1. Напад на Украіну

683-ці дзень вайны: ракеты Taurus неўзабаве могуць з'явіцца ва ўкраінцаў

Замежжа

Самае неабходнае, што трэба ведаць сёння пра фронт.

Фота: УНІАН

Фота: УНІАН

Экс-прэзідэнт ФРГ Йоахім Гаўк выступае за пастаўкі Украіне ракет Taurus

Нерашучасць нямецкага ўрада вядзе не толькі да зніжэння шанцаў Украіны, але і да ўзмацнення пагрозы для свабоднага свету, заявіў ён у інтэрв'ю газеце Bild am Sonntag, раскрытыкаваўшы, у прыватнасці, канцлера Олафа Шольца.

Адказваючы на пытанне аб пастаўцы нямецкіх крылатых ракет Taurus, запытаных Украінай, Гаўк сказаў: "Я не разбіраюся ў ваеннай справе, але я размаўляў з людзьмі, якія валодаюць неабходнымі ваеннымі ведамі. І пасля гэтых размоў я больш не магу зразумець, чаму мы вагаемся з пастаўкай гэтай зброі і іншых боепрыпасаў".

Taurus — адны з самых сучасных высокадакладных ракет бундэсвера з далёкасцю дзеяння 500 кіламетраў. Лічыцца, што яны ідэальна падыходзяць для разбурэння бункераў і мастоў.

Расійскія войскі атакавалі Украіну беспілотнікамі

Паветраныя сілы УСУ паведамілі, што ўначы 7 студзеня расійскія войскі атакавалі Украіну беспілотнікамі тыпу «Шахед» і трыма ракетамі С-300. Украінскія сілы СПА збілі 21 дрон з 28.

Ранішняя зводка Генштаба УСУ. Галоўнае:

  • За мінулыя суткі адбылося 45 баявых сутыкненняў;
  • Расійскія войскі нанеслі дзевяць ракетных удараў і 84 авіяцыйныя ўдары, а таксама здзейснілі 50 абстрэлаў з рэактыўных сістэм залпавага агню па пазіцыях украінскіх сіл і населеных пунктах;
  • Пад артылерыйскім агнём апынуліся больш за 100 населеных пунктаў Чарнігаўскай, Сумскай, Харкаўскай, Луганскай, Данецкай, Запарожскай, Днепрапятроўскай, Херсонскай і Мікалаеўскай абласцей;
  • УСУ адбілі тры атакі расійскіх войскаў на Купянскім напрамку, дзве атакі — на Бахмуцкім напрамку, дзевяць атак — на Мар'інскім напрамку, пяць атак — на Запарожскім напрамку;
  • На Аўдзееўскім напрамку ўкраінскія войскі працягваюць стрымліваць войска РФ, якое не пакідае спробаў акружыць Аўдзееўку; 
  • Авіяцыя УСУ нанесла ўдары па 19 раёнах засяроджання асабовага складу УС РФ. Падраздзяленні ракетных войскаў паразілі чатыры раёны засяроджання асабовага складу, два пункты кіравання, тры артылерыйскія сродкі, радыёлакацыйную станцыю СПА і чатыры сродкі СПА расійскай арміі.