На фоне пуцінскага «перамір'я» страты Расіі ў вайне з Украінай перавысілі 950 тысяч чалавек

Кіраўнік Расіі Уладзімір Пуцін у чарговы раз абвясціў аднабаковае «перамір'е» у вайне з Украінай. Аднак яму зноў ніхто не паверыў. Тым часам страты Расіі на вайне, па даных украінскага боку, перавысілі 950 тысяч чалавек (гэтая лічба ўключае не толькі забітых, але і параненых). 150 тысяч — гэта страты Расіі толькі з пачатку гэтага года. Ідзе 1161-шы дзень вайны Расійскай Федэрацыі супраць Украіны пры падтрымцы агрэсіі рэжымам Аляксандра Лукашэнкі.

За мінулыя суткі на франтах Украіны зафіксавана 178 боесутыкненняў, паведамляе Генштаб УСУ ў ранішняй зводцы 29 красавіка.

Па-ранейшаму самым напружаным застаецца Пакроўскі кірунак, дзе абаронцы Украіны спынілі 59 штурмавых дзеянняў расіян у раёнах Сухой Бэлькі, Елізаветаўкі, Малінаўкі, Лысаўкі, Котліна, Удалага, Новасергіеўкі, Надзіеўкі, Траецкага, Катляроўкі і іншых.

На Новапаўлаўскім кірунку расіяне на працягу мінулага дня здзейсніў 23 атакі ў раёнах Прывольнага, Канстанцінопалю, Вольнага Поля і ў бок Атраднага, Шаўчэнкі.

На Ліманскім кірунку расіяне атакавалі 18 разоў, спрабуючы ўклініцца ва Украінскую абарону ў раёнах Кацярынаўкі, Новага, Студні, Ямпалоўкі і іншых.

На Тарэцкім кірунку расіяне здзейснілі 14 атак у раёнах Тарэцка, Дружбы і ў бок Дыліеўкі і Дачнага.

На Краматорскім кірунку расіяне 10 разоў атакавалі ў бок Маркавага і паблізу Часавага Яру і Белай Гары.

У Курскай вобласці Расіі за мінулыя суткі адбылося 15 боесутыкненняў, расіяне нанеслі 17 авіяўдараў па сваёй тэрыторыі, скінуўшы пры гэтым 27 кіраваных авіяцыйных бомбаў.

* * *

Адно дзіця загінула і яшчэ чатыры чалавекі атрымалі раненні ў выніку расійскай дронавай атакі ў Губініскай суполцы Самараўскага раёна Днепрапятроўскай вобласці. Расійскі БПЛА трапіў у жылы дом. Пад заваламі апынуліся дзеці. Мясцовыя жыхары самастойна выцягнулі адно дзіця, аднак дзяўчынка 2012 года нараджэння памерла па дарозе ў бальніцу.

Па даных мэра Кіева Віталя Клічко, у выніку падзення абломкаў варожых дронаў у Дзеснянскім раёне Кіева паўсталі пажары, ёсць пацярпелая. Згарэў прыватны дом і база адпачынку.

* * *

У Крамлі паведамілі, што кіраўнік Расіі Уладзімір Пуцін у аднабаковым парадку абвясціў «перамір'е» ва Украіне ў дні 80-годдзя перамогі ў Вялікай Айчыннай вайне. «Перамір'е» ў дні 80-годдзя перамогі павінна дзейнічаць з 0.00 гадзін з 8 мая да 0.00 гадзін 11 мая. У Пуціна заявілі, што спыняць баявыя дзеянні на гэты час нібыта «з гуманітарных меркаванняў».

«Расія лічыць, што Украіна павінна рушыць прыкладу і таксама абвясціць перамір'е ў дні 80-годдзя перамогі», — заявілі ў Крамлі.

Варта адзначыць, што Пуін ужо некалькі разоў у аднабаковым парадку аб'яўляў «перамір'і», якія выкарыстоўваў для разведкі, адпачынку і перагрупоўкі сваіх войскаў для чарговага наступу на Украіну.

* * *

У адказ на заяву расійскага кіраўніка Уладзіміра Пуціна аб абвяшчэнні чарговага кароткага «перамір'я» прэс-сакратар Генеральнага сакратара ААН Стэфан Дзюжарык адзначыў, што ў ААН хочуць бачыць заканчэнне вайны Расіі супраць Украіны на аснове міжнароднага права і статута арганізацыі. «Наша пазіцыя застаецца нязменнай: мы хочам бачыць заканчэнне вайны... Яно павінна быць прынцыповым і паслядоўным і трывала грунтавацца на Статуце ААН, міжнародным праве і ўсіх адпаведных рэзалюцыях», — сказаў спікер ААН.

Дзюжарык таксама адзначыў, што мір павінен быць устойлівым і прадугледжваць прызнанне суверэнітэту і тэрытарыяльнай цэласнасці Украіны.

* * *

Прэзідэнт Украіны Уладзімір Зяленскі заявіў, што Украіне трэба не часовае «перамір'е» дзеля параду ў Маскве, а поўнае і неадкладнае спыненне агню мінімум на 30 дзён. 

У сваім звароце Зяленскі падкрэсліў, што Украіна не хацела ні секунды гэтай вайны і гатовая супрацоўнічаць з усімі партнёрамі для ўстанаўлення міру і забеспячэння бяспекі. Затое Расія ўвесь час адхіляе такія ініцыятывы і маніпулюе сусветнай супольнасцю, спрабуючы падмануць, у прыватнасці, Злучаныя Штаты.

«Мы цэнім жыцці людзей, а не парады. Менавіта таму мы лічым — свет лічыць, — што няма прычын чакаць 8 траўня. І агонь павінен быць спынены не на некалькі дзён, каб потым зноў забіваць. Неадкладнае, поўнае і безумоўнае спыненне агню — і мінімум на 30 дзён, каб было гарантавана і надзейна, — гэта тое, што можа даць аснову рэальнай дыпламатыі», — заявіў Зяленскі.

* * *

* * *

Уладзімір Пуцін не разглядае «перамір'е» на Дзень перамогі як сур'ёзны крок на шляху да працяглага міру ва Украіне, лічаць эксперты Інстытута вывучэння вайны (ISW).

На думку экспертаў, дамоўленасць аб спыненні агню па энергетычных аб'ектах і «Велікоднае перамір'е» сёлета паказалі, што дэталі любога будучага пагаднення аб спыненні агню або мірнага пагаднення павінны быць агульнадаступнымі, афіцыйна ўзгодненымі загадзя ўсімі бакамі, і прадугледжваць надзейныя механізмы маніторынгу.

У гэтым кантэксце ў ISW адзначылі, што прапанаванае расійскім дыктатарам Уладзімірам Пуціным спыненне агню на Дзень перамогі, не прадугледжвае ніякіх механізмаў маніторынгу. Таму расійскія крыніцы, хутчэй за ўсё, скарыстаюцца адсутнасцю такіх механізмаў, каб зноў напоўніць інфармацыйную прастору неабгрунтаванымі заявамі аб парушэнні рэжыму спынення агню з боку Украіны.

«Расійскія афіцыйныя асобы, падобна, не зацікаўленыя ў стварэнні дзейсных механізмаў маніторынгу або агульнай грамадскай асновы для такіх перамір'яў, верагодна таму, што Расіі выгадна выкарыстоўваць расплывістыя і недакладныя ўмовы перамір'я супраць Украіны на сваю карысць», — гаворыцца ў справаздачы.

На думку экспертаў, Пуцін таксама спрабуе падтрымліваць ілюзію зацікаўленасці ў мірных перамовах, захоўваючы пры гэтым поўны кантроль над умовамі і тэрмінамі любых пагадненняў аб спыненні агню.

У ISW адзначылі, што расійскія войскі скарысталіся «Велікодным перамір'ем» для абстрэлаў, разведкі перадавых украінскіх пазіцый і пашкоджання тэхнікі ўздоўж лініі фронту ў рамках падрыхтоўкі да будучых расійскіх наступальных дзеянняў. У ведамстве не выключаюць, што расійскія войскі, верагодна, выкарыстоўваюць перамір'е на Дзень перамогі для падобных падрыхтоўчых мерапрыемстваў.

У ISW перакананыя, што пастаянныя намаганні Пуціна, накіраваныя на ўтойванне сваіх папярэдніх адхіленняў амерыканскіх і ўкраінскіх прапаноў аб спыненні агню, супярэчаць заяўленаму Трампам падыходу — спачатку ўсталяваць рэжым спынення агню, а затым весці перамовы аб больш шырокім мірным пагадненні, а таксама мэты прэзідэнта ЗША — дасягнуць працяглага міру ва Украіне.

* * *

Прэзідэнт Францыі Эмануэль Макрон заявіў, што ў бліжэйшыя 8-10 дзён Еўропа і ЗША ўзмоцняць ціск на Расію, каб яна пагадзілася на поўнае спыненне агню. «Еўропа павінна быць гатовая разам з ЗША ўзмацніць сваю пазіцыю ў дачыненні да Расіі, каб забяспечыць спыненне агню», — сказаў французскі лідар у інтэрв'ю часопісу Paris Match.

Французскі лідар паведаміў, што абмяркоўваў гэта з прэзідэнтамі ЗША і Украіны Дональдам Трампам, Уладзімірам Зяленскім і прэм'ер-міністрам Вялікабрытаніі Кірам Стармерам у Ватыкане 26 красавіка, у дзень пахавання Папы Рымскага Францішка. На ягоную думку, ім ўдалося пераканаць Трампа ў неабходнасці ўзмацнення санкцый, каб прымусіць расійцаў пагадзіцца на спыненне агню. «Я лічу, што дзякуючы сустрэчы ў Ватыкане нам удалося вярнуць ціск на Расію. Гэта было мэтай, таму што гэта было няправільна, каб ціск аказваўся выключна на Украіну. Менавіта гэтага мы дасягнулі з дапамогай Кіра Стармера», — сказаў Макрон.

Ён заявіў, што наступныя два тыдні «будуць ключавымі» ў спробах увесці гэтае спыненне агню і ўзмацніць ціск на Маскву.

* * *

NATO праводзіць каля Расіі вучэнні, на якім адпрацоўвае сцэнар захопу Калінінградскай вобласці, заявіў памочнік кіраўніка Расіі, кіраўнік Марской калегіі Мікалай Патрушаў.

«Другі год запар NATO праводзіць ля нашых межаў самыя маштабныя за апошнія дзесяцігоддзі вучэнні, на якіх адпрацоўвае сцэнары захопу Калінінградскай вобласці. Яны вучацца прэвентыўным ударам па месцах пастаяннага базавання расійскіх сіл ядзернага стрымлівання», — сказаў ён.

Патрушаў таксама дадаў, што сілы NATO «трэніруюцца наступаць на тэрыторыі ад Вільні да Адэсы, а таксама абмяжоўваць перамяшчэнне суднаў у Балтыйскім і Чорным марах».

Патрушаў сказаў, што бяспецы Расіі пагражаюць прэм'ер-міністр Вялікабрытаніі Кір Стармер, кіраўнік Еўракамісіі Урсула фон дэр Ляен і генеральны сакратар NATO Марк Рутэ.

Варта адзначыць, што падобная рыторыка выкарыстоўвалася перад уварваннем Расіі ва Украіну.

Раней паведамлялася, што ЗША прыступілі да перакідання войскаў і вайсковай тэхнікі ў Еўропу для ўдзелу ў буйнамаштабных вучэннях Defender 25 з хаўруснікамі і партнёрамі. Усяго ў Еўропу прыбудуць 5,4 тыс. амерыканскіх вайскоўцаў. У вучэннях, якія плануюцца з 11 мая па 24 чэрвеня, акрамя якія праводзяцца імі ЗША прымуць удзел 18 краін-членаў і партнёраў NATO.