487-мы дзень вайны: УСУ ціха наступаюць, у свеце думаюць, што было з Прыгожыным

Эфектны і медыйны «Марш Вагнера на Маскву» не спыніў баявыя дзеянні ва Украіне. УСУ працягвае вызваляць сваю зямлю, баявыя дзеянні час ад часу перакідваюцца на Расію, а аналітыкі ўсё ж думаюць наконт выбрыку Прыгожына: што гэта было і якія яшчэ будуць наступствы.

Генштаб УСУ сціпла паведамляе…

Зводка Генштаба УСУ традыцыйна сціпла паведамляе аб ходзе ўкраінскага контрнаступлення. Паводле Генштабу, расійскія войскі засяроджваюць асноўныя намаганні на Ліманскім, Аўдзееўскім і Мар'інскім кірунках — на працягу сутак там адбылося 29 баявых сутыкненняў. А таксама на Запарожскім і Херсонскім напрамках вораг абараняецца і спрабуе стрымаць прасоўванне Сіл абароны Украіны.

Але Telegram-канал 3-й асобнай штурмавой брыгады УСУ піша пра разгром расійскіх войскаў на Бахмуцкім кірунку. Згодна паведамленню, дзясяткі жаўнераў РФ былі ліквідаваныя і параненыя ў выніку «зачысткі» плацдарму ворага на Заходнім беразе канала Северскі Данец — Данбас.

Ваенныя краіны пачалі прасоўванне ў раёне Бахмута з пачатку чэрвеня. У прыватнасці, ім удаецца вызваляць ад расійцаў раёны паўночней і паўднёвей горада. Як тлумачыла намесніца міністра абароны Украіны Ганна Маляр, такім чынам УСУ плануюць узяць у атачэнне групоўку РФ, якая застаецца ў Бахмуце.

У той час, калі ў Расіі вагнераўцы спрабавалі правесці мяцеж, Узброеныя Сілы Украіны знішчылі на фронце 720 акупантаў, 6 танкаў і 5 РСЗА.

Міністэрства абароны Вялікабрытаніі піша, што ўкраінскія вайскоўцы выкарыстоўваюць вопыт першых двух тыдняў контрнаступлення для ўдасканалення тактыкі і дасягаюць упэўненага тактычнага прагрэсу на ключавых напрамках.

Як піша выведка, у апошнія дні ўкраінскія войскі перагрупаваліся і працягнулі праводзіць наступальныя аперацыі на трох асноўных напрамках на поўдні і ўсходзе Украіны.

«Украінскія войскі выкарыстоўваюць вопыт першых двух тыдняў контрнаступлення для ўдасканалення тактыкі штурму глыбокай, добра падрыхтаванай расійскай абароны. Украінскія падраздзяленні дасягаюць паступовага, але ўпэўненага тактычнага прагрэсу на ключавых кірунках», — піша брытанская выведка.

Вайна ў Расіі

У выніку нанясення ўдару расійскім верталётам па нафтабазе ў Варонежы згарэла 5000 тон авіяцыйнага паліва. Гасілі пажар практычна ўсе сілы Варонежскага пажарна-ратавальнага гарнізона — 97 чалавек і 31 адзінка тэхнікі. Пажар ліквідавалі ў 00:40 у нядзелю.

У расійскім Шэбекіна Белгарадскай вобласці адбыўся пажар на прамысловым прадпрыемстве. Улады заявілі пра атаку дрона, з якога была скінутая выбуховая прылада.

Апошнія месяцы жыхары Белгародскай вобласці і яе ўлады ўсё часцей паведамляюць пра нібыта абстрэлы і выбухі, абвінавачваючы ва ўсім УСУ.

Паход Прыгожына на Маскву: наступствы

У Амерыканскім Інстытуце вывучэння вайны (ISW) лічаць, што дасягнутае дзякуючы Лукашэнку, пагадненне Крамля з Прыгожыным з'яўляецца кароткатэрміновым рашэннем. Узброенае паўстанне заснавальніка ПВК Вагнер Яўгена Прыгожына і яго паход на Маскву паказала слабасць Крамля. Хутчэй за ўсё, гэта нанясе істотную шкоду намаганням Расіі ў вайне супраць Украіны.

«Паўстанне Прыгожына прадэманстравала, што расійскім войскам не хапае рэзерваў у многіх тылавых раёнах і яно амаль напэўна пагоршыць маральны дух расійскіх войскаў ва Украіне, бо ўкраінскія сілы могуць выкарыстоўваць гэта для карэкціроўкі спробаў прарыву расійскай абароны», — гаворыцца ў паведамленні.

Аналітыкі пішуць, што цяпер Крэмль сутыкаецца з глыбока нестабільнай раўнавагай. Пагадненне, дасягнутае дзякуючы Лукашэнку, з'яўляецца кароткатэрміновым, а не доўгатэрміновым рашэннем, а мяцеж Прыгожына паказаў сур'ёзныя слабасці Крамля і расійскага Мінабароны.

«Здагадка аб тым, што паўстанне Прыгожына, адказ Крамля і пасярэдніцтва Лукашэнкі былі інсцэніраваныя Крамлём, абсурдныя», — гаворыцца ў справаздачы.

Акрамя таго, дзеянні «вагнераўцаў» паказалі дэградацыю расійскіх вайсковых рэзерваў, амаль цалкам занятых баямі ва Украіне, а таксама небяспеку спадзявацца на нявопытных прызыўнікоў для абароны межаў Расіі.

Аналітыкі не прагназуюць хуткі крах Крамля, аднак мяцеж Прыгожына і падзеі ў РФ, хутчэй за ўсё, нанясуць істотную шкоду вайсковым намаганням Масквы ў вайне супраць Украіны.

Былая кіраўніца маскоўскага бюро CNN Джыл Догерці выказала здагадку, што шэфа «вагнераўцаў» могуць ліквідаваць, нягледзячы на тое, што ён збег у Беларусь. На яе думку, Пуцін не даруе здраднікаў. «Цалкам магчыма, што мы ўбачым, як Прыгожына заб'юць у Беларусі. Але гэта цяжкая дылема для Масквы, таму што пакуль Прыгожын мае пэўную падтрымку, ён уяўляе пагрозу, незалежна ад таго, дзе ён знаходзіцца», — сказала яна.

Прыгожын узяў Растоў. А беларусам за гэта што-небудзь будзе?