«Утрымлівалі ў жудасных умовах у карцары». Экс-начальнік ДАІ трапіў з Акрэсціна ў шпіталь, і пасля 15 сутак атрымаў столькі ж

Сяргей Маслоўскі службу ў міліцыі сканчаў на пасадзе начальніка ДАІ Мінскай вобласці. 11-га кастрычніка яго затрымалі за ўдзел у нядзельным маршы. Як высветлілі родныя, да яго з самага пачатку было «асаблівае» стаўленне, паколькі Маслоўскі адразу сказаў, што ён былы міліцыянт.

Яму далі 15 сутак арышту, на наступны дзень пасьля суда ён на хуткай трапіў у шпіталь з падазрэннем на інсульт, ушыбамі і гематомамі. Па заканчэнні арышту на волю не выйшаў, яго затрымалі зноў, ужо за непадпарадкаванне ўчастковаму, і тая ж суддзя «выпісала» яшчэ 15 сутак. Сяргей паспеў сказаць у судзе, што больш за два тыдні яго трымалі ў карцары ў жудасных умовах, сям'я рыхтуе скаргу ў Камітэт супраць катаванняў ААН.
Сяргею Маслоўскаму 56 гадоў, палкоўнік у адстаўцы, доўгі час служыў у аператыўна-пошукавым аддзеле УУС Мінаблвыканкама, закончыў службу на пасадзе начальніка ДАІ Мінскай вобласці, пенсіянер.
— У бацькі былі шматлікія медалі і нагрудныя знакі за адзнаку ў службе, у тым ліку падпісаныя Караевым і Лукашэнкам, — расказвае дачка Вольга. — Нават не знаходзячыся на службе, ён стараўся выканаць грамадзянскі абавязак: аднойчы перарываючы вулічную бойку, атрымаў пералом носа, а ў 2011 годзе, ужо пасля выхаду на пенсію, заўважыў на аўтарынку рабаўніка, здолеў спыніць яго і вярнуць пацярпеламу грошы. Падчас службы ён заўсёды кіраваўся загадам МУС «Аб ветлівым і ўважлівым стаўленні супрацоўнікаў органаў унутраных спраў і ваеннаслужачых унутраных войскаў да грамадзян», змест якога патрэбна было ведаць на памяць. Тое, што дзеецца цяпер, з гэтым загадам зусім несупастаўнае.
11 кастрычніка Сяргея Маслоўскага затрымалі. Па матэрыялах адміністрацыйнай справы, адбылося гэта ў раёне гасцініцы «Планета» ў 15.40. Як пакажа сведка-міліцыянт Бельскі Н. А., Маслоўскі прыняў удзел у шэсці групы людзей, пазначаных бел-чырвона-белай сімволікай, і выкрыкваў «Жыве Беларусь!».
— Відавочцы распавялі, што да яго адразу было «асаблівае» стаўленне, таму што ён сказаў, што служыў у міліцыі, — кажа Вольга. — Неўзабаве ён трапіў у шпіталь з падазрэннем на інсульт.
14 кастрычніка адбыўся суд, на якім Сяргей Маслоўскі заявіў, што сапраўды ўдзельнічаў у шэсці, але лозунгі не выкрыкваў. Раней да адміністрацыйнай адказнасці былы міліцыянт не прыцягваўся, як пазначана ў пастанове суда, аднак яму адразу ж далі максімальна магчымае пакаранне (на падставе ч. 1 арт. 23.34 КаАП) — 15 сутак арышту. Справу разглядала суддзя Савецкага суда Марына Фёдарава.
А ўжо на наступны дзень Маслоўскага на хуткай прывезлі ў шпіталь МУС (тут аказваюць меддапамогу не толькі дзеючым, але і былым міліцыянтам). Родных да яго не пусцілі, патлумачыўшы гэта неспрыяльнай эпідэміялагічнай абстаноўкай. І даслалі адказ на зварот аб стане здароўя.
Як пазначана ў дакуменце за подпісам намесніка галоўнага лекара Алены Багровай, Маслоўскі быў дастаўлены ў шпіталь па экстраных паказаннях брыгадай хуткай дапамогі з падазрэннем на інсульт, былі і іншыя дыягназы пад пытаннем. У выніку абследавання дыягнаставана артэрыяльная гіпертэнзія ІІІ стадыі (самая высокая, ціск больш за 180 / больш за 110) рызыка 4 (самая высокая), крызовае цячэнне і шэраг іншых захворванняў. Таксама адзначана, што ў пацыента выяўленыя «ўшыбы, гематомы абодвух сцёгнаў, ранкі ў галіне абодвух прамянёвазапясцевых суставаў, якія не ўплывалі на агульны стан пацыента».
У матэрыялах адміністрацыйнай справы не паказваецца, што Маслоўскі аказаў супраціў пры затрыманні і што да яго выкарыстоўвалася фізічная сіла і спецыяльныя сродкі ў адпаведнасці з Законам «Аб органах унутраных спраў». Пры гэтым намеснік галоўнага ўрача паказала, што Маслоўскі паведаміў ўрача-хірурга, што «11 кастрычніка быў збіты невядомымі асобамі ў масках».
«Расследаванні прычын і механізм атрымання траўмаў не ўваходзіць у задачы шпіталя», — паказвае ў адказе Багрова.
Па законе, пры звароце (дастаўцы) у бальніцу пацыентаў з траўмамі крымінальнага (гвалтоўнага) характару супрацоўнікі прыёмнага пакою абавязаны інфармаваць аб гэтым органы ўнутраных спраў. Ці зрабілі гэта ў шпіталі МУС, высветліць не ўдалося — у прыёмнай адмовіліся звязаць журналіста з галоўным урачом.
— У нас была надзея, што з улікам стану здароўя бацькі, яго пасля бальніцы адпусцяць дамоў, але праз тры дні яго вярнулі ў ізалятар даседжваць «суткі», — распавядае Вольга. — Адваката да яго не пусцілі. Як мы высветлілі пазней, бацьку ўтрымлівалі ў жудасных умовах у карцары. Перадачы з адзеннем і прадуктамі, якія ў нас прымалі, яму ў выніку не аддалі.
26 кастрычніка родныя загадзя, у 14.00, прыехалі да ІЧУ на Акрэсціна, каб сустрэць Сяргея. Аднак у 15.40, як меркавалася, ён на волю не выйшаў.
— Прыкладна ў 16.20 нам сказалі, што ён у Савецкім РУУС, — успамінае Вольга. — Мы паехалі туды, нам пацвердзілі, што ён у іх, і сказалі, што пасля РУУС ён зноў паедзе на Акрэсціна.
У матэрыялах ужо другой адміністрацыйнай справы паказана, што 26 кастрычніка ўчастковы міліцыянт Савецкага РУУС Тыцік А. І. затрымаў Сяргея Маслоўскага «для высвятлення асобы» ў 15.50 па адрасе завулак Якуба Коласа, 9. Але паколькі Маслоўскі ўпіраўся, хапаўся за форменнае абмундзіраванне і адмаўляўся сесці ў службовы аўтамабіль, каб прайсці ў міліцыю, яго затрымалі за непадпарадкаванне (арт. 23.4 КаАП). Савецкае РУУС знаходзіцца ў 400 метрах ад месца затрымання (завулак Якуба Коласа, 3). Як Сяргей Маслоўскі апынуўся на завулку Коласа ў 15.50, калі па дакументах яго павінны былі адпусціць з Акрэсціна ў 15.40, засталося загадкай, адлегласць паміж гэтымі аб'ектамі — амаль 10 км. Сам Маслоўскі ў судзе сказаў, што быў у ІЧУ, непадпарадкавання супрацоўнікам міліцыі не аказваў. Паказанні супраць яго даў той жа сведка Бельскі Н. А., які выступаў і на першым працэсе, калі палкоўніка судзілі за акцыю. І працэс вяла ўсё тая ж суддзя суда Савецкага раёна Марына Фёдарава, якая зноў «выпісала» максімальнае пакаранне — 15 сутак арышту.
— На другім судзе ён паспеў сказаць, што 15 сутак яго трымалі ў карцары ў жудасных умовах, суддзя ўсё гэта чула. І толькі нядаўна (другі суд адбыўся 28 кастрычніка, па першай справе быў затрыманы 11 кастрычніка. — Заўвага. TUT.BY) яго перавялі ў звычайную камеру, — кажа дачка Маслоўскага. — Мы лічым, што ўтрыманне ў карцары прывяло да пагаршэння яго здароўя. Бацька да гэтага часу знаходзіцца ў ізалятары, адваката да яго па-ранейшаму не дапускаюць. Цяжка падабраць словы, каб апісаць страх і бездапаможнасць ад таго, што паважаны ў грамадстве чалавек у адзін момант, на думку некаторых дзяржслужачых, можа стаць непажаданым і атрымаць да сябе адпаведнае стаўленне з боку ўлады.
Паводле tut.by