Расійскія войскі РФ скінулі авіябомбу на Харкаў, якая трапіла ў 12-павярховы дом

Пад бомбавы ўдар расійскіх войск трапіў 12-павярховы дом, пацярпелі 17 чалавек, паведаміў кіраўнік Харкава Ігар Церахаў.

Сёння ўдзень у Харкаве прагрымелі выбухі. Перад гэтым Ваенна-паветраныя сілы Узброеных сілаў Украіны папярэджвалі аб пуску расійскіх кіраваных авіябомбаў у напрамку Харкаўскай вобласці.

Пад расійскі ўдар трапіў 12-павярховы жылы дом, заявіў кіраўнік адміністрацыі Харкаўскай вобласці Алег Сінягубаў. Зафіксавана траплянне ў 10-ы паверх дома ў цэнтры горада, распавёў кіраўнік Харкава Ігар Церахаў. Паводле яго, пажару не адбылося. Акрамя таго, пад абстрэл трапілі каля дзесяці гаражоў, яны загарэліся.

Паводле інфармацыі Алега Сінягубава, у выніку расійскага ўдару пацярпелі 17 чалавек, у тым ліку 12-гадовы хлопчык і 8-гадовая дзяўчынка, а таксама 78-гадовая жанчына і 88-гадовы мужчына. Шасцёра пацярпелых шпіталізаваныя.

Як адзначылі ва ўкраінскай Дзяржслужбе па надзвычайных сітуацыях, расіяне сёння нанеслі ракетныя і авіябомбавыя ўдары па жылых кварталах Харкава.  Пашкоджаныя не менш за 20 жылых і нежылых будынкаў, у тым ліку гандлёвы цэнтр, навучальная ўстанова і крама.

Кіраўнік МУС Украіны Ігар Кліменка сказаў: «Вораг мэтанакіравана знішчае самы цэнтр, у цэнтры знаходзяцца жылыя дамы і навучальныя ўстановы. Гаворка ідзе аб чарговым злачынстве расійскіх акупацыйных войскаў, якія спрабуюць запалохаць украінцаў».

Кліменка апублікаваў фатаграфію, на якой паказаны наступствы ўдару па доме ў Харкаве. Кіраўнік МУС заявіў, што сярод пацярпелых пры ўдары трое дзяцей.

УНІАН апублікавала фатаграфію, на якой, як сцвярджаецца, паказаны наступствы трапляння па шматпавярховаму дому ў Харкаве.

Таксама ўкраінскія СМІ публікуюць відэа з гаражамі, якія загарэліся пасля ўдару.

Пасля першага ўдару, як заявілі прадстаўнікі ўкраінскіх уладаў, расійскія вайскоўцы яшчэ некалькі разоў абстралялі Харкаў.

Войскі РФ з пачатку поўнамаштабнага ўварвання ва Украіну наносяць удары па ўкраінскіх гарадах, у тым ліку Харкаве. З канца красавіка расійскія войскі амаль кожны дзень скідаюць на Харкаў кіраваныя авіябомбы. Мэр горада Ігар Церахаў казаў у красавіку, што ў выніку абстрэлаў разбураная «практычна ўся» энергетычная інфраструктура Харкава.

Наступствы таксама можна ўбачыць на фота з Харкаўскай абласной пракуратуры і мясцовых СМІ.

Папярэдні слайдНаступны слайд

Заходнія СМІ, у тым ліку Bloomberg і The Economist, паведамлялі са спасылкай на крыніцы, што расійскія войскі спрабуюць зрабіць Харкаў непрыдатным для пражывання мірнага насельніцтва і рыхтуюцца да штурму гораду.

Паводле suspilne.media, meduza.io, сацсетак, www.rbc.ua