Вытворчасць новых ракет і БПЛА не спыняе дэградацыю арміі РФ

«Тэхніка ў руках дзікуна — кавалак металу»: армія РФ увайшла ў этап дэградацыі, на які не здольна паўплываць нарошчванне вытворчасці ракет і ударных беспілотнікаў. Гэта бачаць замежныя разведкі, адзначаючы, што без людзей дроны — нішто. Гэта бачыць і Расія, плануючы нарошчваць вярбоўку рэкрутаў на вайну. Ідуць 1479-я суткі поўнамаштабнай вайны РФ супраць Украіны пры саўдзеле ў агрэсіі рэжыму Аляксандра Лукашэнкі.

На працягу мінулых сутак ва Украіне зафіксавана 154 баявыя сутыкненні, паведамляе Генштаб УСУ ў ранішняй зводцы 13 сакавіка.

На Канстанцінаўскім і Гуляйпільскім кірунках расійцы здзейснілі па 28 атак на кожным.

На Пакроўскім кірунку абаронцы Украіны спынілі 27 штурмавых дзеянняў расіян у раёнах Мірнаграду, Радзінскага, Котліна, Удачнага, Новамікалаеўкі, Новападгароднага і іншых.

На Аляксандраўскім і Славянскім кірунках зафіксавана па восем боесутыкненняў на кожным.

* * *

На Гуляйпольскім кірунку ў Запарожскай вобласці ў апошнія дні павялічылася колькасць расійскіх штурмавых дзеянняў, паведамляе аналітычны праект DeepState.

«Апошнія некалькі дзён дынаміка штурмавых дзеянняў узрасла на Гуляйполлі і нават перасягнула Пакроўскі ўчастак, дзе вораг таксама, па сутнасці акупаваўшы горад, фіксуецца ўглыбіні тэрыторыі, у прыватнасці па ўчастку Залізнічнае-Стараўкраінка-Святапятроўка», — пішуць аналітыкі.

Яны ўказваюць, што за першыя 10 дзён сакавіка расійцы правялі каля 1400 штурмаў на розных участках фронту, што з'яўляецца самым нізкім паказчыкам за апошні час, але «не крытычна адрозніваецца ад папярэдніх месяцаў».

Акрамя Гуляйпольскага ўчастка фронту актыўнымі застаюцца баявыя дзеянні ў раёнах Пакроўска і Канстанцінаўкі.

* * *

Вайна ўступіла ў новую стадыю. Да 1 красавіка ў Расіі запланавалі павялічыць колькасць войскаў беспілотных сістэм, паведаміў галоўнакамандуючы УСУ Аляксандр Сырскі ў Telegram.

«На нарадзе па пытаннях развіцця беспілотных сістэм разведка далажыла, што сёлета расіяне паскараюць стварэнне падраздзяленняў БПЛА, спрабуючы паўплываць на ход баявых дзеянняў, у прыватнасці на паўднёвых кірунках, дзе вораг губляе ініцыятыву і тэрыторыі. Да 1 красавіка ў РФ запланавалі павялічыць колькасць войскаў беспілотных сістэм да 101 тысячы вайскоўцаў», — адзначыў генерал.

Паводле яго, вайна ўступіла ў новую стадыю. Павелічэнне працягласці «кілзон» становіцца вынікам росту магчымасцяў ударных дронаў. Каб перамагчы ў вайне тэхналогій, Украіне трэба нарошчваць тэмп распрацоўкі эфектыўных беспілотных сістэм, іх закупкі для войска і выкарыстанне на полі бою.

Сырскі дадаў, што Сілы абароны Украіны ўтрымліваюць перавагу ў прымяненні FPV-дронаў мультыротарнага тыпу, хоць расіяне ўжо набылі магчымасць вырабляць больш за 19 тысяч FPV-дронаў у суткі.

Для супрацьдзеяння расійскім дронам у падраздзяленнях УСУ ствараюцца ўзводы перахопнікаў БПЛА. Іх задача — знішчэнне FPV-дронаў, квадракоптараў, ударных беспілотнікаў. Прымяняюцца антыдронавыя стрэльбы, сродкі РЭБ і сеткамёты.

* * *

Армія Расійскай Федэрацыі ўвайшла ў этап дэградацыі, на які не здольна паўплываць нават імклівае нарошчванне вытворчасці ракет і ударных беспілотнікаў, паведамляе ў Telegram кіраўнік Цэнтра супрацьдзеяння дэзінфармацыі (ЦСД) пры СНБА УКраіны Андрэй Каваленка.

Паводле яго слоў, заходнія ваенныя аналітыкі, спасылаючыся на даныя разведак, фіксуюць пачатак этапу дэградацыі расійскага войска. Гэты працэс з'яўляецца комплексным і тычыцца агульнай якасці арміі РФ.

Узмацненне ваенна-прамысловага комплексу РФ, у прыватнасці вытворчасць новых ракет і БПЛА, не можа спыніць гэты заняпад. Хоць колькасць узбраення расце, агульны стан арміі, яе здольнасці і якасныя паказчыкі працягваюць пагаршацца.

Раней шэраг заходніх экспертаў адзначалі, што РФ сутыкаецца з сур'ёзнымі праблемамі з-за дэфіцыту вопытных малодшых афіцэраў і зношанасці цяжкай бранятэхнікі. Нягледзячы на пераход эканомікі на ваенныя рэйкі, тэхналагічны разрыў паміж расійскім узбраеннем і сучаснымі заходнімі ўзорамі працягвае павялічвацца.

* * *

У ноч на 13 сакавіка расійскія войскі нанеслі ўдар па горадзе Балаклея ў Харкаўскай вобласці, зафіксаваны пападанні ў жылую забудову.

* * * 

* * *

У Польшчы на тэрыторыі буравугальнай шахты каля горада Конін, што ў Велікапольскім ваяводстве, знайшлі беспілотнік. Папярэдне мяркуюць, што ён мог упасці там яшчэ ў верасні мінулага года, паведамляе РАР.

Галоўны інспектар паліцыі муніцыпалітэта Конін Міхаль Янкоўскі асабіста быў на месцы здарэння і апісаў дрон як «трохвугольную форму і белую афарбоўку». Паводле яго слоў, апарат застаўся амаль не пашкоджаным і знешне нагадвае ваенны беспілотнік.

Галоўны суперінтэндэнт з ваяводскага штаба ў Познані Мацей Свенцыхоўскі заявіў пра пачатак расследавання абставін інцыдэнту. Паводле яго слоў, праваахоўнікі імкнуцца ўсталяваць паходжанне дрона і высветліць, як менавіта ён апынуўся ў гэтым рэгіёне.

* * *

Расійская разведка, верагодна, аказвае падтрымку Ірану для правядзення ўдараў у адказ па ЗША, Ізраілі і іх саюзніках у рэгіёне Персідскага заліва. Гэта, а таксама магчымасць кітайскай дапамогі Тэгерану, сведчаць пра рост супрацоўніцтва паміж праціўнікамі Злучаных Штатаў на фоне пагрозы эскалацыі канфлікту з Іранам, піша Bloomberg.

Згодна з інфармацыяй, атрыманай ад дасведчаных асоб і даных амерыканскай і заходняй разведак, Расія ў цяперашні час перадае Ірану разведывальную інфармацыю, уключаючы спадарожнікавыя здымкі і такітычныя рэкамендацыі для выкарыстання дронаў. Асноўная мэта — падтрымка іранскіх контрудараў па войсках ЗША ў рэгіёне, адзначае выданне.

Таксама міністр абароны Вялікабрытаніі Джон Хілі пацвердзіў, што Расія можа дапамагаць Ірану ў прымяненні ударных беспілотнікаў падчас атак на Блізкім Усходзе. Пра гэта ён сказаў пасля нарады з брытанскімі вайскоўцамі ў Лондане, паведамляе The Guardian.

* * *

Saudi Aramco вядзе перамовы па меншай меры з дзвюма ўкраінскімі кампаніямі аб куплі дронаў-перахопнікаў, якія могуць дапамагчы абараніцца ад іранскіх атак, накіраваных на нафтавыя радовішчы, піша The Wall Street Journal.

Кампанія спрабуе як мага хутчэй забяспечыць пастаўкі такіх дронаў — раней за ўласны ўрад і рэгіянальных канкурэнтаў, у прыватнасці Катара.

Aramco камунікуе з украінскімі кампаніямі SkyFall і Wild Hornets. Яны вырабляюць дроны-перахопнікі, якія ўразаюцца ў іншыя дроны або падрываюцца побач з імі.

Aramco з'яўляецца найбуйнейшым у свеце вытворцам нафты і забяспечвае каля дзясятай часткі глабальнай прапановы.