383-ці дзень вайны: УСУ адбілі 102 атакі ворага

Вайна і не думае сканчвацца, а мы ўважліва сочым за асноўным. Чытайце, што здарылася за апошні дзень у нашай традыцыйнай падборцы.

Фота: Jose Colon / Anadolu Agency / ABACAPRESS / ddp images / Vida Press

Фота: Jose Colon / Anadolu Agency / ABACAPRESS / ddp images / Vida Press

Прэзідэнт Украіны Уладзімір Зяленскі прысвоіў званне Героя Украіны снайперу Чарнігаўскай тэрабароны Аляксандру Маціеўскаму, расстрэл якога патрапіў на відэа.
«Сёння я прысвоіў званне Героя Украіны Аляксандру Маціеўскаму. Салдату, чалавеку, якога будуць ведаць усе ўкраінцы. Чалавеку, якога будуць памятаць вечна. За ягоную адвагу, за ягоную ўпэўненасць ва Украіне — і за яго "Слава Украіне!"» — распавёў Зяленскі ў відэазвароце па выніках мінулага дня вайны.
У сакавіку 2023 года ў сетцы з'явілася відэа расстрэлу ўкраінскага вайскоўца. Першапачаткова прадстаўнікі УСУ заявілі, што на відэа — Цімафей Шадура, вайсковец 30-й асобнай механізаванай брыгады імя князя Канстанціна Астрожскага, які знік без вестак 3 лютага 2023 года.
Напярэдадні УБУ канчаткова пацвердзіла асобу ўкраінскага вайскоўца, расстралянага пасля слоў «Слава Украіне!». Па дадзеных ведамства, Маціеўскі быў прызваны на ваенную службу ў сакавіку 2022 года. З канца снежня ён лічыўся зніклым без вестак паблізу населенага пункта Чырвоная Гара ў Данецкай вобласці. Па дадзеных ведамства, ён быў расстраляны 30 снежня. Яго цела вярнулі дадому ў лютым 2023 года.
Акрамя таго, у відэазвароце Зяленскі выказаўся на тэму ўмацавання «духоўнай незалежнасці» Украіны. Верагодна, так прэзідэнт пракаментаваў паведамленні аб тым, што манахаў Украінскай праваслаўнай царквы (УПЦ) абавязалі пакінуць Кіева-Пячэрскую лаўру. Улады Украіны небеспадстаўна падазраюць УПЦ у сувязях з Расіяй.
Сістэмы СПА збілі над Белгарадам чатыры ракеты. Губернатар паведаміў аб адной пацярпелай мясцовай жыхарцы.
Кіраўнік Белгарадскай вобласці Вячаслаў Гладкоў апублікаваў паведамленне аб здарэнні раніцай 13 сакавіка. Паводле яго слоў, з-за падзення абломкаў ракет пашкоджаны дзве прыватныя гаспадаркі. Пацярпела адна мясцовая жыхарка.
Са зводкі Генштаба УСУ:
На Запарожскім і Херсонскім кірунках войскі РФ абараняюцца. Нягледзячы на значныя страты, расійцы працягваюць наступальныя дзеянні на Ліманскім, Бахмуцкім, Аўдзееўскім, Мар'інскім і Шахцёрскім кірунках.
За мінулыя суткі УСУ адбілі 102 атакі ворага на гэтых кірунках.
Штурм Бахмута працягваецца. На Аўдзееўскім, Мар'інскім і Шахцёрскім кірунках — у раёнах Каменкі, Аўдзееўкі, Вадзянога, Паўночнага, Першамайскага, Мар'інкі і Перамогі.
За мінулыя суткі расійскія вайскоўцы нанеслі тры ракетныя ўдары, у тым ліку па аб'екце грамадзянскай інфраструктуры Славянска ў Данецкай вобласці. Акрамя таго, войскі РФ нанеслі восем авіяцыйных удараў і здзейсніла 49 абстрэлаў з рэактыўных сістэм залпавага агню.
На працягу сутак украінская авіяцыя нанесла ўдар па зенітна-ракетным комплексе ворага, а таксама шэсць удараў па раёнах засяроджвання асабовага складу і ваеннай тэхнікі РФ.
Падраздзяленні ракетных войскаў і артылерыі УСУ знішчылі пункт кіравання, два раёны засяроджвання асабовага складу і ваеннай тэхнікі, а таксама два склада боепрыпасаў і склад гаруча-змазачных матэрыялаў ворага.