спыненне фінансавай падтрымкі краіны, заявіўшы, што Кангрэс «павінен у рэшце рэшт спыніць паток грошай ва Украіну».
У сваю чаргу, Джо Байдэн падкрэсліў, што яго адміністрацыя не задаволіла ўсе просьбы ўкраінцаў, у тым ліку іх патрабаванне беспалётнай зоны, якая рызыкавала б уцягнуць Амерыку ў вайну.
Будучыня дапамогі
Нягледзячы на рост апазіцыі з боку правых, рызыка таго, што Кангрэс у бліжэйшы час спыніць фінансавую і ваенную падтрымку Украіны з боку Амерыкі, невялікая.
Большасць у Палаце прадстаўнікоў і Сенаце падтрымліваюць саюз з Украінай, заяўляючы, што гэта цана, якую варта заплаціць, каб абараніць саюзніка-дэмакрата і супрацьстаяць расійскай экспансіі.
І большасць амерыканцаў, якія прагаласавалі на прамежкавых выбарах, цвёрда падтрымалі ваенную і фінансавую падтрымку Украіны, сведчаць вынікі агульнанацыянальнага апытання. Прыкладна 4 з 10 лічаць падтрымку правільнай; 3 з 10 сказалі, што яна павінна быць больш актыўнай; 3 з 10 хацелі, каб ЗША давалі Украіне менш.
Тым не менш ясна, што захоп рэспубліканцамі Палаты прадстаўнікоў абцяжарыць вылучэнне дадатковай дапамогі Украіне.
Маючы на ўвазе гэтую рэальнасць, заканадаўцы з абодвух бакоў разглядаюць сесію пасля выбараў як магчымасць атрымаць мільярды долараў дадатковай ваеннай дапамогі для Украіны. Гэтая дапамога магла б быць уключана ў законапраект аб дзяржаўным фінансаванні на канец года і забяспечыць амерыканскую падтрымку на месяцы наперад.
А як рэагуюць на гэта ва Украіне?
Тым часам украінскія афіцыйныя асобы ўважліва сочаць за вынікамі выбараў у ЗША. Міністр абароны Украіны Аляксей Рэзнікаў заявіў, што не чакае паслаблення амерыканскай падтрымкі.
«Я неаднаразова сустракаўся з прадстаўнікамі Сената і Кангрэса, і кожны раз дэлегацыі былі двухпартыйнымі, — сказаў Рэзнікаў на прэс-канферэнцыі. — Я выдатна разумею, што падтрымка Злучаных Штатаў таксама застанецца двухпартыйнай і двухпалатнай».
Юлія Свірыдзенка, міністарка гандлю і эканамічнага развіцця Украіны, у сваю чаргу, адзначае, што, нягледзячы на падтрымку ЗША, краіна актывізуе намаганні па скарачэнні выдаткаў. Свірыдзенка сказала, што амерыканскія афіцыйныя асобы не аказвалі ціск на Украіну — украінскія лідары ведаюць, што яны павінны зрабіць больш для стабілізацыі сваёй эканомікі.
На пачатку вайны Украіна рабіла стаўку на хуткае атрыманне вайсковай дапамогі ад сваіх хаўруснікаў. «Але мы разумеем, што аднойчы нам зноў давядзецца спадзявацца на саміх сябе», — заявіла Свірыдзенка.