727-мы дзень вайны. Расійцы сцішыліся пасля ўзяцця Аўдзееўкі

Тэмп наступальных аперацый расійскіх акупантаў пад Аўдзееўкай рэзка запаволіўся пасля захопу горада.

Войскам РФ давядзецца ўзяць аператыўную паўзу або перакінуць падмацаванне ў гэты раён з іншых участкаў фронту. Пра гэта паведамляе Інстытут вывучэння вайны (ISW), спасылаючыся на заяву прадстаўніка Таўрычаскай групоўкі войскаў УСУ Дзмітрыя Ліхавія.

Ён распавёў, што за мінулыя суткі колькасць абстрэлаў на Аўдзееўскім кірунку істотна зменшылася. Таксама істотна паменшылася і актыўнасць авіяцыі ў гэтым раёне. Расійскія войскі перагрупоўваюцца і вядуць расчыстку горада.

У той жа час УСУ адышлі на новую лінію абароны, якую падрыхтавалі загадзя і ўмацавалі на «некалькіх узроўнях».

На думку аналітыкаў, расійцам для аднаўлення штурмаў, верагодна, прыйдзецца правесці аператыўную паўзу або перакінуць дадатковыя падмацаванні з іншых участкаў фронту, каб не дапусціць кульмінацыі дзеянняў каля горада.

«Расійскія сілы маюць рэзервы для такога ўзмацнення ў іншых сектарах, аднак ISW не заўважыў ніякіх прыкмет таго, што расійскае камандаванне цяпер перамяшчае гэтыя рэзервы ў бок Аўдзееўкі», — дадаецца ў справаздачы.

Ліхавій і спікер Сухапутных войскаў УСУ Ілля Еўлаш, наадварот, перакананыя, што расійскае камандаванне перакіне сканцэнтраваныя вакол Аўдзееўкі сілы на іншыя ўчасткі лініі фронту. Паводле слоў Еўлаша, ворагу спатрэбіцца як мінімум тыдзень, каб гэта зрабіць.

«ISW пакуль не назірае ніякіх прыкмет таго, як расійскія сілы вырашаць размеркаваць сваю жывую сілу, якая цяпер дыслакуецца паблізу Аўдзееўкі», — адзначаюць аналітыкі.

За мінулыя суткі, 19 лютага, на фронце паміж украінскімі абаронцамі і акупантамі адбылося 81 баявое сутыкненне.

Як паведамляе Генштаб УСУ ў ранішняй зводцы, на Купянскім кірунку акупанты здзейснілі чатыры беспаспяховыя спробы наступу ў раёне Сінькоўкі Харкаўскай вобласці і нанеслі авіяўдары па такіх населеных пунктах Харкаўскай вобласці, як Сінькоўка, Петрапаўлаўка, Купянск.

У той жа час на Ліманскім кірунку захопнікі пры падтрымцы авіяцыі шэсць разоў ішлі ў штурм у раёнах Тэрнаў Данецкай вобласці і Белагораўкі Луганскай вобласці. Пры гэтым на Бахмуцкім кірунку баі вяліся ў раёнах Багданаўкі, Іванаўскага, Кляшчыеўкі і Андрэеўкі Данецкай вобласці. Было адбіта 14 нападаў. Таксама авіяцыйнаму ўдару падвергнуўся Нью-Ёрк Данецкай вобласці.

На Аўдзееўскім кірунку расійцы здзейснілі дзевяць нападаў каля Ластаўчынага, Севернага, Першамайскага і Невельскага Данецкай вобласці, але поспеху не мелі. Цяжкія баі вяліся на Мар'інскім кірунку недалёка ад Георгіеўкі, Пабеды, Наваміхайлаўкі Данецкай вобласці, дзе адбітая 21 атака акупантаў.

На Навапаўлаўскім кірунку захопнікі адзін раз спрабавалі правесці штурм у раёне населенага пункта Старамаёрскае Данецкай вобласці. Яшчэ 11 нападаў яны здзейснілі на Запарожскім кірунку каля Малінаўкі і Рабоцінага Запарожскай вобласці.

«На Херсонскім кірунку ўкраінскія ваяры па-ранейшаму працягваюць утрыманне пазіцый і адбіццё штурмаў акупацыйных войскаў. нягледзячы на значныя страты, вораг не пакідае спробаў выбіць нашы падраздзяленні з займаных пазіцый. Так, за мінулыя суткі праціўнік здзейсніў пяць беспаспяховых штурмаў. У той жа час нашы воіны актыўнымі дзеяннямі наносяць акупацыйным войскам страты ў жывой сіле і тэхніцы, знясільваюць ворага ўздоўж усёй лініі фронту», — дадалі ў Генштабе.

У ноч на 20 лютага расійскія акупацыйныя войскі атакавалі тэрыторыю Украіны дзвюма зенітнымі кіраванымі ракетамі С-300/С-400, кіраванай авіяцыйнай ракетай Х-31 і 23-ма  ўдарнымі дронамі тыпу Shahed.

Як паведамляе Генштаб УСУ, ракеты запускалі з Белгародскай вобласці РФ і акупаванай часткі Запарожскай вобласці. У той жа час БПЛА ляцелі з расійскага Прыморска-Ахтарска.

Адзначаецца, што да адбіцця атакі прыцягнулі зенітныя ракетныя падраздзяленні, мабільныя агнявыя групы і сродкі РЭБ Сіл абароны Украіны.

У выніку паспяховай баявой працы ўкраінскія абаронцы збілі ўсе 23 дроны ў межах Харкаўскай, Палтаўскай, Кіраваградскай, Днепрапятроўскай, Запарожскай, Херсонскай і Мікалаеўскай абласцей.

Сёння раніцай, 20 лютага, акупанты здзейснілі яшчэ адно злачынства супраць мірнага насельніцтва Сумскай вобласці. Расійцы атакавалі вобласць, ужыўшы артылерыю і авіяцыю, у выніку чаго загінулі два чалавекі.

Пра гэта паведаміла Сумская абласная ваенная адміністрацыя. Адзначаецца, што ў пяць гадзін раніцы вораг здзейсніў авіяцыйна-артылерыйскі ўдар па Наваслабадской абшчыне Канатопскага раёна, у выніку абстрэлу адбыўся пажар у жылым доме.

«Пажар лакалізаваны. Знойдзеныя целы двух загінулых. Разбор завалаў і пошукавыя працы працягваюцца», — гаворыцца ў паведамленні.

Балгарыя затрымлівае пастаўку Украіне 100 бронетранспарцёраў, рашэнне аб адпраўцы якіх было прынята больш за тры месяцы таму ў парламенце. Паводле інфармацыі выдання Euractiv, перадача затрымліваецца, паколькі Мінабароны звярнулася да NATO з просьбай пакрыць транспартныя выдаткі.

«Балгарыя можа аказаць вялікую дапамогу Украіне, але гэта адкладаецца праз тое, што Міністэрства абароны не працуе аптымальна», — заявіў дэпутат Івайла Мірчаў.

Міністр абароны Тодар Тагараў пастаянна падвяргаецца крытыцы за павольныя дзеянні.

«Балгарыя можа дапамагчы, але гэта не адбываецца ў патрэбным тэмпе, і я спадзяюся, што сітуацыя палепшыцца. Мы прагаласавалі за пастанову аб бронетранспарцёрах амаль тры месяцы таму, але за тры месяцы мы не можам перавезці сотню БТР з Сафіі ў Русе (горад на Дунаі ў Паўночна-Усходняй Балгарыі)», — сказаў Мірчаў.

Паводле слоў міністра абароны Балгарыі, затрымка адбылася таму, што Сафія правярала, ці змогуць хаўруснікі ў NATO прафінансаваць перавозку. «Гэта няпростая транспартная аперацыя, таму што неабходна задзейнічаць досыць вялікую колькасць чыгуначных саставаў», — сказаў Тагараў.

Швецыя перадасць Украіне наступны пакет ваеннай дапамогі на суму 7,1 млрд шведскіх крон (каля 700 мільёнаў долараў), ён стане самым вялікім на сённяшні дзень.

Як піша выданне Folkbladet, пакет дапамогі Швецыі ўключае: 10 дэсантна-штурмавых катэраў класа Stridsbåt 90; 20 дэсантных катэраў; падводнае ўзбраенне, такое як міны і тарпеды; шэраг зенітных сістэм тыпу Robot 70; супрацьтанкавыя працы мадэлі TOW; гранатамёты з боепрыпасамі; артылерыйскія боепрыпасы; ручныя гранаты; гранатамёты «Карл Густаў»; медыцынскае абсталяванне; аўтамабілі хуткай дапамогі.

Таксама 1 млрд крон пойдзе на закупку ваеннай тэхнікі, яшчэ 1 млрд — па замове новых баявых машын Stridsfordon, 90.

«Падтрымліваючы Украіну, мы інвестуем у нашу бяспеку. Калі б Расія перамагла, у нас былі б значна большыя праблемы з бяспекай, чым сёння», — сказаў міністр абароны Швецыі Пол Ёнсан на прэс-канферэнцыі.

Разам з папярэднімі 14 пакетамі шведская дапамога Украіне складае амаль 30 мільярдаў шведскіх крон (2,9 млрд долараў).