«Жахлівыя планы Пуціна цяпер зрываюцца». Джонсан нечакана прыехаў у Кіеў

Борыс Джонсан прыехаў з нечаканым візітам у Кіеў. Ён правёў перамовы з Уладзімірам Зяленскім і паабяцаў Кіеву 120 бронемашын.

Прэм'ер-міністр Вялікабрытаніі Борыс Джонсан прыбыў у Кіеў з візітам, пра які загадзя не паведамлялася. Ён правёў перамовы з прэзідэнтам Украіны Уладзімірам Зяленскім і паабяцаў дадаткова адправіць Кіеву 120 адзінак бронетэхнікі і новыя супрацькарабельныя ракетныя сістэмы.

Фатаграфію сустрэчы двух лідараў у сваім «Твітары» апублікавала Пасольства Украіны ў Вялікабрытаніі.

На Даўнінг-стрыт кажуць, што брытанскі прэм'ер асабіста сустракаецца з Зяленскім, «каб паказаць сваю салідарнасць з народам Украіны».

Намеснік кіраўніка офіса прэзідэнта Украіны Андрэй Сібіга напісаў у сваім «Фэйсбуку», што візіт Джонсана пачаўся з перамоваў з Зяленскім, якія прайшлі ў фармаце сам-насам. «Вялікабрытанія — лідар у абароннай падтрымцы Украіны. Лідар у антываеннай кааліцыі. Лідар у санкцыях супраць расійскага агрэсара», — піша Сібіга.

У пятніцу, 8 красавіка, Джонсан абвясціў, што накіруе Украіне дадатковую вайсковую дапамогу на суму 100 млн фунтаў у адказ на абстрэл вакзала ў Краматорску, у выніку якога загінулі 52 чалавекі, што мелі намер эвакуявацца з горада. У ліку іншага пастаўкі зброі будуць уключаць супрацьтанкавыя і супрацьпаветраныя ракетныя сістэмы, а таксама «дроны-камікадзэ».

Брытанскі прэм'ер пасля сустрэчы з Зяленскім адзначыў, што «Украіна насуперак усім чаканням адкінула расійскія войскі ад Кіева і здзейсніла найвялікшы баявы подзвіг XXI стагоддзя». «Дзякуючы ўпэўненаму лідарству прэзідэнта Зяленскага і непераадольнаму гераізму і адвазе ўкраінскага народа жахлівыя планы Пуціна цяпер зрываюцца», — сказаў Джонсан.

Паводле ВВС

 

Хочаце ведаць больш? Сачыце за нашымі публікацыямі ў Telegram і Facebook!

  • Апошняе на сайце
,
Больш цікавага на «Новым Часе»: