Байдэн назваў дзеянні Расіі ва Украіне генацыдам

Прэзідэнт ЗША Джозэф Байдэн назваў дзеянні Расіі ва Украіне генацыдам. На ягоную думку, Уладзімір Пуцін спрабуе знішчыць саму ўкраінскую нацыю.

«Ваш сямейны бюджэт, ваша здольнасць папоўніць свой бак — нішто з гэтага не павінна залежаць ад таго, абвесціць дыктатар вайну і зробіць генацыд за паўсвету ад вас. Каб дапамагчы справіцца з гэтым пуцінскім павышэннем коштаў, я санкцыянаваў выпуск 1 мільёна барэляў у дзень цягам наступных шасці месяцаў з нашага стратэгічнага нафтавага рэзерву» — сказаў ён, каментуючы свае пастановы ў зніжэнні выдаткаў хатніх гаспадарак на электраэнергію, паведамляе REFORM.by.

Пазней журналісты скарысталіся магчымасцю ўдакладніць у Байдэна, што ён меў на ўвазе.

«Так, я назваў гэта генацыдам. Становіцца ўсё больш зразумела і ясна, што Пуцін проста спрабуе сцерці саму ідэю таго, што можна быць украінцам. І колькасць доказаў расце. Гэта адрозніваецца ад таго, што было на мінулым тыдні. З'яўляецца ўсё больш доказаў таго, што рускія ў літаральным сэнсе здзейснілі жудасныя рэчы ва Украіне. І мы будзем даведвацца ўсё больш і больш пра разбурэнні. І мы дазволім юрыстам вырашаць на міжнародным узроўні, можна ці не гэта кваліфікаваць [як генацыд], але мне здаецца, што гэта так», — сказаў ён.

Прэзідэнт ЗША не саромеецца ў ацэнках дзеянняў прэзідэнта Расіі. Раней Джозэф Байдэн называў Уладзіміра Пуціна забойцам і злачынцам. Выступаючы ў Варшаве, ён заявіў, што Пуцін не павінен стаяць на чале РФ.