12 байцоў расійскага АМАПу адмовіліся ехаць на вайну ва Украіну. Што з імі стала?

Паводле інфармацыі расійскіх праваабаронцаў, тузін супрацоўнікаў Расгвардыі меліся накіраваць ва Украіну, але яны не захацелі ўдзельнічаць у вайне. У выніку іх звольнілі. Расгвардзейцы лічаць звальненне незаконным і падалі ў суд пазоў аб аднаўленні на працы.

Камандзір узвода аператыўнай роты АМАП «Пластун» Расгвардыі па Краснадарскім краі Фарыд Чытаў і 11 байцоў з яго роты адмовіліся ехаць на вайну ва Украіну, іх звольнілі.

Пра гэта напісаў расійскі юрыст, праваабаронца і грамадскі дзеяч, кіраўнік Міжнароднай праваабарончай групы «Агора» Павел Чыкаў у сваім Telegram-канале.

Паводле яго інфармацыі, 25 лютага капітан паліцыі Чытаў з іншымі расгвардзейцамі адмовіліся выканаць загад камандзіра атрада аб перасячэнні мяжы РФ і далейшым накіраванні на тэрыторыю Украіны.

«Атрад АМАП з Краснадара з 6 лютага знаходзіўся ў Рэспубліцы Крым, куды быў накіраваны для правядзення вучэнняў «Заслона 2022». Адмову выканаць загад байцы Расгвардыі патлумачылі яго незаконнасцю. Ні ў аднаго з іх з сабой не было ні замежнага пашпарта, ні намеру пакінуць тэрыторыю Расіі, тады як іх прамыя службовыя абавязкі абмяжоўваліся тэрыторыяй Расійскай Федэрацыі. Аб камандзіроўцы на тэрыторыю Украіны для ўдзелу ў спецыяльнай ваеннай аперацыі, аб задачах і ўмовах гэтай аперацыі ніхто з пазоўнікаў у вядомасць пастаўлены не быў і як следства, згоды на яе не даваў», — адзначыў Чыкаў.

«Само па сабе незаконнае перасячэнне дзяржаўнай мяжы ўтварае склад злачынства, прадугледжаны арт. 322 КК РФ, а нелегальны ўезд на тэрыторыю Украіны ў складзе ўзброенай групы, утворыць шэраг складаў злачынстваў ужо Крымінальнага кодэкса Украіны», — дадаў ён.

У выніку, са слоў юрыста, байцоў Расгвардыі вярнулі ў Краснадар, правялі службовую праверку і звольнілі са службы. Расгвардзейцы лічаць звальненне незаконным і падалі ў суд пазоў аб аднаўленні на працы.