Канчатковы вынік экзіт-полу на замежных участках: 86,77% за Ціханоўскую, 3,9% — за Лукашэнку
Паводле арганізатараў, амаль на ўсіх участках вынікі экзіт-полаў супадаюць з афіцыйнымі лічбамі камісій, за выняткам участкаў у Маскве, Санкт-Пецярбургу і некалькіх іншых гарадах па-за межамі Беларусі.
Чарга беларусаў, што жадаюць прагаласаваць, у пасольства ў Чэхіі
Лічбы падлічылі на 27 участках, апытана 14 740 чалавек. Канчатковыя вынікі падвялі толькі 10 жніўня, бо позна паступіла інфармацыя з аднаго з участкаў у ЗША, паведамілі Радыё Свабода арганізатары экзіт-полу.
Паводле канчатковых лічбаў, на гэтых участках Святлана Ціханоўская мае 86,77%, адмовіліся адказваць 6,64%, Аляксандар Лукашэнка мае 3,90%, супраць усіх 1,46%, Андрэй Дзмітрыеў і Ганна Канапацкая маюць па 0,43%, Сяргей Чэрачань — 0,34%, і яшчэ 0,04% апытаных сказалі, што пашкодзілі бюлетэні.
Паводле дадзеных ЦВК, агулам па краіне Лукашэнка мае каля 80%, а Ціханоўская — каля 10%
Паводле Радыё Свабода