511-ты дзень вайны: Няўдалая помста за Крымскі мост

Расіяне вырашылі адпомсціць Украіне за ўзарваны Крымскі мост. Помста выглядае звыкла — масіраваныя ракетныя ўдары па тэрыторыі Украіны і спробы перайсці ў наступ на некаторых кірунках фронту. Аднак ні першае, ні другое ў іх не атрымалася.

Паведамляе Генштаб УСУ — і іншыя

Генштаб УСУ ў ранішняй зводцы паведаміў, што за мінулыя суткі вораг спрабаваў аднавіць страчаныя становішча ў раёнах Роўнаполя Данецкай вобласці і Новадараўки Запарожскай вобласці, але яму гэта не ўдалося.

Праціўнік засяроджвае асноўныя намаганні на Купянскім, Ліманскім, Бахмуцкім, Аўдзееўскім і Мар'інскім напрамках — за мінулыя суткі адбылося больш за 20 баявых сутыкненняў.

Украінскія войскі атрымалі ініцыятыву на Купянскім кірунку ў Харкаўскай вобласці, паведаміла намесніца міністра абароны Ганны Маляр. Паводле яе слоў, «Наступ ворага на Купянскім кірунку беспаспяховы. Баі працягваюцца, але ініцыятыва ўжо на нашым баку. На паўднёвым флангу вакол Бахмута сёння, як і ўсе папярэднія дні, было прасоўванне нашых войскаў.

На паўночным флангу сёння працягваліся баі. Вораг спрабуе вярнуць страчаныя пазіцыі. Нашым байцам даводзіцца мець справу з шчыльным мініраваннем і інтэнсіўным варожым агнём».

Інстытут вывучэння вайны (ISW) адзначае, што на ўчастках фронту, дзе сілы абароны Украіны праводзяць контрнаступленне, яны маюць тактычныя дасягненні, нягледзячы на актывізацыю аперацый расійскіх войскаў. УСУ працягваюць актыўна прасоўвацца ў Запарожскай вобласці, а каля Бахмута ўкраніцы занялі амаль усе пануючыя вышыні.

Аналітыкі адзначылі, што расійскія войскі правялі ўдарную кампанію супраць украінскіх вайсковых аб'ектаў на поўдні Украіны як відавочную помсту за атаку на Керчанскі мост. Але ўкраінскія сілы правялі контрнаступныя дзеянні як мінімум на трох участках фронту на фоне актывізацыі расійскіх наступальных аперацый і заявілі аб тактычных дасягненнях уздоўж мяжы Харкаўскай і Луганскай абласцей.

Расійскія і ўкраінскія крыніцы адзначылі, што войскі РФ апошнім часам актывізавалі наступальныя аперацыі ў раёне Купянска (паміж паўночна-ўсходняй Харкаўскай і паўночна-заходняй Луганскай абласцямі). Гэта пацвярджае ацэнку ISW, што расійскія войскі маюць на мэце адцягнуць украінскія рэзервы ў раён Купянска і адвесці іх ад крытычна важных участкаў развіцця баявых дзеянняў, на якіх украінскія войскі вядуць контрнаступальныя аперацыі.

У справаздачы паказваюць: атака на мост праз Керчанскі праліў 17 ліпеня, імаверна, будзе мець далейшыя неадкладныя наступствы для расійскай лагістыкі на поўдні Украіны. Расійскае матэрыяльна-тэхнічнае забеспячэнне на поўдні Украіны, імаверна, пацерпіць у кароткатэрміновай і сярэднетэрміновай перспектыве, што ўзмоцніць нядаўнія скаргі на неадэкватнае расійскае забеспячэнне на поўдні Украіны, а гэта можа яшчэ больш падарваць давер да Мінабароны РФ.

Масіраваная ракетная атака

Уначы 19 ліпеня расійцы нанеслі па Адэсе масіраваны ўдар ракетамі розных тыпаў і ўдарнымі дронамі. Былі зафіксаваныя чатыры хвалі пускаў крылатых ракет «Калібр» з Чорнага мора, і крылатых ракет Х-22 з паўднёвага напрамку.

Па даных мясцовых СМІ, у Адэсе адбыўся пажар на складзе феерверкаў. У сеціве было апублікавана відэа наступстваў паветранай атакі. Аднак кіраўніца аб'яднанага прэс-цэнтра Сіл абароны Поўдня Наталля Гумянюк пакуль афіцыйна не пацвердзіла, што пажар звязаны з абстрэлам.

Ноччу і на досвітку 19 ліпеня расіяне атакавалі Кіеў і Кіеўскую вобласць ударнымі дронамі. Яшчэ на подступах да сталіцы СПА выявіла і знішчыла ўсе аб’екты. Паводле папярэдніх звестак, ахвяр і разбурэнняў няма, але звесткі яшчэ ўдакладняюцца.

Ноччу 19 ліпеня падчас паветранай трывогі ў Запарожжы прагрымелі выбухі. Пра наступствы не паведамляецца.

Расійскія дроны-камікадзэ атакавалі ноччу Херсон, а ўжо пад раніцу — Жытомірскую вобласць. У Херсоне зафіксавана трапленне ў Шуменскім мікрараёне горада. З-за ўдараў адбыўся пажар у доме культуры, а таксама пашкоджаны двухпавярховы дом.

У Жытомірскай вобласці дронамі-камикадзэ пашкоджаны інфраструктурны аб'ект, ёсць пашкоджанне прыватных хатніх гаспадарак.

Усяго РФ выпусціла ўначы 31 ракету розных тыпаў — «Калібр», «Онікс», Х-22, Х-59 — і 32 дроны-камікадзэ. СПА ўдалося знішчыць 14 ракет і 23 БПЛА.

Выбухі ў Крыме

Так званы кіраўнік Крыма Сяргей Аксёнаў паведаміў пра пажар на складзе боепрыпасаў у Кіраўскім раёне і эвакуацыі жыхароў чатырох населеных пунктаў побач з гэтым складам. Спачатку Аксёнаў паведаміў аб перакрыцці аўтамабільнай трасы «Таўрыда» — «у сувязі з узнікненнем пажару на палігоне ў Кіраўскім раёне».

Пасля ён абвясціў, што з зоны вакол палігона на ўсходзе паўвострава будуць эвакуяваныя больш за дзве тысячы жыхароў чатырох населеных пунктаў.

Telegram-канал «Крымскі вецер» апублікаваў відэа нібыта выбуху на Старакрымскім палігоне. У нататцы, у прыватнасці, гаворыцца, што выбуховую хвалю адчулі ў Феадосіі.

«Ёсць розніца паміж вайной на паперы і рэальнай вайной»

Расійскае камандаванне сутыкнулася ва Украіне са складаным выбарам, гаворыцца ў справаздачы вайсковай выведкі Міністэрства абароны Вялікабрытаніі.

«З пачатку ліпеня 2023 года існуе высокая верагоднасць актывізацыі баявых дзеянняў у раёне Ніжняй плыні Дняпра. Акрамя інтэнсіўных баёў на ўсходнім беразе вакол невялікага ўкраінскага плацдарма ля разбуранага Антонаўскага моста, невялікія падраздзяленні расійскіх і ўкраінскіх войскаў таксама аспрэчваюць выспы ў дэльце Дняпра.

Расія стаіць перад дылемай, вырашаючы, ці рэагаваць на гэтыя пагрозы, узмацняючы сваю Дняпроўскую групу войскаў за кошт расцягнутых падраздзяленняў, якія супрацьстаяць украінскаму контрнаступленню ў Запарожскай вобласці», — піша брытанская выведка.

Міністр абароны Вялікабрытаніі Бэн Уолес падчас выступу на канферэнцыі Інстытута глабальных змяненняў Тоні Блэра ў Лондане заявіў, што Расія «больш хісткая», чым гэта хочуць прызнаць у Маскве, і вайну супраць Расіі ва Украіне «можна выйграць». «Раскол у іерархіі расійскай арміі цалкам рэальны, узровень страт жудасны», — адзначыў Уоллес.

Старшыня Аб'яднанага камітэта начальнікаў штабоў ЗША Марк Мілі перакананы, што контрнаступленне Сіл абароны Украіны далёкае ад правалу, адзначыўшы, што рэальная сітуацыя адрозніваецца ад таго, што выкладзена на паперы.

Паводле яго слоў, контрнаступленне можа ісці больш павольна, чым меркавалі аналітыкі, калі разглядалі магчымыя сцэнары, паказаўшы, што рэальнасць адрозніваецца ад тэорыі.

«Ёсць розніца паміж вайной на паперы і рэальнай вайной. Гэта сапраўдныя людзі ў сапраўдных машынах, якія размініруюць сапраўдныя мінныя палі, і якія сапраўды гінуць. Таму калі гэта здараецца, падраздзяленні звычайна запавольваюцца. І гэта правільна, каб выжыць і прайсці праз гэтыя мінныя палі. Таму ўкраінцы пракладваюць свой шлях», — заявіў Мілі.

Ён дадаў, што УСУ могуць задзейнічаць дадатковыя баявыя магутнасці. «Што маюць украінцы, — гэта значная колькасць баявой моцы, якая яшчэ не задзейнічаная. Я не буду казаць, што будзе ў будучыні, таму што Украіна будзе вырашаць, куды і калі яны будуць накіроўваць свае рэзервы. Цяпер яны захоўваюць сваю баяздольнасць, і павольна і стабільна прабіваюцца праз усе гэтыя мінныя палі. І гэта цяжкая барацьба, гэта вельмі цяжкі бой», — адзначыў генерал.