481-шы дзень вайны: Украіна вярнула Пяціхатку, Расія працягвае атрымліваць удары па сваёй тэрыторыі

Сабралі самае істотнае, што адбылося на вайне да гэтай гадзіны.

Намеснік міністра абароны Украіны Ганна Маляр паведаміла, што УСУ вызвалілі сяло Пяціхаткі на поўдні Запарожскай вобласці.
Усяго, напісала Маляр у тэлеграме раніцай 19 чэрвеня, за два тыдні наступу былі вызвалены восем населеных пунктаў: Навадараўка, Ляваднае, Старажовае, Макароўка, Благадатнае, Лабковае, Нянуднае і Пяціхаткі.
Днём раней аб пераходзе Пяціхатак пад кантроль УСУ заяўляў прадстаўнік прызначаны Расіяй адміністрацыі акупаванай часткі Запарожскай вобласці Уладзімір Рогаў. У Мінабароны РФ, у сваю чаргу, сцвярджалі, што атака ўкраінскіх войскаў на Пяціхаткі была адбітая.

Расія пачала перакідваць войскі з левага берага Дняпра на Запарожскі і Бахмуцкі кірункі, паведамляе ваенная выведка Вялікабрытаніі.
Як адзначаецца ў штодзённай зводцы, расійскае камандаванне, верагодна, перакідвае падраздзяленні групоўкі войскаў «Дняпро» на працягу дзесяці апошніх дзён.
У манеўры патэнцыйна ўдзельнічаюць некалькі тысяч вайскоўцаў 49-й арміі, уключаючы 34-ю асобную мотастралковую брыгаду, а таксама часткі ПДВ і марской пяхоты.
Як мяркуюць аўтары зводкі, перадыслакацыя сведчыць аб тым, што Расія лічыць малаверагоднай буйную наступальную аперацыю УСУ з фарсіраваннем Дняпра пасля падрыву плаціны Кахоўскай ГЭС і выкліканай гэтым паводкі.
Расія не дала ААН доступ у раёны, якія пацярпелі ў выніку катастрофы на Кахоўскай ГЭС
«Мы заклікаем расійскія ўлады дзейнічаць паводле іх абавязальніцтваў у адпаведнасці з міжнародным гуманітарным правам. Нельга адмаўляць у аказанні дапамогі людзям, якія маюць у ёй патрэбу. ААН працягне рабіць усё, што можа для падтрымкі ўсіх людзей, у тым ліку пацярпелых у выніку нядаўняга разбурэння дамбы, якім тэрмінова патрэбна жыццёва неабходная дапамога, дзе б яны ні знаходзіліся», — заявіла гуманітарны каардынатар ААН у Украіне Дэніз Браўн.
Зяленскі заявіў, што ніводны пастаўлены Украіне комплекс Patriot не быў знішчаны. Пуцін сцвярджаў, што РФ знішчыла «пяць комплексаў Patriot» (усяго іх у Украіны два).
«Хто б там у Расіі не расказваў, нібыта нашы «Патрыёты» знішчаныя, усе яны ёсць, усе яны працуюць, усе яны збіваюць расейскія ракеты. І збіваюць максімальна эфектыўна. Ніводнага „Патрыёта“ не знішчана!» — Сказаў прэзідэнт Украіны Уладзімір Зяленскі ў відэазвароце па выніках 480-га дня вайны.
Як паведамілі Паветраныя сілы УСУ, у ноч на 19 чэрвеня над Украінай збілі чатыры расійскія крылатыя ракеты «Калібр» і чатыры робаты-дроны-камікадзэ «Шахед -136/131» на поўдні і ўсходзе краіны.
Мясцовыя ўлады ўдакладнілі, што расійскае войска абстрэльвала ракетамі Адэскую вобласць, а беспілотнікамі атакавала Днепрапятроўскую вобласць.
Па даных украінскіх вайскоўцаў, ракеты запусцілі з падводнай лодкі ў Чорным моры, а беспілотнікі прыляцелі з усходняга ўзбярэжжа Азоўскага мора.
Адразу некалькі населеных пунктаў Белгарадскай вобласці патрапілі пад абстрэл з боку Украіны раніцай 19 чэрвеня. Акрамя горада Валуйкі УСУ абстралялі Графаўку і Дзямідаўку.