Дональд Трамп зноў папрасіў Уладзіміра Зяленскага спыніць удары па расійскіх НПЗ
Прэзідэнт ЗША Дональд Трамп зноў папрасіў лідара Украіны Уладзіміра Зяленскага спыніць удары па расійскіх НПЗ. І зноў не прапанаваў Зяленскаму нічога ўзамен. Хаця Трампу ёсць, што прапанаваць, і дамовіцца пра гэта ён мог не з Пуціным, а з Іланам Маскам. Ідуць 1678-я суткі поўнамаштабнай вайны РФ супраць Украіны пры саўдзеле ў агрэсіі рэжыму Аляксандра Лукашэнкі.
На працягу мінулых сутак ва Украіне зафіксавана 229 баявых сутыкненняў, паведамляе Генштаб УСУ ў ранішняй зводцы 28 верасня.
На Канстанцінаўскім кірунку зафіксавана 25 атак у раёнах Мікалаеўкі, Канстанцінаўкі, Навасёлаўкі, Іллінаўўкі, Доўгай Балкі і Русінага Яру.
На Пакроўскім кірунку абаронцы Украіны спынілі 20 атак у раёнах Сяргееўкі і Маладзецкага, а таксама ў кірунках Дабраполля, Віольнага, Біліцкага, Чарнігаўкі і Мірнага.
На Гуляйпольскім кірунку расійцы 12 разоў атакавалі ў раёнах Раздзянкі, Капаноў, Ягораўкі і Мірнага.
На Паўднёва-Слабажанскім і Ліманскім кірунках украінскія падраздзяленні адбілі па сем атак на кожным.
* * *
Прэзідэнт Украіны Уладзімір Зяленскі паведаміў пра поспехі ўкраінскіх абаронцаў на Ліманскім кірунку ў рамках аперацыі «Вівальдзі». Па яго словах, працягваецца знішчэнне расіян на гэтым кірунку, пастаўленыя мэты дасягаюцца.
«Агулам за гэты тыдзень на ўсіх участках актыўных дзеянняў на фронце нашымі падраздзяленнямі было нейтралізавана 10660 расійскіх ваенных забітымі і параненымі. І кожная такая расійская страта суправаджаецца відэападцвярджэннем», — адзначыў ён.
«Кожны такі тыдзень на фронце, які становіцца нашым, украінскім па характары агульнай сітуацыі, не дазваляе Расіі разгарнуць вялікую наступальную актыўнасць супраць Украіны», — дадаў Зяленскі.
DeepState паведаміў, што Сілы абароны Украіны ачысцілі ад расіян раён каля вёскі Тарэцкае ў Шахаўскай сельскай грамадзе Пакроўскага раёна Данецкай вобласці.
* * *
У ноч на 28 верасня расійскія войскі атакавалі Украіну 165 ударнымі БПЛА тыпу Shahed, 79 з іх — рэактыўныя, «Гербера» і дронамі-імітатарамі тыпу «Пародыя». Супрацьпаветранай абаронай збіта і задушана 112 БПЛА.
Расіяне нанеслі ўдар па шматкватэрным доме ў Салтаўскім раёне Харкава. Атака разбурыла 2-гі і 3-ці паверхі будынка, пацярпелі 25 чалавек, у тым ліку 9 дзяцей.
У выніку начной атакі расійскіх войскаў на Кіеў пацярпелі чатыры чалавекі, у чатырох раёнах горада зафіксаваны разбурэнні будынкаў.
Вечарам 27 верасня расійскі беспілотнік атакаваў жылы раён у горадзе Ноўгарад-Северскі ў Чарнігаўскай вобласці, пацярпелі чатыры чалавекі, у тым ліку двое дзяцей.
У Краснадарскім краі РФ у ноч на 28 верасня пасля атакі беспілотнікаў узнік пажар на нафтабазе Эдэльвейс-95. Прадпрыемства займаецца аптовымі продажамі нафтапрадуктаў, яго ёмістасць складае 4500 кубаметраў, а тэрыторыя мае ўласную чыгуначную галіну для прыёму і адгрузкі паліва.
* * *
* * *
Прэзідэнт ЗША Дональд Трамп зноў абвінаваціў Украіну ў росце цэн на дызель. Па яго словах, прэзідэнт Украіны Уладзімір Зяленскі нібыта згадзіўся прыпыніць удары па расійскіх НПЗ.
«Вялікая праблема палягае ў тым, што нафтаперапрацоўчыя заводы ў Расіі выбухаюць. Гэта не столькі бліжнеўсходняя праблема, колькі праблема Расіі — з-за таго, што Украіна і Расія ваююць адна з адной, і Украіна падрывае дызельныя НПЗ у Расіі, таму што яны перапрацоўваюць шмат нафты. Так што гэтая сітуацыя сапраўды цікавая. І я гаварыў з прэзідэнтам Зяленскім, я сказаў: "Вам трэба прытармазіць з НПЗ"», — заявіў Трамп падчас зносін з журналістамі.
Журналісты спыталі, што адказаў Зяленскі. Па словах Трампа, ён сказаў: «Ну, мы, верагодна, так і зробім».
Адзначым, што Зяленскі сцвярджаў наўпрост супрацьлеглае. Пасля сустрэчы з Трампам на палях Генеральнай Асамблеі ААН у Нью-Ёрку Зяленскі заявіў, што ад Трампа не гучалі заклікі да Украіны спыніць удары па расійскіх нафтаперапрацоўчых заводах у аднабаковым парадку. Таксама Украіна некалькі разоў прапаноўвала Расіі «энергетычнае перамір’е».
* * *
Украіна мае патрэбу ў пашыраных магчымасцях Starlink і Starshield, каб супрацьдзеяць расійскім ракетным ударам, заявіў кіраўнік Офіса прэзідэнта Украіны Кірыл Буданаў у інтэрв'ю NewsForce.
Па словах Буданава, Украіна зацікаўлена не толькі ў спадарожнікавай сувязі, але і ў больш шырокіх тэхналагічных магчымасцях, якія надаюцца Starlink і Starshield. «Гэтыя магчымасці вельмі патрэбныя нам, каб даваць адпор і ўражваць расійскія ракетныя комплексы, з якіх запускаюць ракеты, што тэрарызуюць грамадзянскае насельніцтва Украіны», — заявіў Буданаў.
Буданаў адзначыў, што ўкраінскі бок хацеў бы атрымаць пашыраныя магчымасці Starlink і Starshield. У прыватнасці, гаворка ідзе аб павелічэнні пакрыцця на Расію.
Нагадаем, што ў канцы жніўня прэзідэнт Украіны Уладзімір Зяленскі заявіў аб спробах дамовіцца з прэзідэнтам ЗША Дональдам Трампам і амерыканскім мільярдэрам Іланам Маскам наконт выкарыстання Starlink на тэрыторыі Расіі. Па даных The Atlantic, Маск адмовіўся даць Украіне такую магчымасць. Адной з прычын, па словах крыніц, магла быць яго пазіцыя адносна далейшай эскалацыі вайны і неабходнасці мірнай дамовы.
Пазней Трамп заявіў, што для атрымання дазволу на выкарыстанне Starlink для удараў па тэрыторыі РФ Украіне трэба пагаварыць наўпрост з Маскам.